Apple's iPhone event today: ఐఫోన్ 18 సిరీస్ లాంచ్కు వేళాయె.. భారత్లో ఎప్పుడు చూడాలంటే.. పూర్తి వివరాలు
ఈ వార్తాకథనం ఏంటి
ప్రపంచవ్యాప్తంగా టెక్ ప్రియులు ఎంతో ఆసక్తిగా ఎదురుచూస్తున్న ఆపిల్ మెగా ఈవెంట్కు సమయం ఆసన్నమైంది. సెప్టెంబర్ 9, బుధవారం 'సర్ప్రైజ్ అండ్ షైన్' పేరుతో ఆపిల్ ప్రత్యేక కార్యక్రమాన్ని నిర్వహించనుంది. కొత్త చీఫ్ ఎగ్జిక్యూటివ్ ఆఫీసర్ (సీఈఓ) జాన్ టెర్నస్ బాధ్యతలు స్వీకరించిన తర్వాత జరుగుతున్న తొలి భారీ ప్రాడక్ట్ లాంచ్ ఈవెంట్ కావడంతో దీనిపై భారీ అంచనాలు నెలకొన్నాయి. ఈ కార్యక్రమంలో ప్రధాన ఆకర్షణగా ఐఫోన్ 18 సిరీస్ నిలవనుంది. దీంతోపాటు ఆపిల్ చరిత్రలో తొలిసారిగా ఫోల్డబుల్ 'ఐఫోన్ అల్ట్రా'ను తీసుకురానున్నట్లు సమాచారం. ఆపిల్ వాచ్ సిరీస్ 12, ఎయిర్పాడ్స్ 5, నెక్ట్స్ జనరేషన్ హోమ్పాడ్ మినీలను కూడా ఈ వేదికగా ఆవిష్కరించే అవకాశం ఉంది.
వివరాలు
భారత్లో ఐఫోన్ 18 సిరీస్ లాంచ్ను ఎప్పుడు, ఎలా చూడాలి?
అయితే ఈ ఈవెంట్లో ఐఫోన్ 18 ప్రో, ఐఫోన్ 18 ప్రో మ్యాక్స్ మాత్రమే విడుదలయ్యే అవకాశం ఉందని టెక్ వర్గాల్లో ప్రచారం జరుగుతోంది.
స్టాండర్డ్ ఐఫోన్ 18 మోడల్ను వచ్చే ఏడాది తీసుకురావచ్చని తెలుస్తోంది. దీనిపై సెప్టెంబర్ 9 రాత్రి జరిగే ఆపిల్ ఈవెంట్లో స్పష్టత వచ్చే అవకాశం ఉంది.
అమెరికాలోని కాలిఫోర్నియా రాష్ట్రం కుపర్టినోలో ఉన్న ఆపిల్ పార్క్ క్యాంపస్లో ఈ మెగా ఈవెంట్ జరగనుంది.
తేదీ, సమయం: అమెరికా కాలమానం ప్రకారం సెప్టెంబర్ 9 ఉదయం 10 గంటలకు కార్యక్రమం ప్రారంభమవుతుంది. భారత కాలమానం ప్రకారం అదే రోజు రాత్రి 10:30 గంటలకు లైవ్ ప్రారంభమవుతుంది.
వివరాలు
ఐఫోన్ 18 ప్రో ధర ఎంత ఉండొచ్చు?
లైవ్ స్ట్రీమింగ్: భారత్లోని టెక్ ప్రియులు ఆపిల్ అధికారిక యూట్యూబ్ ఛానెల్,ఆపిల్ టీవీ యాప్, ఆపిల్ అధికారిక వెబ్సైట్ ద్వారా ఈ కార్యక్రమాన్ని ప్రత్యక్షంగా వీక్షించవచ్చు.
భారత మార్కెట్లో కొత్త ఐఫోన్ల ధరలపై ఎప్పుడూ ఆసక్తి ఉంటుంది.
ప్రస్తుతం లీకైన సమాచారం ప్రకారం.. ఈ ఏడాది విడుదల కానున్న ఐఫోన్ 18ప్రో ప్రారంభ ధర భారత్లో సుమారు రూ.1,39,900 ఉండొచ్చని అంచనా.
గతేడాది విడుదలైన ఐఫోన్ 17ప్రో ప్రారంభ ధర రూ.1,34,900గా ఉంది.దానితో పోలిస్తే కొత్త మోడల్ ధర దాదాపు రూ.5,000 ఎక్కువగా ఉండే అవకాశం ఉంది.
రూపాయి మారకం విలువలో మార్పులు, దిగుమతి సుంకాలు వంటి అంశాలు కూడా భారత్లో ఐఫోన్ 18సిరీస్ ధరలపై ప్రభావం చూపవచ్చని నిపుణులు అంచనా వేస్తున్నారు.
