Apple Smart Glasses: కళ్లజోడు మార్కెట్పై ఆపిల్ కన్ను.. రే-బాన్,ఓక్లేకు కొత్త సవాల్!
ఈ వార్తాకథనం ఏంటి
స్మార్ట్వాచ్ల రంగంలో విప్లవాత్మక మార్పులు తీసుకొచ్చిన ఆపిల్ ఇప్పుడు కళ్లజోడు మార్కెట్ను లక్ష్యంగా పెట్టుకుంది. కంపెనీ త్వరలో విడుదల చేయనున్న స్మార్ట్ గ్లాసెస్తో కేవలం మెటాకే కాకుండా మొత్తం ఐవేర్ పరిశ్రమకే సవాల్ విసరాలని భావిస్తోంది. గతంలో ఆపిల్ వాచ్ను విడుదల చేసినప్పుడు పెబుల్, మోటరోలా వంటి స్మార్ట్వాచ్ కంపెనీలతో మాత్రమే కాకుండా స్వాచ్, ఫాసిల్, సీకో వంటి సంప్రదాయ వాచ్ బ్రాండ్లతోనూ పోటీ పడింది. అదే వ్యూహాన్ని ఇప్పుడు స్మార్ట్ గ్లాసెస్ విషయంలో కూడా అమలు చేయాలని చూస్తోంది.
వివరాలు
కళ్ళద్దాల మార్కెట్ గడియారాల మార్కెట్ కంటే కూడా పెద్దది
ప్రస్తుతం ప్రపంచ వాచ్ మార్కెట్ విలువ సుమారు 132 బిలియన్ డాలర్లుగా అంచనా వేస్తుండగా, ఐవేర్ పరిశ్రమ వార్షికంగా 180 నుంచి 200 బిలియన్ డాలర్ల వరకు ఆదాయం ఆర్జిస్తోంది. దీంతో కళ్లజోడు మార్కెట్ మరింత భారీదిగా మారింది. అయితే ఈసారి ఆపిల్ లగ్జరీ విభాగంపై దృష్టి పెట్టడం లేదు. గతంలో 10 వేల డాలర్ల విలువైన బంగారు ఆపిల్ వాచ్ను తీసుకొచ్చినా ఆశించిన స్థాయిలో విజయం సాధించలేకపోయింది.
వివరాలు
ఏఐ ఫీచర్లు కూడా ఈ స్మార్ట్ గ్లాసెస్కు ప్రత్యేక ఆకర్షణ
ఈ నేపథ్యంలో సాధారణ వినియోగదారులను లక్ష్యంగా చేసుకుని 200 నుంచి 500 డాలర్ల ధర శ్రేణిలో స్మార్ట్ గ్లాసెస్ను తీసుకురావాలని కంపెనీ యోచిస్తోంది. ప్రస్తుతం ఈ విభాగంలో ఓక్లే, రే-బాన్ వంటి బ్రాండ్లు ఆధిపత్యం చెలాయిస్తున్నాయి. తమ బలమైన బ్రాండ్ ఇమేజ్, ఆకర్షణీయమైన డిజైన్, ఐఫోన్తో సులభ అనుసంధానం వంటి అంశాలు వినియోగదారులను ఆకట్టుకుంటాయని ఆపిల్ భావిస్తోంది. అంతేకాకుండా చుట్టూ ఉన్న ప్రపంచంతో మరింత తెలివిగా మమేకం కావడానికి సహాయపడే ఏఐ ఫీచర్లు కూడా ఈ స్మార్ట్ గ్లాసెస్కు ప్రత్యేక ఆకర్షణగా నిలవనున్నాయి.