Milky Ways: విశ్వంలో అతిపెద్ద గెలాక్సీ.. 17 పాలపుంతలను మించిపోయిన IC 1101
ఈ వార్తాకథనం ఏంటి
IC 1101 విశ్వంలో ఇప్పటివరకు గుర్తించిన అతిపెద్ద గెలాక్సీగా నిలిచింది. దీని వెడల్పు ఏకంగా 17 పాలపుంతలు (Milky Way) వరుసగా అమర్చినంత ఉంటుందని శాస్త్రవేత్తలు చెబుతున్నారు. చిన్న గెలాక్సీలను తనలో కలుపుకుంటూ.. ఈ భారీ గెలాక్సీ మరింతగా పెరిగి ఉండొచ్చని పరిశోధకులు భావిస్తున్నారు. IC 1101 వ్యాసం సుమారు 520 కిలోపార్సెక్లు.. అంటే దాదాపు 17 లక్షల కాంతి సంవత్సరాలుగా ఉంటుందని పరిశోధకులు అంచనా వేశారు. ఈ వివరాలను జూలై 16న arXiv.orgలో సమర్పించిన అధ్యయనంలో వెల్లడించారు. 17 పాలపుంతలను ఒకదాని పక్కన ఒకటి వరుసగా ఉంచితే ఎంత దూరం ఉంటుందో.. IC 1101 వెడల్పు అంతకంటే ఎక్కువగా ఉంటుంది.
వివరాలు
గెలాక్సీ అంచుల నుంచి తోకల మాదిరిగా..
2022లో కానరీ దీవుల్లోని లా పాల్మాలో ఉన్న రోక్ డి లాస్ ముచాచోస్ అబ్జర్వేటరీలోని ఐజాక్ న్యూటన్ టెలిస్కోప్ ద్వారా IC 1101ను అత్యంత లోతుగా చిత్రీకరించారు.
అంటే ఇప్పటివరకు తీసిన చిత్రాల్లో అత్యంత ఎక్కువ సమయం ఎక్స్పోజర్ ఇచ్చి తీసిన చిత్రాలను పరిశోధకులు విశ్లేషించారు.
దీంతో గెలాక్సీకి సంబంధించిన చాలా మసకగా కనిపించే అంచులను కూడా గుర్తించగలిగారు.
ఈ పరిశీలనల ఆధారంగా IC 1101లోని నక్షత్ర పదార్థం మొత్తం సుమారు 3.4 ట్రిలియన్ సూర్యుల ద్రవ్యరాశికి సమానంగా ఉంటుందని అంచనా వేశారు.
అయితే IC 1101 పెరుగుదల ఇంకా ఆగిపోలేదని పరిశోధకులు చెబుతున్నారు.
గెలాక్సీ అంచుల నుంచి తోకల మాదిరిగా కొన్ని నిర్మాణాలు బయటకు విస్తరించి కనిపిస్తున్నాయి.
వివరాలు
విశ్వంలో అతిపెద్ద గెలాక్సీ..
ఇవి IC 1101 ఇతర గెలాక్సీలతో విలీనమైనప్పుడు ఏర్పడిన అవశేషాలై ఉండొచ్చని శాస్త్రవేత్తలు భావిస్తున్నారు.
"ఇది ఇప్పటికీ ఇతర పదార్థాలను తనలోకి చేర్చుకుంటూనే ఉంది. దీని పెరుగుదల ఇంకా పూర్తికాలేదు" అని స్పెయిన్లోని టెనెరిఫ్లో ఉన్న ఇన్స్టిట్యూటో డి ఆస్ట్రోఫిసికా డి కానారియాస్కు చెందిన ఖగోళ భౌతిక శాస్త్రవేత్త కార్లోస్ మారెరో డి లా రోసా తెలిపారు.
IC 1101 భూమికి ఒక బిలియన్ కాంతి సంవత్సరాలకుపైగా దూరంలో ఉన్న అబెల్ 2029 గెలాక్సీ క్లస్టర్ మధ్యలో ఉంది.
ఈ క్లస్టర్లో అత్యంత ప్రకాశవంతమైన గెలాక్సీ ఇదే.
అందుకే ఇది 'బ్రైటెస్ట్ క్లస్టర్ గెలాక్సీస్'గా పిలిచే గెలాక్సీల వర్గంలోకి వస్తుంది. విశ్వంలోని అతిపెద్ద గెలాక్సీల్లో అనేకం ఈ వర్గానికి చెందినవే.
వివరాలు
క్లస్టర్కు చెందిన మసక పదార్థం..
ఇవి తమ చుట్టుపక్కల ఉన్న చిన్న గెలాక్సీలను పదేపదే విలీనం చేసుకుంటూ భారీగా పెరుగుతాయి.
ఈ ప్రక్రియను 'గెలాక్టిక్ క్యానిబలిజం'గా పిలుస్తారు. ఇంత భారీగా, చుట్టుపక్కల ఉన్న పదార్థాన్ని నిరంతరం తనలో కలుపుకుంటూ పెరుగుతున్న గెలాక్సీల అసలు పరిమాణాన్ని ఖచ్చితంగా గుర్తించడం అంత సులభం కాదని మారెరో డి లా రోసా తెలిపారు.
గతంలో జరిగిన పరిశోధనల్లో IC 1101 భారీ గెలాక్సీ అని తేలినప్పటికీ.. గెలాక్సీ అసలు అంచు ఎక్కడ ముగుస్తుంది? దాని తర్వాత క్లస్టర్కు చెందిన మసక పదార్థం ఎక్కడ ప్రారంభమవుతుంది? అనే విషయాన్ని ఖచ్చితంగా గుర్తించలేకపోయారు.