AI Law: ఏఐ మోడళ్లకు ప్రత్యేక భద్రతా నిబంధనలు.. కొత్త చట్టంపై కేంద్రం కసరత్తు
ఈ వార్తాకథనం ఏంటి
ప్రపంచవ్యాప్తంగా ఆర్టిఫిషియల్ ఇంటెలిజెన్స్‌ (ఏఐ) వినియోగం పెరుగుతున్న నేపథ్యంలో, దాని వల్ల తలెత్తే ప్రమాదాలను నియంత్రించేందుకు భారత్‌ కొత్త చట్టాన్ని తీసుకురావాలని యోచిస్తోంది. ముఖ్యంగా అత్యంత శక్తిమంతమైన ఏఐ మోడళ్లకు ప్రత్యేక భద్రతా నిబంధనలు రూపొందించే అవకాశం ఉందని ఎన్డీటీవీ కథనం వెల్లడించింది. ఈ ప్రతిపాదిత చట్టం ప్రకారం, ఏఐ మోడళ్లను ప్రజలకు అందుబాటులోకి తీసుకొచ్చే ముందు వాటిలో తగిన భద్రతా ఏర్పాట్లు ఉన్నాయని డెవలపర్లు నిరూపించాల్సి రావచ్చు. సాఫ్ట్‌వేర్‌లోని లోపాలను గుర్తించడం, అధునాతన సైబర్‌ దాడులకు సహకరించడం వంటి సామర్థ్యాలు కలిగిన ఏఐ వ్యవస్థల వల్ల ఎదురయ్యే ముప్పులను తగ్గించడమే ఈ చర్య ప్రధాన ఉద్దేశం.
వివరాలు
ఏఐ చట్టంపై త్వరలో సంప్రదింపుల పత్రం
కొత్త ఏఐ చట్టానికి సంబంధించి రాబోయే కొన్ని వారాల్లో సంప్రదింపుల పత్రాన్ని విడుదల చేయనున్నట్లు కేంద్ర ఎలక్ట్రానిక్స్‌, ఐటీ శాఖ మంత్రి అశ్విని వైష్ణవ్‌ ప్రకటించారు.
ఈ పత్రంపై పౌర సమాజ ప్రతినిధులు, సామాన్య ప్రజలు, పరిశ్రమల సంస్థలు, ఇతర సంబంధిత వర్గాల నుంచి అభిప్రాయాలు సేకరించనున్నారు.
సాధారణ ఏఐ అప్లికేషన్లకు, అత్యాధునిక సామర్థ్యాలు కలిగిన 'ఫ్రంటియర్‌ మోడళ్లకు' వేర్వేరు నిబంధనలు రూపొందించాలా? అన్నది ఇందులో కీలక అంశంగా మారనుంది.
ఈ ఫ్రంటియర్‌ మోడళ్లు సంక్లిష్టమైన పనులను చేయగలిగినప్పటికీ, వాటిని దుర్వినియోగం చేస్తే తీవ్రమైన ప్రమాదాలు ఎదురయ్యే అవకాశం ఉంది.
వివరాలు
అమెరికా ఏఐ నియంత్రణ విధానాన్ని పరిశీలించే అవకాశం
ఏఐ నియంత్రణ విషయంలో అమెరికా అనుసరించిన విధానాలను భారత్‌ పరిశీలించే అవకాశం ఉంది.
జాతీయ భద్రతకు సంబంధించిన ఆందోళనల నేపథ్యంలో జూన్‌లో ఆంత్రోపిక్‌ సంస్థకు చెందిన మైథోస్‌ 5, ఫేబుల్‌ 5 మోడళ్లపై ఆంక్షలు విధించగా, జులైలో వాటిని ఎత్తివేశారు.
ఈ నేపథ్యంలో కొత్త చట్టానికి సంబంధించిన సంప్రదింపుల పత్రాన్ని రూపొందించేటప్పుడు ఏఐ మోడళ్లను విడుదల చేయడానికి ముందే వాటి సామర్థ్యాలను అంచనా వేయడం, నియంత్రిత వాతావరణంలో పరీక్షించడం, వాటి సామర్థ్యాలకు అనుగుణంగా భద్రతా చర్యలు తీసుకోవడం వంటి అంశాలను కేంద్రం చర్చించే అవకాశం ఉంది.
