Breaking the ice: చంద్రుని ఉపరితలానికి కింద.. ధ్రువప్రాంతాల్లో మరిన్నిచోట్ల ఐస్‌.. సమాచారం సేకరించిన చంద్రయాన్‌-3
ఈ వార్తాకథనం ఏంటి
చంద్రుని ఉపరితలానికి కింద, ముఖ్యంగా ధ్రువప్రాంతాల్లో మరిన్ని ప్రాంతాల్లో ఐస్‌ ఉండే అవకాశముందని చంద్రయాన్‌-3 సేకరించిన సమాచారం తెలియజేస్తోంది.
ఉపరితల ఉష్ణోగ్రతల్లో గణనీయమైన మార్పుల కారణంగా ఐస్‌ ఏర్పడుతుందని, దీనిని అధ్యయనం చేయడం ద్వారా వాటి మూలాలు మరియు చరిత్రకు సంబంధించిన వివిధ కోణాలను తెలుసుకోవచ్చని అహ్మదాబాద్‌లోని 'ఫిజికల్‌ రీసెర్చ్‌ లేబొరేటరీ'కు చెందిన ఫ్యాకల్టీ దుర్గాప్రసాద్‌ కరణం వెల్లడించారు.
ఐస్‌ ఎలా ఏర్పడింది, కాలక్రమేణా అది ఎలా కదులుతూ వచ్చింది అనే అంశాలను పరిశీలించడం ద్వారా చంద్రుని భౌగోళిక పరిణామాలను సమగ్రంగా అర్థం చేసుకునేందుకు వీలుంటుందని ఆయన తెలిపారు.
చంద్రయాన్‌-3 ద్వారా చంద్రుని ఉపరితల ఉష్ణోగ్రతలకు సంబంధించిన సమాచారం సేకరించి పరిశోధకులు విశ్లేషించారు.
వివరాలు
ఐస్‌ను నీటిగా మార్చే అవకాశం లేదు
ఆ పరిశోధన ప్రకారం, చంద్రుని ఉపరితల ఉష్ణోగ్రత 82 డిగ్రీల సెల్సియస్‌ నుంచి మైనస్‌ 170 డిగ్రీల సెల్సియస్‌ వరకు మారుతున్నట్లు గుర్తించారు.
సూర్యుని కిరణాలకు నేరుగా గురికాని, దూరంగా ఉండే వాలు ప్రాంతాల్లో అధిక చల్లదనం కారణంగా అక్కడ ఐస్‌ ఏర్పడే అవకాశముందని భావిస్తున్నారు.
అయితే, ఈ ఐస్‌ను నీటిగా మార్చే అవకాశం లేదని, అది ఆవిరిగా మారిపోయే అవకాశముందని దుర్గాప్రసాద్‌ స్పష్టం చేశారు.