Nvidia Data Leak: ఎన్విడియాపై కన్నేసిన హ్యాకర్లు...10 రోజుల్లో డేటా లీక్ చేస్తామని బెదిరింపులు
ఈ వార్తాకథనం ఏంటి
ప్రపంచంలోని ప్రముఖ చిప్ తయారీ సంస్థ ఎన్విడియా (Nvidia) ఇప్పుడు రాన్సమ్వేర్ గ్రూప్ హెచ్చరికతో వార్తల్లోకి వచ్చింది. 'ది జెంటిల్మెన్' (The Gentlemen) అనే సైబర్క్రైమ్ గ్రూప్ తమ డార్క్వెబ్ లీక్ సైట్లో ఎన్విడియా పేరును చేర్చింది. సంస్థకు చెందిన డేటాను దొంగిలించామని ఆరోపిస్తూ, దాన్ని 10 రోజుల్లోపు బయటపెడతామని బెదిరించింది. ప్రస్తుతం అక్కడ కనిపిస్తున్న కౌంట్డౌన్ 234 గంటలుగా ఉంది. అంటే 10 రోజులకు కొద్దిగా తక్కువ సమయం మాత్రమే మిగిలింది. అయితే ఎన్విడియా సిస్టమ్లను హ్యాక్ చేసినట్లు నిరూపించే ఆధారాలను గ్రూప్ ఇప్పటివరకు చూపించలేదు.
Details
అసలు డేటా దొంగిలించారా? అనుమానాలు
ఈ వ్యవహారంలో ఆసక్తికరమైన విషయం ఏమిటంటే.. హ్యాకర్లు అసలు ఏ డేటాను తమ వద్దకు తీసుకున్నారో చెప్పలేదు.
ఎన్విడియాలోని ఏ విభాగం ప్రభావితమైందో, ఎప్పుడు సిస్టమ్లోకి ప్రవేశించారో కూడా వెల్లడించలేదు.
దొంగిలించినట్లు చెబుతున్న డేటా నుంచి ఒక్క నమూనాను కూడా విడుదల చేయలేదు.
అయితే చర్చల కోసం ఉపయోగించుకునే Tox IDని మాత్రం పోస్టులో ఉంచారు.
దీంతో ఎన్విడియాపై ఒత్తిడి పెంచి, చర్చలకు దారితీయాలనే ప్రయత్నంగా ఈ కౌంట్డౌన్ను ఉపయోగిస్తున్నారనే అభిప్రాయాలు వ్యక్తమవుతున్నాయి.
సైబర్ నిపుణులు కూడా ఆధారాలు లేని ఆరోపణలను జాగ్రత్తగా పరిశీలించాల్సి ఉంటుందని చెబుతున్నారు.
Details
'ది జెంటిల్మెన్' వెనుక పెద్ద నెట్వర్క్
2025 జూలైలో వెలుగులోకి వచ్చిన 'ది జెంటిల్మెన్' రాన్సమ్వేర్-యాజ్-ఎ-సర్వీస్ విధానంలో పనిచేస్తున్నట్లు సమాచారం.
Ransomware.live ట్రాకర్ ప్రకారం, ఈ గ్రూప్ 95 దేశాల్లో 1,123 బాధిత సంస్థలను టార్గెట్ చేసినట్లు ఆరోపణలు ఉన్నాయి.
MoneyGram, Glassdoor, LA Metro, NATO కాంట్రాక్టర్ Indra వంటి పేర్లు కూడా ఆ జాబితాలో ఉన్నాయి.
గతంలో ఈ గ్రూప్ కొన్ని సైబర్ దాడుల విషయంలో అతిశయోక్తి ఆరోపణలు చేసిన సందర్భాలు ఉన్నాయని Cybernews పేర్కొంది.
ప్రస్తుతం ఎన్విడియా విషయంలోనూ ఇదే పరిస్థితా, నిజంగానే డేటా దొంగిలించారా అనేది తేలాల్సి ఉంది. రాబోయే రోజుల్లో హ్యాకర్లు ఆధారాలు బయటపెడతారా లేదా అన్నదే అసలు ప్రశ్న.