Instagram: యూట్యూబ్‌కి పోటీగా మెటా సరికొత్త ప్లాన్‌...ఇన్‌స్టాలో 90 నిమిషాల వీడియోలు
ఈ వార్తాకథనం ఏంటి
ఇప్పటివరకు ఇన్‌స్టాగ్రామ్‌ అంటే చిన్న చిన్న రీల్స్‌.. నిమిషాల్లో చూసేసే వీడియోలే గుర్తొచ్చేవి. కానీ ఇకపై అదే ప్లాట్‌ఫామ్‌లో గంటన్నర నిడివి ఉన్న వీడియోలు చూసే అవకాశం రానుంది. పాడ్‌కాస్ట్‌లు, కామెడీ షోలు, ఇంటర్వ్యూల వంటి సుదీర్ఘ కంటెంట్‌ను అందించేందుకు మెటా కొత్త వీడియో ఫార్మాట్‌ను పరీక్షిస్తున్నట్లు సమాచారం. ఈ మార్పు అమల్లోకి వస్తే, చిన్న వీడియోలకే పరిమితమైన ఇన్‌స్టాగ్రామ్‌.. యూట్యూబ్‌ వంటి ప్లాట్‌ఫామ్‌లకు మరింత గట్టి పోటీ ఇచ్చే అవకాశం ఉంది.
Details
'ఫీచర్స్‌' పేరుతో కొత్త ఫార్మాట్
ఈ కొత్త వీడియో ఫార్మాట్‌కు 'ఫీచర్స్‌' అని పేరు పెట్టినట్లు తెలుస్తోంది.
దీని ద్వారా క్రియేటర్లు గరిష్ఠంగా 90 నిమిషాల నిడివి ఉన్న వీడియోలను అడ్డంగా ఉండే ఫార్మాట్‌లో అప్‌లోడ్‌ చేయవచ్చు.
ప్రస్తుతం అమెరికాలో ఎంపిక చేసిన క్రియేటర్లతో ఈ సదుపాయాన్ని పరీక్షిస్తున్నారు. బ్రెజిల్‌లోనూ ప్రయోగాలు చేసినట్లు సమాచారం.
అయితే, ఈ ఫీచర్‌ను ఎప్పుడు ప్రపంచవ్యాప్తంగా అందుబాటులోకి తీసుకొస్తారనే దానిపై స్పష్టత లేదు.
Details
చిన్న రీల్‌ నుంచి పూర్తి వీడియోకు
ఈ ఫీచర్‌లో క్రియేటర్లకు మరో ప్రయోజనం ఉంది. సుదీర్ఘ వీడియోలోని ఆసక్తికరమైన భాగాలను చిన్న రీల్స్‌గా పోస్ట్‌ చేయవచ్చు.
ఆ క్లిప్‌ చూసి ఆసక్తి కలిగినవారు దానిపై క్లిక్‌ చేసి పూర్తి వీడియోను వీక్షించవచ్చు.
దీంతో కొత్త ప్రేక్షకులను ఆకర్షించేందుకు క్రియేటర్లకు మరో మార్గం ఏర్పడుతుంది.
పాడ్‌కాస్ట్‌లు, ఇంటర్వ్యూలు, కామెడీ షోలు వంటి కంటెంట్‌కు ఈ విధానం ఉపయోగపడవచ్చు.
పూర్తి నిడివి వీడియోలు ఫీడ్‌, ఎక్స్‌ప్లోర్‌ విభాగాల్లోనూ కనిపించేలా ఏర్పాట్లు చేస్తున్నట్లు సమాచారం.
Details
క్రియేటర్ల ఆదాయంపై ఇంకా స్పష్టత లేదు
వీడియోల నిడివి పెరుగుతున్నా, వాటి ద్వారా వచ్చే ప్రకటనల ఆదాయంలో క్రియేటర్లకు వాటా ఇచ్చే విధానాన్ని ఇన్‌స్టాగ్రామ్‌ ఇంకా ప్రకటించలేదు.
ఇప్పటికే బ్రాండ్లతో ఒప్పందాలు చేసుకున్న క్రియేటర్లు వాటిని కొనసాగించవచ్చని తెలుస్తోంది.
భవిష్యత్తులో కొత్త ఆదాయ మార్గాలు అందుబాటులోకి వస్తాయా అన్నది చూడాలి.
ఈ మార్పు ద్వారా మెటా ఇన్‌స్టాగ్రామ్‌ను కేవలం రీల్స్‌ యాప్‌గా కాకుండా, విభిన్న రకాల వీడియోలకు వేదికగా మార్చాలని చూస్తున్నట్లు అర్థమవుతోంది.
అయితే, 90 నిమిషాల వీడియోలను అనుమతించడం మాత్రమే విజయానికి సరిపోదు.
వీడియోలను ప్రేక్షకులకు చేరవేయడం, క్రియేటర్లకు ఆదాయం కల్పించడం, వీక్షకులను ఎక్కువసేపు ప్లాట్‌ఫామ్‌లో ఉంచడం కూడా కీలకం.