Nasa: చంద్రుడిపై ల్యాండింగ్ మరోసారి వాయిదా..? ఆర్టెమిస్-3ను భూ కక్ష్య పరీక్షా మిషన్గా మార్చనున్న నాసా!
ఈ వార్తాకథనం ఏంటి
అమెరికా అంతరిక్ష సంస్థ నాసా చేపట్టిన ప్రతిష్టాత్మక ఆర్టెమిస్ కార్యక్రమంలో కీలక మార్పులు చోటుచేసుకునే అవకాశాలు కనిపిస్తున్నాయి. చంద్రుడిపై మానవులను మళ్లీ దింపేందుకు సిద్ధం చేసిన ఆర్టెమిస్-3 మిషన్ను నాసా ప్రత్యక్ష మూన్ ల్యాండింగ్ మిషన్గా కాకుండా భూ కక్ష్యలో పరీక్షలు నిర్వహించే మిషన్గా మార్చే ఆలోచనలో ఉన్నట్లు సమాచారం. ప్రస్తుతం 2027లో ప్రయోగించేందుకు లక్ష్యంగా పెట్టుకున్న Artemis III మిషన్ ద్వారా అపోలో యుగం తర్వాత మరోసారి వ్యోమగాములను చంద్రుడిపై దింపాలని నాసా మొదట ప్రణాళిక రూపొందించింది. అయితే తాజా సమాచారం ప్రకారం చంద్రుడిపై దిగే ప్రక్రియను వాయిదా వేసి, ముందుగా అంతరిక్ష నౌకల సామర్థ్యాలను పరీక్షించడంపై దృష్టి పెట్టే అవకాశముంది.
వివరాలు
భారీగా ప్రైవేట్ కంపెనీలపై ఆధారపడుతున్న నాసా
ఈ మిషన్లో భాగంగా వ్యోమగాములు భూ కక్ష్యలోనే ప్రైవేట్ కంపెనీలు తయారు చేస్తున్న ప్రయోగాత్మక మూన్ ల్యాండర్లను పరిశీలించే అవకాశం ఉంది. ఇందులో స్పేస్-X రూపొందిస్తున్న స్టార్షిప్, బ్లూ ఆరిజిన్ తయారు చేస్తున్న బ్లూ మూన్ ల్యాండర్లు ఉన్నాయి. భవిష్యత్తులో చంద్రయానాలకు ఉపయోగించే ఈ వాహనాలు అంతరిక్షంలో ఎలా పనిచేస్తాయో ముందుగా పరీక్షించాలని నాసా భావిస్తోంది. చంద్రుడిపై ల్యాండింగ్ను వాయిదా వేయడానికి ప్రధాన కారణం ప్రైవేట్ కంపెనీల సాంకేతిక వ్యవస్థలకు మరింత సమయం ఇవ్వడమేనని తెలుస్తోంది. ఆర్టెమిస్ ప్రోగ్రామ్లో భవిష్యత్ చంద్రయానాల కోసం నాసా భారీగా ప్రైవేట్ కంపెనీలపై ఆధారపడుతోంది. దీంతో తొందరపడి ల్యాండింగ్ చేయడం కంటే ముందుగా సాంకేతిక పరీక్షలను పూర్తి చేయాలని నిర్ణయించినట్లు సమాచారం.
వివరాలు
ఆర్టెమిస్-3 మిషన్లో కీలక పరీక్షలు
మూన్ ల్యాండింగ్ లేకపోయినా ఆర్టెమిస్-3 మిషన్లో కీలక పరీక్షలు కొనసాగనున్నాయి. దీర్ఘకాల వ్యోమగాముల జీవన సహాయక వ్యవస్థలు, మరింత బలమైన ఓరియన్ స్పేస్క్రాఫ్ట్ హీట్ షీల్డ్, కొత్త నాన్-ప్రొపల్సివ్ స్పేసర్ స్ట్రక్చర్ వంటి సాంకేతిక వ్యవస్థలను నాసా పరీక్షించనుంది. పాత ఐసీపీఎస్ వ్యవస్థకు బదులుగా కొత్త నిర్మాణాన్ని ఉపయోగించనున్నారు. ఇప్పటికే ఎస్ఎల్ఎస్ రాకెట్ కోర్ స్టేజ్, ఓరియన్ సర్వీస్ మాడ్యూల్ తయారీ పనులు వేగంగా సాగుతున్నాయి.
వివరాలు
2028లో ఆర్టెమిస్-4 ప్రయోగం
2027లో ఫ్లోరిడాలోని కెన్నెడీ అంతరిక్ష కేంద్రం నుంచి నాలుగు మంది వ్యోమగాములతో ఆర్టెమిస్-3 మిషన్ ప్రయోగించనున్నట్లు సమాచారం. ఈ మిషన్ భూమికి సుమారు 460 కిలోమీటర్ల ఎత్తులో పరీక్షల కోసం ప్రయాణించనుంది. ఇక అసలు చంద్రుడిపై మానవుల ల్యాండింగ్ను Artemis IV మిషన్కు మార్చే అవకాశం ఉన్నట్లు అంతర్జాతీయ మీడియా కథనాలు చెబుతున్నాయి. ప్రస్తుతం ఆర్టెమిస్-4ను 2028 ప్రారంభంలో ప్రయోగించేందుకు లక్ష్యంగా పెట్టుకున్నారు.