iPhone 18 : ఐఫోన్ 18 ప్రో కొత్త లుక్ లీక్.. డార్క్ చెర్రీ కలర్తో అదిరిపోయే డిజైన్!
ఈ వార్తాకథనం ఏంటి
ఆపిల్ ప్రతిష్ఠాత్మక ఐఫోన్ 18 ప్రో సిరీస్ విడుదలకు ఇంకా కొన్ని నెలల సమయం ఉన్నప్పటికీ, ఈ ఫ్లాగ్షిప్ స్మార్ట్ఫోన్కు సంబంధించిన లీకులు ఇప్పటికే టెక్ ప్రపంచంలో ఆసక్తి రేకెత్తిస్తున్నాయి. కొత్త కలర్ వేరియంట్లు, డిజైన్ మార్పులపై గతంలో వచ్చిన లీకుల తర్వాత తాజాగా 'డార్క్ చెర్రీ' కలర్లో ఐఫోన్ 18 ప్రో మోడల్ కనిపించినట్లు సమాచారం. ఈ ఏడాది ఐఫోన్ సిరీస్లో ఈ కలర్ ప్రత్యేక ఆకర్షణగా నిలిచే అవకాశముందని టెక్ వర్గాలు భావిస్తున్నాయి.
వివరాలు
కొత్త కలర్ ఆప్షన్లు ఇవే
ప్రముఖ టిప్స్టర్ జాన్ రెట్టింగర్ సోషల్ మీడియా వేదిక 'ఎక్స్'లో ఐఫోన్ 18 ప్రో సిరీస్కు సంబంధించిన లీక్ చిత్రాలను పంచుకున్నారు. అందులో డార్క్ చెర్రీ, లైట్ బ్లూ, బ్లాక్ రంగుల్లో ఫోన్ కనిపించింది. ఈ చిత్రాలను తాను ఎలాంటి ఆర్టిఫిషియల్ ఇంటెలిజెన్స్ (AI) సహాయంతో రూపొందించలేదని, ఎడిట్ చేయలేదని ఆయన స్పష్టం చేశారు. ఇదివరకే మ్యాక్వరల్డ్ విడుదల చేసిన లీక్ల ప్రకారం ఐఫోన్ 18 ప్రో మ్యాక్స్ నాలుగు రంగుల్లో అందుబాటులోకి రానున్నట్లు సమాచారం. డార్క్ చెర్రీ, లైట్ బ్లూ, డార్క్ గ్రే, సిల్వర్ కలర్ వేరియంట్లు వినియోగదారులకు అందుబాటులో ఉండనున్నాయి.
వివరాలు
మరింత మందంగా మారనున్న ప్రో మ్యాక్స్
అలాగే యూట్యూబ్ ఛానెల్ 'మ్యాక్స్ టెక్'కు చెందిన వడిమ్ యుర్యేవ్ కూడా ఐఫోన్ 18 ప్రో సిరీస్కు సంబంధించిన డమ్మీ యూనిట్ చిత్రాలను ఇటీవల షేర్ చేశారు. డిస్ప్లే పరిమాణాల్లో మాత్రం ఆపిల్ పెద్దగా మార్పులు చేయకపోవచ్చని తెలుస్తోంది. ఐఫోన్ 18 ప్రోలో 6.3అంగుళాల స్క్రీన్, ఐఫోన్ 18ప్రో మ్యాక్స్లో 6.9అంగుళాల పెద్ద డిస్ప్లే ఉండే అవకాశం ఉంది. అయితే ఫోన్ ముందు భాగంలో గణనీయమైన మార్పులు కనిపించవచ్చు. ఫేస్ ఐడీకి సంబంధించిన మరిన్ని భాగాలను డిస్ప్లే కింద అమర్చడం ద్వారా డైనమిక్ ఐలాండ్ పరిమాణాన్ని తగ్గించేందుకు ఆపిల్ ప్రయత్నిస్తున్నట్లు సమాచారం. దీంతో ప్రస్తుతం ఉన్న మోడళ్లతో పోలిస్తే కెమెరా కటౌట్ సుమారు 35 శాతం వరకు చిన్నదిగా మారవచ్చని లీకులు సూచిస్తున్నాయి.
వివరాలు
కెమెరాలో కొత్త టెక్నాలజీ
ఐఫోన్ 18 ప్రో సిరీస్లో కూడా మూడు 48 మెగాపిక్సెల్ కెమెరాలతో కూడిన ట్రిపుల్ రియర్ కెమెరా సెటప్ కొనసాగనుంది. అయితే ప్రధాన కెమెరాలో మెకానికల్ వేరియబుల్ అపర్చర్ లెన్స్ను ఆపిల్ తొలిసారిగా అందించే అవకాశముంది. ఈ సాంకేతికత ద్వారా వినియోగదారులు పరిస్థితులకు అనుగుణంగా కెమెరా సెన్సార్లోకి ప్రవేశించే కాంతి పరిమాణాన్ని నియంత్రించగలరు. దీని వల్ల తక్కువ వెలుతురులో మెరుగైన ఫొటోలు తీయడంతో పాటు పోర్ట్రెయిట్ ఫొటోలలో మరింత సహజమైన బ్యాక్గ్రౌండ్ బ్లర్ లభించే అవకాశం ఉంది.
వివరాలు
కొత్త A20 ప్రో చిప్సెట్
పనితీరు పరంగా ఐఫోన్ 18 ప్రో సిరీస్కు ఆపిల్ కొత్త A20 ప్రో చిప్సెట్ శక్తినివ్వనుంది. ఈ ప్రాసెసర్ను టీఎస్ఎంసీ (TSMC) 2నానోమీటర్ తయారీ సాంకేతికతతో రూపొందించనున్నట్లు సమాచారం. దీంతో పనితీరు 15 శాతం వరకు మెరుగుపడగా, విద్యుత్ వినియోగ సామర్థ్యం 30 శాతం వరకు పెరిగే అవకాశముందని నివేదికలు చెబుతున్నాయి. అదనంగా, టీఎస్ఎంసీ అభివృద్ధి చేసిన 'వేఫర్ లెవల్ మల్టీ-చిప్ మాడ్యూల్' టెక్నాలజీని కూడా ఆపిల్ ఉపయోగించే అవకాశం ఉందని ప్రచారం జరుగుతోంది. దీని ద్వారా ర్యామ్ను ప్రాసెసర్కు మరింత దగ్గరగా అమర్చడం సాధ్యమవుతుంది. ఫలితంగా 'ఆపిల్ ఇంటెలిజెన్స్' ఫీచర్ల పనితీరు మెరుగుపడటంతో పాటు ఫోన్లో అదనపు అంతర్గత స్థలం కూడా లభించే అవకాశం ఉందని టెక్ నిపుణులు అంచనా వేస్తున్నారు.