Siri AI: భారత యూజర్లకు ఆపిల్ బంపరాఫర్.. ఐక్లౌడ్+లోనే టీవీ+, ఆర్కేడ్
ఈ వార్తాకథనం ఏంటి
ప్రముఖ టెక్ సంస్థ ఆపిల్ మంగళవారం పలు కీలక ప్రకటనలు చేసింది. సరికొత్త సాఫ్ట్వేర్ అప్డేట్లను విడుదల చేయడంతో పాటు భారత్లోని యూజర్లకు ప్రత్యేక ఆఫర్ను ప్రకటించింది. ఇకపై భారత్లో ఐక్లౌడ్+ సబ్స్క్రైబర్లకు ఎలాంటి అదనపు రుసుము లేకుండానే ఆపిల్ టీవీ+ (Apple TV+), ఆపిల్ ఆర్కేడ్ (Apple Arcade) సేవలను అందించనున్నట్లు వెల్లడించింది. ఈ కొత్త ఆఫర్ ఈ నెల నుంచే అమల్లోకి రానుంది.
వివరాలు
నెలకు రూ.75కే పలు సేవలు
నెలకు రూ.75 నుంచి ప్రారంభమయ్యే 50GB ఐక్లౌడ్+ సబ్స్క్రిప్షన్ తీసుకున్న యూజర్లు ఆపిల్ టీవీ+, ఆపిల్ ఆర్కేడ్ సేవలను అదనపు చార్జీలు లేకుండా పొందవచ్చు.
దీంతో పాటు యాడ్స్ లేని మ్యూజిక్ స్టేషన్ల సమాహారమైన 'ఆపిల్ మ్యూజిక్ సెలెక్ట్' కూడా ఈ ప్యాకేజీలో భాగంగా ఉంటుంది.
ఆపిల్ టీవీ+ ద్వారా సంస్థ రూపొందించిన ఒరిజినల్ సినిమాలు, వెబ్ సిరీస్లను వీక్షించవచ్చు.
ఇక ఆపిల్ ఆర్కేడ్లో 200కు పైగా గేమ్స్ను యాడ్స్, అదనపు ఇన్-యాప్ కొనుగోళ్లు లేకుండా ఆడుకునే అవకాశం ఉంటుంది.
వివరాలు
విడివిడిగా సబ్స్క్రిప్షన్లకు అవకాశం లేదు
కొత్త ప్యాకేజీ అందుబాటులోకి వచ్చిన నేపథ్యంలో ఆపిల్ టీవీ+, ఆపిల్ ఆర్కేడ్ సేవలను భారత్లో ఇకపై విడిగా సబ్స్క్రైబ్ చేసుకునే అవకాశం ఉండదని ఆపిల్ స్పష్టం చేసింది.
ఇప్పటికే ఈ రెండు సేవలను విడివిడిగా వినియోగిస్తున్న వారి సబ్స్క్రిప్షన్లను రద్దు చేసి, వాటిని వారి ఐక్లౌడ్+ ప్లాన్లోకి మారుస్తామని తెలిపింది.
అదేవిధంగా కొత్త యూజర్లకు 'ఆపిల్ వన్' (Apple One) సబ్స్క్రిప్షన్ కూడా భారత్లో అందుబాటులో ఉండదని కంపెనీ వెల్లడించింది.
అయితే ఇప్పటికే ఆపిల్ వన్ సబ్స్క్రిప్షన్ తీసుకున్నవారు తమ ప్లాన్ను యథావిధిగా కొనసాగించవచ్చని వివరించింది.
వివరాలు
కొత్త ఓఎస్లతో సిరి ఏఐ
మరోవైపు, ఆపిల్ తన తాజా సాఫ్ట్వేర్ వెర్షన్లైన ఐఓఎస్ 27, ఐప్యాడ్ఓఎస్ 27, మ్యాక్ఓఎస్ 27, వాచ్ఓఎస్ 27, టీవీఓఎస్ 27లను విడుదల చేసింది.
వీటిలో ఆర్టిఫిషియల్ ఇంటెలిజెన్స్ ఆధారంగా పనిచేసే 'సిరి ఏఐ' వాయిస్ అసిస్టెంట్ ప్రధాన ఆకర్షణగా నిలుస్తోంది.
ప్రస్తుతం సిరి ఏఐని ఇంగ్లిష్ భాషలో బీటా వెర్షన్గా అందిస్తున్నారు.
అక్టోబర్ నుంచి ఫ్రెంచ్, జపనీస్, కొరియన్, స్పానిష్ తదితర భాషల్లోనూ అందుబాటులోకి తీసుకురానున్నట్లు ఆపిల్ తెలిపింది.
వివరాలు
పిల్లల డిజిటల్ భద్రతకు కొత్త ఫీచర్లు
పిల్లల ఆన్లైన్ భద్రతను దృష్టిలో పెట్టుకుని ఆపిల్ కొత్త పేరెంటల్ కంట్రోల్స్ను ప్రవేశపెట్టింది.
దీంతో పాటు స్క్రీన్ టైమ్ ఫీచర్లను మరింత మెరుగుపరిచింది. పిల్లలు పరికరాలను ఉపయోగించే సమయం, కంటెంట్ యాక్సెస్ వంటి అంశాలపై తల్లిదండ్రులకు మరింత నియంత్రణ కల్పించనుంది.
ఈ నెల చివరి నాటికి భారత్తో పాటు దాదాపు 100 దేశాల్లో ఐక్లౌడ్+తో కూడిన ఈ కొత్త ప్యాకేజీని అందుబాటులోకి తీసుకురానున్నట్లు ఆపిల్ పేర్కొంది.