Whiskey heads to space: అంతరిక్షంలో విస్కీ ఏజింగ్‌.. 2028లో ప్రత్యేక ప్రయోగానికి సిద్ధం!
ఈ వార్తాకథనం ఏంటి
విస్కీని సాధారణంగా ఓక్‌ చెక్కతో తయారు చేసిన పీపాల్లో ఏళ్ల తరబడి నిల్వ చేస్తారు. ఇలా నిల్వ చేయడం వల్ల దాని రుచి, వాసన, రంగులో మార్పులు వస్తాయి. అయితే ఇప్పుడు శాస్త్రవేత్తలు భూమిపై కాకుండా అంతరిక్షంలో విస్కీని 'ఏజ్‌' చేయాలని ప్రయత్నిస్తున్నారు. గురుత్వాకర్షణ దాదాపు లేని పరిస్థితుల్లో విస్కీలో ఎలాంటి మార్పులు చోటుచేసుకుంటాయో తెలుసుకోవడమే ఈ ప్రయోగం ప్రధాన ఉద్దేశం. స్కాట్లాండ్‌, జపాన్‌కు చెందిన ఇంజినీర్లు కలిసి ఈ ప్రాజెక్టును రూపొందిస్తున్నారు. 'స్పేస్‌ పఫిన్‌'గా పిలుస్తున్న ఈ ప్రయోగాన్ని 2028లో నిర్వహించాలని నిర్ణయించారు. ఇందుకోసం చిన్న ఉపగ్రహం (క్యూబ్‌సాట్‌)లో విస్కీ నమూనాలతో పాటు దాని తయారీకి ఉపయోగించే ముడి పదార్థాలను కూడా అంతరిక్షంలోకి పంపించనున్నారు.
వివరాలు
పీపాలకు బదులుగా ఓక్‌ చెక్క ముక్కలు
సాధారణంగా విస్కీని నిల్వ చేసే ఓక్‌ పీపాలు పెద్దవిగా, బరువుగా ఉంటాయి.
వాటిని ఉపగ్రహంలో అంతరిక్షంలోకి తీసుకెళ్లడం సాధ్యం కాదు. దీంతో పరిశోధకులు ప్రత్యేక మైక్రో కంటెయినర్లను రూపొందించారు.
వీటిలో విస్కీని ఓక్‌ చెక్క ముక్కలతో కలిపి ఉంచనున్నారు. తద్వారా పీపాల్లో జరిగే ఏజింగ్‌ ప్రక్రియను చిన్న స్థాయిలో అనుకరించి పరిశీలించనున్నారు.
వివరాలు
జీరో గ్రావిటీలో విస్కీ ఎలా మారుతుంది?
అంతరిక్షంలో విస్కీలో చోటుచేసుకునే రసాయన మార్పులపై శాస్త్రవేత్తలు ప్రధానంగా దృష్టి పెట్టనున్నారు.
ద్రవాలు ఎలా కదులుతాయి, ఉష్ణ బదిలీపై గురుత్వాకర్షణ ప్రభావం ఎలా ఉంటుంది అనే అంశాలను ప్రత్యేక సెన్సర్ల సాయంతో పరిశీలిస్తారు.
భూమితో పోలిస్తే అంతరిక్షంలోని పరిస్థితుల్లో ఓక్‌ చెక్క భిన్నంగా స్పందించే అవకాశం ఉందని పరిశోధకులు భావిస్తున్నారు.
గురుత్వాకర్షణ ప్రభావం దాదాపు లేకపోవడం వల్ల ఓక్‌ చెక్కతో విస్కీ మధ్య జరిగే పరస్పర చర్యలు భూమిపై కంటే భిన్నంగా ఉండొచ్చు.
దీంతో విస్కీ ఏజింగ్‌ ప్రక్రియ మరింత వేగంగా జరిగే అవకాశం ఉందా అనే విషయాన్ని కూడా ఈ ప్రయోగం ద్వారా తెలుసుకోనున్నారు.
వివరాలు
స్పేస్‌ స్టేషన్‌ నుంచి కక్ష్యలోకి..
2028లో స్పేస్‌ఎక్స్‌ మిషన్‌ ద్వారా విస్కీ నమూనాలను అంతరిక్ష కేంద్రానికి తీసుకెళ్లాలని ప్రణాళిక రూపొందించారు.
అక్కడి జపాన్‌ మాడ్యూల్‌ నుంచి ఈ ప్రయోగానికి సంబంధించిన నమూనాలను కక్ష్యలోకి పంపనున్నారు.
స్కాట్లాండ్‌కు చెందిన డిస్టిలరీలు, జపాన్‌ సంస్థలు ప్రయోగం కోసం అవసరమైన విస్కీ నమూనాలను అందించనున్నాయి.
ఈ ప్రయోగం విజయవంతమైతే విస్కీ రుచి, వాసనకు కారణమయ్యే కొత్త రసాయన ప్రక్రియలను గుర్తించే అవకాశం ఉంది.
వివరాలు
స్పేస్‌ స్టేషన్‌ నుంచి కక్ష్యలోకి..
అంతేకాదు.. భవిష్యత్తులో భూమిపైనే విస్కీ తయారీ, ఏజింగ్‌ విధానాల్లో మార్పులు తీసుకురావడానికి ఈ పరిశోధన ఉపయోగపడొచ్చని భావిస్తున్నారు.
రాబోయే మూడేళ్ల నుంచి ఐదేళ్లలో దాదాపు లీటర్‌ విస్కీని అంతరిక్షంలో తయారు చేసి, తిరిగి భూమికి తీసుకురావాలనే ఆలోచన కూడా ఉందని పరిశోధకులు చెబుతున్నారు.
అంతరిక్ష పరిస్థితుల్లో తయారైన లేదా ఏజ్‌ అయిన విస్కీ భూమిపై తయారయ్యే విస్కీతో ఎలా భిన్నంగా ఉంటుందో తెలుసుకోవడం ఈ ప్రయోగంలో మరో ఆసక్తికరమైన అంశంగా మారనుంది.