Gemini Intelligence: జెమినీ ఇంటెలిజెన్స్తో 'గూగుల్బుక్' ల్యాప్టాప్లు.. గూగుల్ కొత్త సంచలనం
ఈ వార్తాకథనం ఏంటి
గూగుల్ తాజాగా "గూగుల్బుక్" పేరుతో కొత్త తరహా ల్యాప్టాప్లను ప్రకటించింది. ఆండ్రాయిడ్ షో ఐ/ఓ ఎడిషన్ కార్యక్రమంలో ఈ డివైస్లను ఆవిష్కరించింది. జెమినీ ఇంటెలిజెన్స్ ఆధారంగా పనిచేసే ఈ ల్యాప్టాప్లు వినియోగదారులకు కొత్త అనుభూతిని అందించనున్నాయి. ముఖ్యంగా మ్యాజిక్ పాయింటర్, క్రియేట్ యువర్ విడ్జెట్ వంటి ఆధునిక ఫీచర్లు ఇందులో ఉన్నాయి. ప్రత్యేకమైన గ్లోబార్ డిజైన్ కూడా ఈ ల్యాప్టాప్లకు ఆకర్షణగా నిలిచింది.
వివరాలు
ఆండ్రాయిడ్ ఫోన్లతో సులభంగా కనెక్ట్ అయ్యేలా గూగుల్బుక్ ల్యాప్టాప్
గూగుల్బుక్ ల్యాప్టాప్లు ఆండ్రాయిడ్ ఫోన్లతో సులభంగా కనెక్ట్ అయ్యేలా రూపొందించారు. ఇందులో ఉన్న మ్యాజిక్ పాయింటర్ ఫీచర్ ద్వారా కర్సర్ను స్క్రీన్పై కదిలించగానే జెమినీ ఆధారిత సూచనలు కనిపిస్తాయి. ఉదాహరణకు ఈమెయిల్లో ఉన్న తేదీపై చూపిస్తే వెంటనే మీటింగ్ షెడ్యూల్ చేసే అవకాశం ఉంటుంది. అలాగే రెండు ఫోటోలను సెలెక్ట్ చేస్తే వాటిని కలిపి వెంటనే ప్రివ్యూ కూడా చూపిస్తుంది. ఇక "క్రియేట్ యువర్ విడ్జెట్" ఫీచర్ ద్వారా యూజర్లు తమ అవసరాలకు తగ్గట్టు కస్టమ్ విడ్జెట్లను తయారు చేసుకోవచ్చు. జీమెయిల్, క్యాలెండర్ వంటి గూగుల్ యాప్ల నుంచి సమాచారాన్ని తీసుకుని వ్యక్తిగత డ్యాష్బోర్డ్ను రూపొందించే సౌకర్యం ఉంటుంది.
వివరాలు
అందుబాటులో క్రోమ్ బ్రౌజర్, గూగుల్ ప్లే స్టోర్
మరోవైపు క్విక్ యాక్సెస్ ఫీచర్ ద్వారా ఆండ్రాయిడ్ ఫోన్లో ఉన్న ఫైళ్లను నేరుగా ల్యాప్టాప్ నుంచే చూడటం, వెతకటం, ఉపయోగించడం సాధ్యమవుతుంది. ఈ గూగుల్బుక్ ల్యాప్టాప్లలో క్రోమ్ బ్రౌజర్, గూగుల్ ప్లే స్టోర్ అందుబాటులో ఉంటాయి. ఇవి కొత్త తరహా ఆపరేటింగ్ సిస్టమ్పై పనిచేయనున్నట్లు గూగుల్ తెలిపింది. ప్రస్తుతం అభివృద్ధిలో ఉన్న అల్యూమినియం ఓఎస్నే దీనిలో ఉపయోగిస్తున్నారా అనే విషయంపై ఇంకా స్పష్టత లేదు.
వివరాలు
జెమినీ ఇంటెలిజెన్స్ కోసం ప్రత్యేకంగా రూపొందించిన తొలి ల్యాప్టాప్
జెమినీ ఇంటెలిజెన్స్ కోసం ప్రత్యేకంగా రూపొందించిన తొలి ల్యాప్టాప్లుగా ఇవి నిలవనున్నాయని కంపెనీ చెబుతోంది. మొదటి తరం గూగుల్బుక్ ల్యాప్టాప్ల తయారీ కోసం గూగుల్, Acer, ASUS, Dell, HP, Lenovo సంస్థలతో భాగస్వామ్యం కుదుర్చుకుంది. ప్రీమియం మెటీరియల్స్తో విభిన్న ఆకారాలు, పరిమాణాల్లో ఈ డివైస్లు రానున్నాయి. అయితే ధరలకు సంబంధించిన వివరాలను మాత్రం ఇంకా వెల్లడించలేదు.