Copper-Titanium Medical Implant: ఇన్ఫెక్షన్ ముప్పు తగ్గించే ప్రపంచ తొలి కాపర్-టైటానియం మెడికల్ ఇంప్లాంట్
ఈ వార్తాకథనం ఏంటి
ఆర్థోపెడిక్ శస్త్రచికిత్సల్లో ఉపయోగించే ప్రపంచ తొలి కాపర్ మిశ్రమ టైటానియం ఇంప్లాంట్ను చైనా అభివృద్ధి చేసింది. ఈ కొత్త టెక్నాలజీతో తయారైన ఇంప్లాంట్ వల్ల ఆపరేషన్ తర్వాత వచ్చే ఇన్ఫెక్షన్ ప్రమాదం గణనీయంగా తగ్గుతుందని శాస్త్రవేత్తలు చెబుతున్నారు. టైటానియం అల్లాయ్ మెడికల్ డివైజ్ల బలం, దృఢత్వం యథాతథంగా ఉండేలా రూపొందించడంతో పాటు, యాంటీబ్యాక్టీరియల్ లక్షణాలను కూడా ఇందులో జోడించారు. ఈ వినూత్న బోన్ పిన్కు చైనా నేషనల్ మెడికల్ ప్రోడక్ట్స్ అడ్మినిస్ట్రేషన్ మార్కెట్ అనుమతి ఇచ్చింది. ఈ విప్లవాత్మక ఇంప్లాంట్ను సూజౌకు చెందిన సిల్వన్ మెడికల్ కంపెనీ, షెన్యాంగ్లోని ఇన్స్టిట్యూట్ ఆఫ్ మెటల్ రీసెర్చ్ కలిసి రూపొందించాయి.
వివరాలు
క్లినికల్ వినియోగ దశకు కాపర్-టైటానియం అల్లాయ్
ఈ పరిశోధనా సంస్థ చైనీస్ అకాడమీ ఆఫ్ సైన్సెస్కు అనుబంధంగా పనిచేస్తోంది. పరిశోధన స్థాయి నుంచి క్లినికల్ వినియోగ దశకు కాపర్-టైటానియం అల్లాయ్ విజయవంతంగా చేరిందని సంస్థ వెల్లడించింది. టైటానియం,దాని మిశ్రమాలను ప్రస్తుతం డెంటల్ ఇంప్లాంట్లు, హిప్, మోకాలి మార్పిడి శస్త్రచికిత్సలు, బోన్ ప్లేట్లు, స్క్రూల తయారీలో విస్తృతంగా ఉపయోగిస్తున్నారు. ఇవి బలంగా ఉండటంతో పాటు శరీరానికి అనుకూలంగా పనిచేస్తాయి. ముఖ్యంగా ఎముకలు విరిగినప్పుడు వాటిని సెట్ చేయడానికి ఉపయోగించే బోన్ పిన్స్లో ఈ కొత్త కాపర్-టైటానియం టెక్నాలజీ మరింత మెరుగైన ఫలితాలు ఇవ్వొచ్చని నిపుణులు భావిస్తున్నారు.