Elon Musk: భారత్‌కు అసలైన బాస్‌ అంబానీనా? స్టార్‌లింక్‌ అనుమతులపై మస్క్‌ ప్రశ్న
ఈ వార్తాకథనం ఏంటి
శాటిలైట్‌ ఇంటర్నెట్‌ సేవలకు అనుమతుల వ్యవహారం భారత్‌ ప్రభుత్వం, స్టార్‌లింక్‌ అధిపతి ఎలాన్‌ మస్క్‌ మధ్య వివాదానికి దారితీసింది. భారత్‌లో స్టార్‌లింక్‌ సేవలు ప్రారంభం కాకుండా కొందరు దేశీయ పారిశ్రామికవేత్తలు అడ్డుకుంటున్నారంటూ మస్క్‌ చేసిన ఆరోపణలను కేంద్ర ప్రభుత్వం తీవ్రంగా ఖండించింది. దేశంలోని అన్ని శాటిలైట్‌ కమ్యూనికేషన్‌ (శాట్‌కామ్‌) సంస్థలకు ఒకే తరహా నియంత్రణ, భద్రతా నిబంధనలు వర్తింపజేస్తున్నామని స్పష్టం చేసింది. మస్క్‌ వ్యాఖ్యలు నిరాధారమైనవని, తప్పుడు అవగాహనతో చేసినవని టెలికాం విభాగం పేర్కొంది.
వివరాలు
మూడు సంస్థలకు లైసెన్సులు
భారత్‌లో శాటిలైట్‌ కమ్యూనికేషన్‌ సేవలు ప్రారంభించేందుకు స్టార్‌లింక్‌, జియో శాట్‌కామ్‌, యుటెల్‌శాట్‌ వన్‌వెబ్‌ సంస్థలకు ప్రభుత్వం ఇప్పటికే లైసెన్సులు మంజూరు చేసింది.
అయితే, ఈ మూడు సంస్థల్లో ఏదీ ఇప్పటివరకు వాణిజ్య సేవలను ప్రారంభించలేదని కేంద్ర ప్రభుత్వం వెల్లడించింది.
అనుమతుల ప్రక్రియ ఇంకా కొనసాగుతోందని తెలిపింది. ప్రస్తుతం భద్రతాపరమైన అనుమతుల ప్రక్రియ కేంద్ర హోం శాఖ పరిశీలనలో ఉందని కేంద్ర మంత్రి పెమ్మసాని చంద్రశేఖర్‌ తెలిపారు.
ఈ విషయంలో ఏ ఒక్క సంస్థకు అనుకూలంగా లేదా వ్యతిరేకంగా ప్రభుత్వం వ్యవహరించడం లేదని స్పష్టం చేశారు.
అన్ని సంస్థలకూ ఒకే విధమైన నిబంధనలు వర్తిస్తాయని పేర్కొన్నారు. మరోవైపు, ఈ వివాదంపై స్పందించేందుకు జియో ప్లాట్‌ఫామ్స్‌ ఎండీ ఆకాశ్‌ అంబానీ నిరాకరించారు.
వివరాలు
రాహుల్‌గాంధీ స్పందన
స్టార్‌లింక్‌ అనుమతుల వ్యవహారంపై కాంగ్రెస్‌ అగ్రనేత, లోక్‌సభలో ప్రతిపక్ష నేత రాహుల్‌ గాంధీ కూడా స్పందించారు.
'అసలైన బాస్‌గా వ్యవహరించే మరో వ్యక్తిని మీరు కనుగొంటారని ఆశిస్తున్నా' అంటూ ఎలాన్‌ మస్క్‌ను ఉద్దేశించి ఎక్స్‌లో వ్యాఖ్యానించారు.
దీనికి మస్క్‌ స్పందిస్తూ.. 'ఆందోళనకరంగా ఉన్న అంశంపై స్పందించినందుకు కృతజ్ఞతలు' అని రాహుల్‌ గాంధీకి బదులిచ్చారు.
శాటిలైట్‌ ఇంటర్నెట్‌ సేవల అనుమతుల చుట్టూ మొదలైన ఈ వివాదం ఇప్పుడు కేంద్ర ప్రభుత్వం, దేశీయ పారిశ్రామికవేత్తలు, అంతర్జాతీయ వ్యాపారవేత్తల మధ్య చర్చనీయాంశంగా మారింది.