Daryl Mitchell: భారత్‌పై 11 ఇన్నింగ్స్‌లు.. 4 సెంచరీలు.. డారిల్ మిచెల్ విధ్వంసకర రికార్డు!
ఈ వార్తాకథనం ఏంటి
టీమిండియా, న్యూజిలాండ్ జట్ల మధ్య నవంబర్ 4 నుంచి ఐదు మ్యాచ్‌ల వన్డే సిరీస్ ప్రారంభం కానుంది. ఈ సిరీస్‌లో న్యూజిలాండ్ మిడిలార్డర్ బ్యాటర్ డారిల్ మిచెల్‌పై అందరి దృష్టి ఉండనుంది. వన్డే ఫార్మాట్‌లో అతడు భారత బౌలర్లకు కొంతకాలంగా పెద్ద సవాలుగా మారాడు. తాజాగా ముగిసిన టీ20 సిరీస్‌లోనూ తన బ్యాటింగ్‌తో ఆకట్టుకున్నాడు. ఈ సిరీస్‌లో 174.26 స్ట్రైక్‌రేట్‌తో 176 పరుగులు సాధించి మంచి ఫామ్‌లో ఉన్నాడు. ఈ నేపథ్యంలో భారత్‌పై వన్డేల్లో మిచెల్ సాధించిన రికార్డులు ఆసక్తికరంగా మారాయి.
వివరాలు
భారత్‌పై అత్యుత్తమ బ్యాటింగ్ సగటు
భారత్‌పై వన్డేల్లో డారిల్ మిచెల్ అద్భుతమైన గణాంకాలు నమోదు చేశాడు.
క్రిక్‌ఇన్ఫో గణాంకాల ప్రకారం.. టీమిండియాపై ఇప్పటివరకు కేవలం 11 ఇన్నింగ్స్‌లు ఆడిన అతడు నాలుగు సెంచరీలు, రెండు అర్ధసెంచరీలు సాధించాడు.
మొత్తంగా 741 పరుగులు చేశాడు. భారత్‌పై కనీసం 700 పరుగులు చేసిన బ్యాటర్లలో 74.1 సగటుతో మిచెల్ అగ్రస్థానంలో నిలిచాడు.
మరో ఆసక్తికరమైన విషయం ఏమిటంటే.. భారత్‌పై అతడు సాధించిన ఆరు 50 ప్లస్ స్కోర్లు కూడా గత ఏడు ఇన్నింగ్స్‌ల్లోనే వచ్చాయి.
అంటే టీమిండియాతో ఇటీవలి మ్యాచ్‌ల్లో మిచెల్ నిలకడగా పరుగులు సాధిస్తున్నాడు.
వివరాలు
భారత్‌పై అత్యధిక సెంచరీలు చేసిన బ్యాటర్‌గా మిచెల్
టీమిండియాపై వన్డేల్లో డారిల్ మిచెల్ సాధించిన నాలుగు సెంచరీలు మరో అరుదైన రికార్డును అందించాయి.
భారత్‌పై కనీసం 15 ఇన్నింగ్స్‌లు ఆడిన బ్యాటర్లలో అత్యధిక సెంచరీలు చేసిన ఆటగాడిగా అతడు నిలిచాడు. ఈ జాబితాలో పాకిస్థాన్ మాజీ క్రికెటర్లు నాసిర్ జంషెడ్, జహీర్ అబ్బాస్ రెండేసి సెంచరీలతో రెండో స్థానంలో ఉన్నారు.
అంతేకాదు.. భారత్‌పై మిచెల్ సాధించిన ప్రతి సెంచరీ కూడా 130 లేదా అంతకంటే ఎక్కువ పరుగులతో కూడుకున్నదే.
ఈ తరహాలో మూడు కంటే ఎక్కువ సెంచరీలు సాధించిన బ్యాటర్లలో మిచెల్ అగ్రస్థానంలో ఉండగా.. శ్రీలంక దిగ్గజం సనత్ జయసూర్య మూడు సెంచరీలతో అతడి తర్వాతి స్థానంలో ఉన్నాడు.