Secret Space: మార్స్కు షార్ట్కట్ దొరికిందా? 153 రోజుల్లో వెళ్లి వచ్చేయొచ్చా.. కొత్త స్టడీ ఏమి చెబుతోందంటే?
ఈ వార్తాకథనం ఏంటి
మార్స్కు వెళ్లే ప్రయాణం అంటే ఇప్పటివరకు నెలల తరబడి సాగేది.. పూర్తి మిషన్ అయితే ఏడాదికి పైగానే సమయం పట్టేది. అయితే ఇప్పుడు ఈ సమయం భారీగా తగ్గే అవకాశముందని కొత్త అధ్యయనం చెబుతోంది. Acta Astronautica జర్నల్లో ప్రచురితమైన ఈ పరిశోధన ప్రకారం, ఆస్టరాయిడ్స్ ప్రారంభ కక్ష్య డేటాను ఉపయోగిస్తే మొత్తం రౌండ్ ట్రిప్ను కేవలం 153 రోజుల్లో పూర్తి చేయొచ్చని తెలుస్తోంది. సాధారణంగా శాస్త్రవేత్తలు గ్రహాల సరైన అమరికలపై ఆధారపడి మార్స్ ప్రయాణాలు ప్లాన్ చేస్తారు. కానీ ఈ కొత్త అధ్యయనం మాత్రం ఆస్టరాయిడ్ ట్రాజెక్టరీలను ఉపయోగించి మరింత నేరుగా వెళ్లే మార్గాలను కనుగొనే ప్రయత్నం చేసింది.
వివరాలు
భవిష్యత్లో మానవులతో చేసే మిషన్లకు ఇది కీలకం
ముఖ్యంగా 2001 CA21 అనే ఆస్టరాయిడ్ కక్ష్యను విశ్లేషించగా, భూమి-మార్స్ మధ్య వేగవంతమైన మార్గాలు బయటపడ్డాయి. 2027, 2029, 2031 సంవత్సరాల మార్స్ అపోజిషన్లలో 2031 మాత్రమే అనుకూలంగా ఉందని తేలింది. ఈ విధానంతో బయలుదేరే ప్రయాణం 33 నుంచి 56 రోజులు, తిరుగు ప్రయాణం 90 నుంచి 135 రోజుల్లో పూర్తయ్యే అవకాశం ఉంది. భవిష్యత్లో మానవులతో చేసే మిషన్లకు ఇది కీలకంగా మారొచ్చు. ప్రయాణ సమయం తగ్గితే రేడియేషన్ ప్రభావం కూడా తగ్గి, ఖర్చులు, సాంకేతిక సవాళ్లు తగ్గే అవకాశముంది.