Netflix Clips: స్క్రోల్ చేస్తే చాలు.. చూడాల్సిన కంటెంట్ మీ ముందే.. నెట్ఫ్లిక్స్ కొత్త ప్లాన్
ఈ వార్తాకథనం ఏంటి
ఓటీటీ ప్లాట్ఫారమ్లలో సినిమాలు, వెబ్ సిరీస్లు చూస్తూ గంటల కొద్దీ కూర్చోవడం ప్రేక్షకులకు అలవాటైంది. కానీ ఇప్పుడు ఆ ట్రెండ్ మారుతోంది. మొబైల్లో చిన్న చిన్న వీడియోలు చూస్తూ స్క్రోల్ చేసే అలవాటు పెరిగిన నేపథ్యంలో, నెట్ ఫ్లిక్స్ కొత్త ఫీచర్తో ముందుకు వచ్చింది. ప్రేక్షకులకు తాము తర్వాత ఏమి చూడాలి అన్న సందేహాన్ని సులభంగా తీర్చేందుకు నెట్ఫ్లిక్స్ "క్లిప్స్" అనే కొత్త ఫీచర్ను తీసుకొచ్చింది. ఇది మొబైల్ యాప్లో రీల్ల మాదిరిగా స్క్రోల్ అవుతూ ఉండే వర్టికల్ వీడియో ఫీడ్. షార్ట్ వీడియో ప్లాట్ఫారమ్లలో చూసే స్టైల్లోనే ఇది కనిపిస్తుంది. ఇందులో డాన్స్ వీడియోలు లేదా వైరల్ క్లిప్స్ కాకుండా, సినిమాలు, సిరీస్ల నుంచి ఎంపిక చేసిన వీడియో భాగాలను చూపిస్తుంది.
వివరాలు
మొబైల్ యాప్లో ప్రత్యేక ట్యాబ్
ఈ క్లిప్స్ ఫీచర్ ప్రధానంగా "తర్వాత ఏమి చూడాలి?" అనే సమస్యకు పరిష్కారంగా రూపొందించారు. ఇప్పటివరకు యూజర్లు పోస్టర్లు లేదా వివరాలు చూసి ఎంపిక చేసుకోవాల్సి వచ్చేది. కానీ ఇప్పుడు వారి అభిరుచులకు అనుగుణంగా షార్ట్ వీడియోల రూపంలో కంటెంట్ చూపించబడుతుంది. ఏదైనా క్లిప్ నచ్చితే, వెంటనే ఆ పూర్తి సినిమా లేదా సిరీస్ను ఓపెన్ చేయవచ్చు. లేదా వాచ్లిస్ట్లో సేవ్ చేసుకోవచ్చు. ఈ ఫీచర్ మొబైల్ యాప్లో ప్రత్యేక ట్యాబ్గా అందుబాటులో ఉంటుంది. అలాగే ఈ క్లిప్స్ను ఫ్రెండ్స్కు షేర్ చేయడం లేదా సోషల్ మీడియా ప్లాట్ఫారమ్లలో పోస్ట్ చేయడానికి కూడా ఆప్షన్ ఉంటుంది.
వివరాలు
మరింత విస్తరించనున్న ఫీచర్లు..
మీ యాప్లో ఈ కొత్త అప్డేట్ కనిపించకపోతే ఆందోళన అవసరం లేదు. నెట్ఫ్లిక్స్ ఈ ఫీచర్ను దశలవారీగా విడుదల చేస్తోంది. త్వరలోనే అందరికీ అందుబాటులోకి రానుంది. మొబైల్లో కంటెంట్ వినియోగించే విధానం మారుతున్న నేపథ్యంలో ఈ మార్పు వచ్చింది. ప్రయాణంలో లేదా ఫ్రీ టైమ్లో పెద్ద ఎపిసోడ్ చూడడం కంటే, చిన్న వీడియోలు చూసే అలవాటు పెరిగింది. అలాంటి చిన్న క్షణాల నుంచి పూర్తి కంటెంట్ చూసేలా ప్రేక్షకులను ఆకర్షించే వంతెనలా ఈ క్లిప్స్ పనిచేస్తుంది. ప్రస్తుతం ఈ ఫీచర్ నెట్ఫ్లిక్స్లో ఉన్న సినిమాలు, సిరీస్ల క్లిప్స్కే పరిమితమైనా, భవిష్యత్తులో మరింత విస్తరించనుంది.