EU battery rules: గేమర్లకు గుడ్న్యూస్.. స్విచ్ 2లో రీప్లేసబుల్ బ్యాటరీ సదుపాయం
ఈ వార్తాకథనం ఏంటి
యూరోపియన్ యూనియన్ (EU) కొత్త బ్యాటరీ నిబంధనలకు అనుగుణంగా నింటెండో తన స్విచ్ 2 గేమింగ్ కన్సోల్లో కీలక మార్పులు చేయనుంది. వినియోగదారులు స్వయంగా మార్చుకునేలా బ్యాటరీ ఉండే కొత్త వెర్షన్ను విడుదల చేయాలని కంపెనీ నిర్ణయించింది. ఈ మార్పు ఈయూ తీసుకొచ్చిన కొత్త నిబంధనల నేపథ్యంలో చేపడుతోంది. యూజర్-రిప్లేసబుల్ బ్యాటరీలకు సంబంధించిన ఈ నిబంధనలు 2027 ఫిబ్రవరి 18 నుంచి అమల్లోకి రానున్నాయి. ఈ మేరకు నింటెండో తన అధికారిక వెబ్సైట్లో ప్రకటన విడుదల చేసింది. కొత్త నిబంధనలకు అనుగుణంగా ఉత్పత్తుల ప్రత్యేక వెర్షన్లను సిద్ధం చేస్తున్నామని కంపెనీ తెలిపింది.
వివరాలు
ఈయూ నిబంధనలు ఇవే..
అయితే కొత్త స్విచ్ 2లో బ్యాటరీ మార్పిడి ప్రక్రియను ఎలా సులభతరం చేయనున్నదనే విషయంపై నింటెండో ఇంకా పూర్తి వివరాలు వెల్లడించలేదు. ప్రస్తుతం స్విచ్ 2లో బ్యాటరీని తొలగించడం అనేది అనేక దశలతో కూడిన క్లిష్టమైన ప్రక్రియగా ఉందని ప్రముఖ రిపేర్ వెబ్సైట్ iFixit పేర్కొంది. ఈయూ నిబంధనల ప్రకారం హ్యాండ్హెల్డ్ గేమింగ్ కన్సోళ్లతో పాటు పలు ఎలక్ట్రానిక్ పరికరాల్లో బ్యాటరీలను సులభంగా మార్చుకునే సౌకర్యం ఉండాలి. దీంతో నింటెండో కూడా తన ఉత్పత్తులను కొత్త ప్రమాణాలకు అనుగుణంగా మార్చేందుకు సిద్ధమవుతోంది.
వివరాలు
మార్కెట్లోకి రానున్న కొత్త వెర్షన్లు..
ఇక కొత్త నిబంధనలకు అనుగుణంగా విడుదలయ్యే స్విచ్ 2 వెర్షన్లకు ప్రత్యేక మోడల్ నంబర్లు ఉంటాయని కంపెనీ వెల్లడించింది. అలాగే ప్యాకేజింగ్పై అదనంగా 'OSM' అనే కోడ్ కనిపిస్తుందని తెలిపింది. నియంత్రణ పరమైన అవసరాల కోసం వీటిని ప్రత్యేక ఉత్పత్తులుగా గుర్తించేందుకు ఈ మార్పు చేస్తున్నట్లు పేర్కొంది. ప్రస్తుతం 'BEE'తో ప్రారంభమయ్యే మోడల్ నంబర్ల కింద ఉన్న ఉత్పత్తులను నింటెండో ప్రత్యేకంగా ప్రస్తావించింది. వీటిలో స్విచ్ 2 కన్సోల్తో పాటు ప్రో కంట్రోలర్, జాయ్-కాన్స్ వంటి కంట్రోలర్లు కూడా ఉన్నాయి. కొత్త నిబంధనలకు అనుగుణంగా వచ్చే వెర్షన్లు వీటి నుంచి వేరు గుర్తింపుతో మార్కెట్లోకి రానున్నాయి.