China: అరుదైన వ్యాధి.. ప్రియుడి స్వరం వినలేకపోతున్న యువతి!
ఈ వార్తాకథనం ఏంటి
చైనాలోని జియామెన్ నగరంలో ఓ యువతికి అసాధారణ అనుభవం ఎదురైంది. ఒక ఉదయం నిద్రలేచి చూసేసరికి, ఆమెకు తన ప్రియుడి గొంతు పూర్తిగా వినిపించడం ఆగిపోయింది. మొదట ఇది ఇద్దరి మధ్య జరిగిన విభేదాల కారణమేమో అనుకున్నా, వైద్యులు పరిశీలించగా అసలు కారణం 'రివర్స్ స్లోప్ హియరింగ్ లాస్' అనే అరుదైన వినికిడి సమస్య అని తేలింది. ఈ వ్యాధి సోకినవారిలో తక్కువ తరంగదైర్ఘ్యం కలిగిన శబ్దాలను వినే శక్తి దెబ్బతింటుంది. సాధారణంగా పురుషుల గొంతులు తక్కువ తరంగదైర్ఘ్య పరిధిలో ఉండటంతో, ఆమెకు తన ప్రియుడి స్వరం వినిపించలేదు. అయితే ఎక్కువ తరంగదైర్ఘ్యం కలిగిన శబ్దాలు, ముఖ్యంగా మహిళల గొంతులు మాత్రం స్పష్టంగా వినిపిస్తూనే ఉన్నాయి.
వివరాలు
తక్కువ ఫ్రీక్వెన్సీ శబ్దాలు వినలేకపోవడమే ఈ వ్యాధి లక్షణం
ఫోర్బ్స్ కథనం ప్రకారం,ఈ వ్యాధికి ఆ పేరు రావడానికి ప్రత్యేక కారణం ఉంది. చెవుల వినికిడి సామర్థ్యాన్ని పరీక్షించే సమయంలో వైద్యులు 'ఆడియోగ్రామ్' అనే చార్ట్ను ఉపయోగిస్తారు. సాధారణ వినికిడి లోపంలో ఈ గీత కిందికి వంగి కనిపిస్తుంది. కానీ ఈ వ్యాధిలో మాత్రం అది పైకి వంగి నమోదవుతుంది. అందుకే దీనిని 'రివర్స్ స్లోప్ హియరింగ్ లాస్' అని పిలుస్తారు.ఈ సమస్య కేవలం పురుషుల గొంతుకే పరిమితం కాదు. లోతైన స్వరంతో మాట్లాడే మహిళల గొంతులు కూడా వినిపించకపోవచ్చు. అదే సమయంలో కొంచెం ఎత్తైన స్వరంతో మాట్లాడే పురుషుల గొంతులు వినిపించే అవకాశం ఉంటుంది. అంతేకాకుండా ఉరుము శబ్దం, కొన్ని సంగీత వాయిద్యాల నుంచి వచ్చే లోతైన ధ్వనులు కూడా వినిపించకపోవచ్చు.
వివరాలు
వైరల్ ఇన్ఫెక్షన్లు, ఇతర సమస్యల వల్ల ఇది రావొచ్చన్న వైద్యులు
ఈ వ్యాధిని గుర్తించడం అంత సులభం కాదని నిపుణులు చెబుతున్నారు. సాధారణంగా పదునైన శబ్దాలు వినిపించకపోతే ప్రజలు వెంటనే గమనిస్తారు. కానీ నెమ్మదిగా, లోతైన శబ్దాలు వినిపించకపోవడాన్ని చాలా మంది గుర్తించరు. అందువల్ల చాలా కాలం పాటు ఈ సమస్య ఉన్నప్పటికీ గుర్తించలేని పరిస్థితి ఏర్పడుతుంది. మెనియర్స్ వ్యాధి, వైరస్ సంబంధిత ఇన్ఫెక్షన్లు, మూత్రపిండాల వైఫల్యం, మెదడు చుట్టూ ఒత్తిడిలో మార్పులు వంటి కారణాలు ఈ సమస్యకు దారితీయవచ్చని వైద్యులు వెల్లడించారు. వినికిడి శక్తి శాశ్వతంగా దెబ్బతిన్నప్పుడు వినికిడి ఉపకరణాలను ఉపయోగించడం ద్వారా కొంత ఉపశమనం పొందవచ్చు. కాగా, ఈ యువతి ప్రియుడి విషయంలో ఇది వ్యక్తిగతంగా తీసుకోవాల్సిన అవసరం లేదని వైద్యులు సరదాగా వ్యాఖ్యానించినట్లు ఫోర్బ్స్ తన కథనంలో పేర్కొంది.