SpaceX: స్పేస్ఎక్స్లో అధికారికంగా విలీనమైన కర్సర్
ఈ వార్తాకథనం ఏంటి
ఆర్టిఫిషియల్ ఇంటెలిజెన్స్ కోడింగ్ స్టార్టప్ కర్సర్ ఇకపై అధికారికంగా స్పేస్ఎక్స్లో భాగమైంది. ఈ విషయాన్ని కర్సర్ తన అధికారిక బ్లాగ్లో వెల్లడించింది. ఎలాన్ మస్క్కు చెందిన స్పేస్ఎక్స్.. ఈ ఏడాది ప్రారంభంలో మస్క్కు చెందిన మరో సంస్థ xAIని కూడా కొనుగోలు చేసిన విషయం తెలిసిందే. ఏప్రిల్లో కర్సర్, స్పేస్ఎక్స్ సంస్థలు కలిసి సాంకేతిక పరిజ్ఞానాన్ని అభివృద్ధి చేసేందుకు ఒక ఒప్పందం కుదుర్చుకున్నాయి. ఈ ఒప్పందంలో భాగంగా కర్సర్ను 60 బిలియన్ డాలర్లకు కొనుగోలు చేసే అవకాశాన్ని స్పేస్ఎక్స్కు కల్పించారు.
వివరాలు
డేటా సెంటర్పై న్యాయపరమైన వివాదం..
ఆ తర్వాత రెండు నెలలకే స్పేస్ఎక్స్ పబ్లిక్ కంపెనీగా మారింది. ఈ నేపథ్యంలో కర్సర్, స్పేస్ఎక్స్ సంస్థలు తమ మధ్య కుదిరిన కొనుగోలు ఒప్పందాన్ని ముందుకు తీసుకెళ్లనున్నట్లు ప్రకటించాయి.
తాజాగా ఈ ఒప్పందం పూర్తయినట్లు కర్సర్ అధికారికంగా వెల్లడించింది.
కొనుగోలు ప్రక్రియ పూర్తయినట్లు ప్రకటించిన కర్సర్.. తన ప్రకటనలో స్పేస్ఎక్స్కు ఉన్న భారీ కంప్యూటింగ్ మౌలిక సదుపాయాల గురించి పలుమార్లు ప్రస్తావించింది.
స్పేస్ఎక్స్ తన కంప్యూటింగ్ సామర్థ్యాన్ని ఇతర సంస్థలకు కూడా అద్దెకు ఇస్తోంది.
ఆ సేవలను ఉపయోగించుకుంటున్న సంస్థల్లో ఆంత్రోపిక్, గూగుల్ వంటి ప్రముఖ కంపెనీలు ఉన్నాయి.
అయితే ఇదే సమయంలో స్పేస్ఎక్స్కు సంబంధించిన డేటా సెంటర్పై ఓ న్యాయపరమైన వివాదం కూడా కొనసాగుతోంది.
వివరాలు
కాలుష్యానికి సంబంధించి స్పేస్ఎక్స్పై కేసు..
డేటా సెంటర్లోని గ్యాస్ టర్బైన్ల వల్ల వెలువడుతున్న కాలుష్యానికి సంబంధించి స్పేస్ఎక్స్పై కేసు నమోదైంది.
స్పేస్ఎక్స్లో భాగం కావడం ద్వారా తమకు ప్రపంచంలోనే అతిపెద్ద GPUల సముదాయాన్ని ఉపయోగించుకునే అవకాశం లభిస్తుందని కర్సర్ పేర్కొంది.
భవిష్యత్తులో ప్రస్తుత సామర్థ్యాలకు మించి కృత్రిమ మేధస్సును విస్తరించేందుకు అవసరమైన భారీ కంప్యూటింగ్ సామర్థ్యాన్ని స్పేస్ఎక్స్ నిర్మిస్తోందని కర్సర్ తెలిపింది.
ఆ అభివృద్ధి ద్వారా అందుబాటులోకి వచ్చే AI సామర్థ్యాన్ని ప్రజలకు, వినియోగదారులకు వాస్తవంగా ఉపయోగపడే విధంగా మార్చే వేదికల్లో కర్సర్ ఒకటిగా నిలుస్తుందని కంపెనీ పేర్కొంది.