Spacecraft: అంతరిక్ష నౌకలు సముద్రంలో ఎందుకు దిగుతాయి? స్ప్లాష్‌డౌన్‌ వెనుక అసలు కథ ఇదే
ఈ వార్తాకథనం ఏంటి
అంతరిక్షంలోకి వెళ్లడం ఎంతటి సాహసమో.. అక్కడి నుంచి భూమికి సురక్షితంగా తిరిగి రావడం కూడా అంతే కీలకం. వ్యోమగాములు భూమికి చేరుకునే చివరి దశలో ఎదురయ్యే సవాళ్లు ఎన్నో. అందుకే కొన్ని అంతరిక్ష నౌకలు రన్‌వేపై కాకుండా సముద్రంలో దిగేలా రూపొందిస్తారు. ఈ విధానాన్ని 'స్ప్లాష్‌డౌన్‌' అంటారు. ఇందులో సముద్రం ఒకవైపు రక్షణగా నిలిస్తే.. మరోవైపు ప్రమాదాలకు కారణమయ్యే అవకాశం కూడా ఉంది...
Details
సముద్రాన్నే ఎందుకు ఎంచుకుంటారు?
అంతరిక్షం నుంచి భూమికి తిరిగి వచ్చే క్యాప్సూల్‌ వేగాన్ని తగ్గించేందుకు ప్రత్యేక పారాచూట్లు ఉపయోగిస్తారు.
అయినప్పటికీ అది సముద్రాన్ని తాకే సమయానికి గణనీయమైన వేగంతోనే ఉంటుంది.
అలాంటి సమయంలో నేలపై దిగితే తీవ్ర ప్రభావం పడే ప్రమాదం ఉంది. నీరు మాత్రం ఢీకొన్నప్పుడు కొంత మేరకు ప్రభావాన్ని గ్రహిస్తుంది.
అందుకే సముద్రం స్ప్లాష్‌డౌన్‌కు అనువైన ప్రాంతంగా మారుతుంది.
మరో ముఖ్యమైన కారణం సముద్రాల విస్తీర్ణం. భూమిపై ఎక్కువ భాగం సముద్రాలతోనే నిండి ఉండటంతో.. అంతరిక్ష నౌకలు దిగేందుకు విశాలమైన ప్రాంతం అందుబాటులో ఉంటుంది.
అయితే గాలులు, అలలు, సముద్ర ప్రవాహాలు క్యాప్సూల్‌ నిర్దేశిత ప్రాంతం నుంచి దూరంగా వెళ్లేలా చేయవచ్చు. దీంతో రక్షణ బృందాలకు సవాళ్లు ఎదురవుతాయి.
Details
స్ప్లాష్‌డౌన్‌ తర్వాత ఏం జరుగుతుంది?
క్యాప్సూల్‌ నీటిని తాకిన వెంటనే వ్యోమగాముల రక్షణ చర్యలు మొదలవుతాయి.
హెలికాప్టర్లు,నౌకాదళ బృందాలు వారిని బయటకు తీసుకొచ్చి వైద్య పరీక్షల కోసం నౌకకు తరలిస్తాయి.
క్యాప్సూల్‌ను కూడా ప్రత్యేక పరికరాలతో నౌకపైకి తీసుకెళ్తారు. దాని చుట్టూ అమర్చే గాలితో నింపే ఫ్లోటేషన్‌ పరికరాలు నీటిలో మునిగిపోకుండా సహాయపడతాయి.
1961లో గస్‌ గ్రిసమ్‌ ప్రయాణించిన 'లిబర్టీ బెల్‌ 7' క్యాప్సూల్‌ స్ప్లాష్‌డౌన్‌ తర్వాత నీటిని లోపలికి తీసుకోవడం ప్రమాదాన్ని గుర్తుచేస్తుంది.
ఈ ఘటనల నుంచి నేర్చుకున్న పాఠాలతో నేటి రక్షణ వ్యవస్థలు మరింత మెరుగయ్యాయి.
భారత్‌ కూడా గగన్‌యాన్‌ వంటి మానవ అంతరిక్ష ప్రయోగాలకు సిద్ధమవుతున్న నేపథ్యంలో.. వ్యోమగాములను సురక్షితంగా తిరిగి తీసుకురావడం ఎంతటి శాస్త్రీయ సవాలో ఈ స్ప్లాష్‌డౌన్‌ విధానం స్పష్టం చేస్తోంది.