Windows 11 : విండోస్‌ 11 ఫొటోస్‌ యాప్‌లో ఇక ఐక్లౌడ్‌, వన్‌డ్రైవ్‌ ఫొటోలు కూడా!
ఈ వార్తాకథనం ఏంటి
మైక్రోసాఫ్ట్‌ తన విండోస్‌ 11 ఫొటోస్‌ యాప్‌లో కీలక మార్పులు చేసింది. ఈ కొత్త అప్‌డేట్‌తో కంప్యూటర్‌లోని ఫొటోలు, వీడియోలతో పాటు వన్‌డ్రైవ్‌, ఐక్లౌడ్‌లో ఉన్న మీడియా ఫైల్స్‌ను కూడా ఒకేచోట చూడొచ్చు. ఇందుకోసం వేర్వేరు యాప్‌లు లేదా పరికరాలను మార్చాల్సిన అవసరం ఉండదు. ఫొటోలు, వీడియోలను సులభంగా చూడటం, నిర్వహించడం కోసం ఈ కొత్త ఫీచర్‌ను తీసుకొచ్చింది. అంతేకాకుండా యాప్‌ ప్రారంభమయ్యే వేగం, ఫొటోలను స్క్రోల్‌ చేసే పనితీరును కూడా మెరుగుపరిచినట్లు మైక్రోసాఫ్ట్‌ తెలిపింది.
అనుసంధానం
గ్యాలరీలను ఎలా అనుసంధానించాలి?
విండోస్‌ 11 ఫొటోస్‌ యాప్‌లో మీ ఫొటో గ్యాలరీలను అనుసంధానించాలంటే ముందుగా ఐఓఎస్‌ లేదా ఆండ్రాయిడ్‌ ఫోన్‌లోని వన్‌డ్రైవ్‌ యాప్‌లో కెమెరా బ్యాకప్‌ (Camera Backup) ఫీచర్‌ను ఆన్‌ చేయాలి.
అలాగే విండోస్‌ కోసం ఐక్లౌడ్‌ను సెటప్‌ చేయడానికి యాపిల్‌ సూచించిన విధానాన్ని అనుసరించాలి.
ఈ ప్రక్రియ పూర్తయిన తర్వాత ఫొటోలను తేదీల వారీగా చూడొచ్చు.
ఆల్బమ్‌లను సృష్టించడం, వాటిని క్రమబద్ధీకరించడం, ఇతరులతో పంచుకోవడం వంటి పనులు చేయవచ్చు.
ఫొటోల్లో ఉన్న వ్యక్తుల పేర్లు లేదా చిత్రాల వివరణ ఆధారంగా కూడా కావాల్సిన ఫొటోలను వెతకవచ్చు.
ఇంటర్నెట్
ఇంటర్నెట్ లేకున్నా ఫొటోలు చూసే అవకాశం
కొత్త ఫొటోస్‌ యాప్‌లో ఆఫ్‌లైన్‌ యాక్సెస్‌ సదుపాయాన్ని కూడా అందిస్తున్నారు.
దీంతో ఇంటర్నెట్ కనెక్షన్‌ లేకపోయినా పరికరంలో అందుబాటులో ఉన్న ఫొటోలను చూడొచ్చు. సెర్చ్‌ ఫీచర్‌ను కూడా మెరుగుపరిచారు.
ఫొటోలో ఉన్న వ్యక్తులు లేదా ఆ చిత్రానికి సంబంధించిన వివరణ ఆధారంగా కావాల్సిన ఫొటోను సులభంగా గుర్తించవచ్చు.
దీనివల్ల గ్యాలరీలో వందలాది ఫొటోలను స్క్రోల్‌ చేస్తూ సమయం వృథా చేసుకోవాల్సిన అవసరం ఉండదు.
ఫొటో ఎడిటర్
ఫొటో ఎడిటర్‌లో కీలక మార్పులు
మైక్రోసాఫ్ట్‌ ఫొటోస్‌ యాప్‌లోని ఎడిటర్‌ను పూర్తిగా కొత్తగా రూపొందించింది. దీంతో ఫొటోలను ఎడిట్‌ చేసే వేగం 25 శాతం పెరిగినట్లు సంస్థ తెలిపింది.
ఎడిటింగ్‌ టూల్స్‌ను క్రాప్‌ (Crop), ఎన్‌హాన్స్‌ (Enhance), రిపేర్‌ (Repair), స్టైలైజ్‌ (Stylize) అనే నాలుగు విభాగాలుగా ఏర్పాటు చేసింది.
ఫొటోలను ఎడిట్‌ చేసేటప్పుడు హెచ్‌డీఆర్‌ (HDR) నాణ్యతను కూడా కాపాడుతుంది.
హెచ్‌ఈఐసీ (HEIC), వెబ్‌పీ (WebP) ఫార్మాట్లలో ఉన్న చిత్రాలను వాటి అసలు ఫార్మాట్‌ మార్చకుండానే ఎడిట్‌ చేసి సేవ్‌ చేసుకోవచ్చు.
ఫొటోలను చూసే వ్యూయర్‌ ఇంటర్‌ఫేస్‌ను కూడా సరళంగా మార్చారు. గతంతో పోలిస్తే ఇది 15 శాతం వేగంగా ప్రారంభమవుతుందని మైక్రోసాఫ్ట్‌ పేర్కొంది.
ఎస్‌వీజీ
ఎస్‌వీజీ ఫైళ్లకు మద్దతు
కొత్త ఫొటోస్‌ యాప్‌లో ఎస్‌వీజీ (SVG) ఫైళ్లకు కూడా మద్దతు కల్పించారు.
దీంతో మరిన్ని రకాల మీడియా ఫైళ్లను ఈ యాప్‌లో వీక్షించే అవకాశం ఉంటుంది.
ఈ అప్‌డేట్‌ను విండోస్‌ 11 ఉపయోగిస్తున్న విండోస్‌ ఇన్‌సైడర్స్‌ (Windows Insiders)కు అందిస్తున్నారు.
ఈ ఏడాది చివర్లో ఇతర విండోస్‌ 11 వినియోగదారులకూ ఈ కొత్త ఫీచర్లను అందుబాటులోకి తీసుకురావాలని మైక్రోసాఫ్ట్‌ భావిస్తోంది.