వివరాలు
కొత్త డిజైన్.. నాలుగు కలర్ ఆప్షన్లు?
గతేడాది ఐఫోన్ 17 ప్రో మోడళ్లు ఆరెంజ్, డీప్ బ్లూ, సిల్వర్ రంగుల్లో అందుబాటులోకి వచ్చాయి. ఈసారి ఐఫోన్ 18 ప్రోను మరింత కొత్త లుక్తో తీసుకురానున్నట్లు సమాచారం.
కలర్ వేరియంట్లు: స్కై బ్లూ, బర్గండి, క్లాసిక్ బ్లాక్, సిల్వర్ రంగుల్లో ఐఫోన్ 18 సిరీస్ లభించే అవకాశం ఉందని తెలుస్తోంది.
స్క్రీన్ డిజైన్: డిజైన్ విషయంలో ఐఫోన్ 17 ప్రోను పోలిన శైలినే కొనసాగించే అవకాశం ఉంది. అయితే డిస్ప్లేలోని 'డైనమిక్ ఐలాండ్' పరిమాణాన్ని మరింత తగ్గించనున్నట్లు సమాచారం.
ఫ్రంట్ కెమెరా: సెల్ఫీ ప్రియులకు కూడా ఆపిల్ గుడ్న్యూస్ చెప్పనున్నట్లు తెలుస్తోంది. ఫ్రంట్ కెమెరాను 24 మెగాపిక్సెల్కు అప్గ్రేడ్ చేసే అవకాశం ఉందని టెక్ వర్గాల్లో వార్తలు వస్తున్నాయి.
వివరాలు
పవర్ఫుల్ ప్రాసెసర్.. కెమెరాలోనూ భారీ అప్గ్రేడ్స్
పనితీరు విషయంలో ఐఫోన్ 18 ప్రో, ప్రో మ్యాక్స్ మోడళ్లలో కీలక మార్పులు చేయనున్నట్లు సమాచారం.
ఈ రెండు ఫోన్లలో అత్యాధునిక 2-నానోమీటర్ ఏ20 ప్రో చిప్సెట్ను ఉపయోగించనున్నట్లు తెలుస్తోంది.
కొత్త చిప్సెట్ వల్ల ఫోన్ పనితీరు మరింత వేగంగా ఉండటంతో పాటు బ్యాటరీ వినియోగం కూడా తగ్గే అవకాశం ఉంది.
అంతేకాదు.. ఆపిల్ సొంతంగా అభివృద్ధి చేసిన కొత్త 'సీ2 మోడెమ్'ను కూడా ఈ సిరీస్లో పరిచయం చేయనున్నట్లు సమాచారం.
ఐఫోన్ 18 ప్రో మ్యాక్స్లో కెమెరా విభాగంలోనూ ప్రత్యేక అప్గ్రేడ్స్ ఉండనున్నాయి. ప్రధాన కెమెరాకు 'వేరియబుల్ అపెర్చర్' ఫీచర్ను అందించనున్నట్లు తెలుస్తోంది.
దీనితోపాటు మెరుగైన ఆప్టికల్ జూమ్ సామర్థ్యం, అధిక సామర్థ్యం కలిగిన బ్యాటరీని అందించవచ్చని సమాచారం.
వివరాలు
ఐఫోన్ 18 సిరీస్ అమ్మకాలు ఎప్పటి నుంచి?
ఆపిల్ సాధారణంగా కొత్త ఐఫోన్లను లాంచ్ ఈవెంట్ జరిగిన తర్వాతి వారంలో శుక్రవారం నుంచి విక్రయానికి తీసుకువస్తుంది.
ఇదే విధానాన్ని కొనసాగిస్తే.. ఐఫోన్ 18 ప్రో, ప్రో మ్యాక్స్ మోడళ్లు సెప్టెంబర్ 18 నుంచి ప్రపంచ మార్కెట్లలో అందుబాటులోకి వచ్చే అవకాశం ఉంది.
అయితే వివిధ దేశాల్లోని టైమ్జోన్ల కారణంగా ఆస్ట్రేలియా వినియోగదారులకు ఇతర మార్కెట్ల కంటే ముందుగానే కొత్త ఐఫోన్లు అందుబాటులోకి వచ్చే అవకాశం ఉంది.
కొత్త ఐఫోన్ల విక్రయ తేదీలు, ప్రీ-ఆర్డర్లకు సంబంధించిన వివరాలను సెప్టెంబర్ 9న జరిగే ప్రధాన లాంచ్ ఈవెంట్లోనే ఆపిల్ అధికారికంగా వెల్లడించే అవకాశం ఉంది.