వివరాలు
ఏఐ మోడళ్లకు ప్రత్యేక పరీక్షలు తప్పనిసరి చేసే యోచన
అత్యంత శక్తిమంతమైన ఏఐ మోడళ్లను విస్తృతంగా అందుబాటులోకి తీసుకురావడానికి ముందు ప్రత్యేక పరీక్షా వాతావరణంలో (శాండ్‌బాక్స్‌) పరీక్షించాలనే నిబంధనను కూడా కేంద్రం పరిశీలిస్తున్నట్లు తెలుస్తోంది.
దీనివల్ల పరిశోధకులు ఆయా మోడళ్ల ప్రవర్తనను అంచనా వేయడంతోపాటు, వాటిలోని లోపాలను ముందుగానే గుర్తించగలుగుతారు.
అలాగే కొన్ని ఏఐ ఫీచర్ల వినియోగాన్ని పరిమితం చేయడం, నిర్దిష్ట వినియోగదారులకు మాత్రమే అనుమతి ఇవ్వడం, మోడల్‌ సామర్థ్యాలు, వాటి వల్ల కలిగే ప్రమాదాలను బట్టి వేర్వేరు భద్రతా చర్యలు అమలు చేయడం వంటి అంశాలపైనా ప్రభుత్వం దృష్టి సారించే అవకాశం ఉంది.
వివరాలు
'ఫ్రంటియర్‌ మోడల్‌'ను ఎలా నిర్వచిస్తారు?
కొత్త చట్టం రూపకల్పనలో 'ఫ్రంటియర్‌ మోడల్‌' అంటే ఏమిటో నిర్ణయించడం కీలక సవాలుగా మారనుంది.
ఏఐ మోడల్‌కు శిక్షణ ఇచ్చేందుకు ఉపయోగించిన కంప్యూటింగ్‌ శక్తి ఆధారంగా ఒక పరిమితిని నిర్ణయించవచ్చు.
అయితే,ఆ మోడల్‌ వాస్తవంగా ఏయే పనులు చేయగలదనే సామర్థ్యాలను కూడా అంచనా వేయాల్సి రావచ్చు.
డిజిటల్‌ వేదికల్లో ప్రచురించే కంటెంట్‌ను నియంత్రించడానికే పరిమితం కాకుండా,ఆ కంటెంట్‌ను సృష్టించే ఏఐ వ్యవస్థలను కూడా ఈ చట్టం పరిధిలోకి తీసుకొచ్చే అవకాశం ఉంది.
ఎందుకంటే కేవలం కంటెంట్‌ను పర్యవేక్షించడం ద్వారా అన్ని ప్రమాదాలను అడ్డుకోలేం.
స్వయంచాలకంగా పనిచేసే ఏఐ ఏజెంట్లు అనుమతి లేకుండా చర్యలు తీసుకోవడం, కీలక మౌలిక సదుపాయాల్లోని భద్రతా లోపాలను గుర్తించేందుకు ఏఐని దుర్వినియోగం చేయడం వంటి ముప్పులను ఎదుర్కోవాల్సి ఉంటుంది.
వివరాలు
డీప్‌ఫేక్‌లు, ఆర్థిక మోసాలపైనా కొత్త చట్టం దృష్టి
ప్రతిపాదిత చట్టం కేవలం అత్యాధునిక ఏఐ మోడళ్లకే పరిమితం కాకపోవచ్చని తెలుస్తోంది.
డీప్‌ఫేక్‌లు, ఆర్థిక మోసాలు, ఇతరుల పేరుతో మోసాలకు పాల్పడటం, మానసికంగా హాని కలిగించడం వంటి సమస్యలను కూడా ఇందులో చేర్చే అవకాశం ఉంది.
ఏఐ సాయంతో రూపొందించిన కంటెంట్‌ను, వాస్తవమైన సమాచారాన్ని వేరు చేయడం రోజురోజుకూ కష్టంగా మారుతోంది.
ఈ నేపథ్యంలో ప్రజలను తప్పుదోవ పట్టించే కంటెంట్‌ వ్యాప్తిని అరికట్టడం కూడా ప్రభుత్వానికి ముఖ్యమైన అంశంగా మారనుంది.
కొత్త చట్టంపై జరగనున్న సంప్రదింపుల్లో డీప్‌ఫేక్‌లు, ఆర్థిక మోసాలు, మానసిక హాని వంటి అంశాలను పరిశీలించే అవకాశం ఉందని అధికారులు వెల్లడించినట్లు ఎన్డీటీవీ పేర్కొంది.