Milky Way: రికార్డు సృష్టించిన నక్షత్రం.. పాలపుంతలోని భారీ బ్లాక్హోల్ ఎలా తిరుగుతుందో చెప్పే అవకాశం
ఈ వార్తాకథనం ఏంటి
మన పాలపుంత (Milky Way) గెలాక్సీ మధ్యలో 'సాజిటేరియస్ ఏ (Sagittarius A) అనే సూపర్మాసివ్ బ్లాక్హోల్ ఉంది. దీని ద్రవ్యరాశి సూర్యుడి కంటే ఏకంగా 40 లక్షల రెట్లు ఎక్కువ. తన చుట్టుపక్కల ఉన్న విశ్వ ప్రాంతంలోని ప్రతి వస్తువుపైనా ఇది ప్రభావం చూపుతుంటుంది. అయితే తాజాగా ఖగోళ శాస్త్రవేత్తలు గుర్తించిన ఓ ప్రత్యేక నక్షత్రం.. విశ్వంలోని అత్యంత సంక్లిష్టమైన, అంతుచిక్కని అంశాలను అర్థం చేసుకునేందుకు కీలక ఆధారాలను అందించే అవకాశం ఉందని భావిస్తున్నారు. 'నేచర్' జర్నల్లో ఈరోజు ప్రచురితమైన అధ్యయనంలో పరిశోధకులు ఈ నక్షత్రానికి 'S301' అని పేరు పెట్టారు. ఇది సాజిటేరియస్ ఏ బ్లాక్హోల్కు సమీపంలో ఉండటంతో.. దాని చుట్టూ సెకనుకు 15,500 మైళ్లకు పైగా వేగంతో పరిభ్రమిస్తోంది.
వివరాలు
ఇంతకుముందెన్నడూ చూడని నక్షత్రం..
S301కు సంబంధించిన పరిస్థితులు ఎంతో ప్రత్యేకంగా ఉండటంతో ఖగోళ భౌతిక శాస్త్రవేత్తలు దీనిని 'ఇంతకుముందెన్నడూ చూడని నక్షత్రం'గా అభివర్ణించారు.
"ఈ నక్షత్రం ప్రత్యేకత ఏమిటంటే.. ఇది సాజిటేరియస్ ఏ* చుట్టూ అత్యంత బిగువైన కక్ష్యలో తిరుగుతోంది.
ఈ కక్ష్యను పూర్తి చేయడానికి కేవలం 8.7 సంవత్సరాల సమయం పడుతోంది.
అంతేకాదు.. బ్లాక్హోల్కు చేరుకునే సమయంలో భూమికి, సూర్యుడికి మధ్య ఉన్న దూరానికి కేవలం 12 రెట్ల దూరంలో మాత్రమే ఉంటుంది" అని అధ్యయన సహ రచయిత, జర్మనీలోని మ్యాక్స్ ప్లాంక్ ఇన్స్టిట్యూట్ ఫర్ ఎక్స్ట్రాటెరెస్ట్రియల్ ఫిజిక్స్ (MPE)కు చెందిన ఖగోళ భౌతిక శాస్త్రవేత్త ఫెలిక్స్ మాంగ్ తెలిపారు.
వివరాలు
గంటకు సుమారు 15,500 మైళ్లకు పైగా వేగం..
S301 తన కక్ష్యలో బ్లాక్హోల్కు అత్యంత దగ్గరగా వచ్చే సమయంలో.. భూమికి, శనిగ్రహానికి మధ్య ఉన్న దూరానికి సమానమైన దూరంలో ఉంటుంది.
దీంతో ఇది ఇప్పటివరకు సాజిటేరియస్ ఏకు అత్యంత సమీపంలో గుర్తించిన నక్షత్రంగా మాత్రమే కాకుండా.. అత్యంత వేగంగా కదిలే నక్షత్రంగా కూడా రికార్డు సృష్టించింది.
తన కక్ష్యలో S301 గంటకు సుమారు 15,500 మైళ్లకు పైగా వేగాన్ని అందుకుంటుంది
వివరాలు
కాంతి వేగంలో 8 శాతానికి పైగా వేగంతో ప్రయాణం..
సాధారణ వాణిజ్య విమానం కంటే ఏకంగా లక్ష రెట్లకు పైగా వేగం.
అంతేకాదు.. కాంతి వేగంలో 8 శాతానికి పైగా వేగంతో ప్రయాణిస్తుంది.
"సాజిటేరియస్ ఏకు ఇది అత్యంత సమీపంగా పరిభ్రమిస్తుండటంతో.. ఇలాంటి అత్యంత తీవ్రమైన బ్లాక్హోల్ వాతావరణంలో స్పేస్టైమ్ (అంతరిక్ష కాలం)కు సంబంధించిన ప్రాథమిక లక్షణాలను అర్థం చేసుకునేందుకు S301 కొత్త మార్గాన్ని తెరుస్తుంది" అని అధ్యయన సహ రచయిత, 2020లో భౌతిక శాస్త్రంలో నోబెల్ బహుమతి అందుకున్న రైన్హార్డ్ గెంజెల్ తెలిపారు.