Tilcayo: 100 ఏళ్ల తర్వాత కొత్త అడవి పిల్లి జాతి గుర్తింపు .. టిల్కాయోగా నామకరణం
ఈ వార్తాకథనం ఏంటి
దక్షిణ అమెరికాలోని బొలీవియాలో అరుదైన కొత్త అడవి పిల్లి జాతిని శాస్త్రవేత్తలు అధికారికంగా గుర్తించారు. యుంగాస్ మేఘారణ్యంలో కనిపించే ఈ చిన్న పిల్లికి స్థానికంగా పిలిచే పేరును ఆధారంగా చేసుకుని లెపార్డస్ టిల్కాయో (Leopardus tilcayo) అని నామకరణం చేశారు. వందేళ్లకు పైగా కాలం తర్వాత గుర్తించి, పేరు పెట్టిన తొలి కొత్త జీవ ఫెలైన్ జాతి ఇదేనని పరిశోధకులు తెలిపారు. ఈ పరిశోధన వివరాలు గురువారం కరెంట్ బయాలజీ జర్నల్లో ప్రచురితమయ్యాయి.
వివరాలు
పులి పిల్లుల సమూహానికి చెందిన టిల్కాయో
టిల్కాయో దక్షిణ అమెరికాకు చెందిన చిన్న అడవి పిల్లి జాతి. ఇది ఆండీస్ పర్వతాల తూర్పు వాలుపై ఉన్న యుంగాస్ అడవుల్లో జీవిస్తుంది.
ఈ ప్రాంతంలో తరచూ మేఘాలు కమ్ముకుని ఉండటంతోపాటు తేమ అధికంగా ఉంటుంది.
టిల్కాయో పొడవు సుమారు 46 సెంటీమీటర్లు, బరువు దాదాపు 1.4 కిలోలు మాత్రమే ఉంటుంది.
అంటే సాధారణంగా ఇంట్లో పెంచుకునే పిల్లి కంటే కూడా ఇది చిన్నది.
దీని శరీరంపై లేత గోధుమ రంగు వెంట్రుకలు, క్రమం లేని గుండ్రటి మచ్చలు ఉంటాయి. చెవులు చిన్నగా, గుండ్రంగా ఉండగా.. మీసాలు పొడవుగా ఉంటాయి.
వివరాలు
2016లో వెలుగులోకి వచ్చిన అరుదైన పిల్లి
టిల్కాయో గుర్తింపు కథ 2016లో ప్రారంభమైంది. బొలీవియా జీవశాస్త్రవేత్త, నేషనల్ జియోగ్రాఫిక్ ఎక్స్ప్లోరర్ పావోలా నొగాలెస్-అస్కర్రున్స్ను ఓ వన్యప్రాణి సంరక్షణ కేంద్రం సంప్రదించింది.
ఓ అసాధారణమైన పిల్లి గురించి ఆమెకు సమాచారం అందింది.
అడవి సమీపంలోని రహదారి పక్కన ఓ స్థానిక వ్యక్తికి ఈ పిల్లి చిన్న వయసులో కనిపించింది.
తొలుత దాన్ని ఇంటి పిల్లిగానే భావించి ఏడాది పాటు తన వద్ద ఉంచుకున్నాడు.
అయితే అది అడవి జంతువని గుర్తించి సేందా వెర్డే వన్యప్రాణి సంరక్షణ కేంద్రానికి అప్పగించాడు.
వివరాలు
జన్యు పరిశోధనలతో ప్రత్యేక జాతిగా నిర్ధారణ
మొదట ఈ పిల్లి పులి పిల్లుల సమూహానికి చెందినదని నొగాలెస్-అస్కర్రున్స్ భావించారు.
అప్పట్లో దీనిని Leopardus tigrinusలో భాగంగా పరిగణించేవారు.
అయితే 2019లో దీని శరీరంపై ఉన్న మచ్చలు, ముఖ్యంగా బ్రెజిల్ పులి పిల్లుల చిత్రాలతో పోల్చినప్పుడు, భిన్నంగా ఉన్నట్లు ఆమె గుర్తించారు.
దీంతో మరింత పరిశోధన చేపట్టారు. దక్షిణ అమెరికాలోని 38 పిల్లుల నుంచి సేకరించిన జన్యు సమాచారాన్ని విశ్లేషించగా.. బొలీవియాలోని ఈ పిల్లి ప్రత్యేక పరిణామ వంశానికి చెందినదని నిర్ధారణ అయింది.
ఇతర పులి పిల్లుల నుంచి సుమారు 14 లక్షల ఏళ్ల క్రితమే ఈ వంశం విడిపోయినట్లు పరిశోధకులు తెలిపారు.
వివరాలు
జనాభా, ఆహారంపై ఇంకా స్పష్టత లేదు
ప్రస్తుతం టిల్కాయోకు సంబంధించి పరిశోధకుల వద్ద కేవలం రెండు జీవించి ఉన్న పిల్లుల సమాచారం, కొన్ని కెమెరా ట్రాప్ చిత్రాలు మాత్రమే ఉన్నాయి.
వాటిలో ఒకటి పదేళ్ల వయసున్న మగ పిల్లి. స్థానిక కుటుంబం వద్ద కొంతకాలం ఉన్న ఈ పిల్లి ప్రస్తుతం సేందా వెర్డే సంరక్షణ కేంద్రంలో ఉంది.
ఈ జాతి మొత్తం జనాభా ఎంత, ఏ ప్రాంతాల్లో విస్తరించి ఉంది, ఎలా సంతానోత్పత్తి చేస్తుంది, పూర్తిస్థాయిలో ఎలాంటి ఆహారం తీసుకుంటుంది వంటి అంశాలపై శాస్త్రవేత్తలకు ఇంకా పూర్తి సమాచారం లేదు.
అయితే దీని విసర్జనలో కనిపించిన ఎలుకల అవశేషాలను బట్టి.. చిన్న ఎలుకలు ఆహారంలో భాగమై ఉండొచ్చని భావిస్తున్నారు.
వివరాలు
సంరక్షణ స్థితిపై తదుపరి సమీక్షలో నిర్ణయం
అంతర్జాతీయ ప్రకృతి పరిరక్షణ సమాఖ్య (IUCN) ప్రస్తుతం పులి పిల్లుల సమూహాన్ని అంతరించిపోయే ప్రమాదం ఉన్న, జనాభా తగ్గుతున్న జాతిగా అంచనా వేస్తోంది.
టిల్కాయోపై తమ పరిశోధన వివరాలను శాస్త్రవేత్తలు IUCNకు అందించారు.
తదుపరి సమీక్షలో పులి పిల్లుల ఐదు పరిణామ వంశాలను విడివిడిగా అంచనా వేయనున్నారు.
దీనివల్ల ప్రతి వంశం ఎదుర్కొంటున్న ప్రమాదాలపై మరింత స్పష్టత వచ్చే అవకాశం ఉంది.
టిల్కాయోను ప్రత్యేకంగా పరిశీలిస్తే.. అంతరించిపోయే ప్రమాదం ఎక్కువగా ఉన్న జాతిగా గుర్తించే అవకాశం ఉందని పరిశోధకులు తెలిపారు.