IPL2024:SRHలో అత్యధిక పరుగులు చేసిన హెన్రిచ్ క్లాసెన్ కి కాకుండా..అభిషేక్ శర్మకు ప్లేయర్ ఆఫ్ ది మ్యాచ్ అవార్డు..ఎందుకో తెలుసా ?
ఐపీఎల్ 2024 సీజన్‌లో ప్యాట్ కమిన్స్ కెప్టెన్సీలో సన్‌రైజర్స్ హైదరాబాద్ తొలి విజయాన్ని నమోదు చేసింది. హైదరాబాద్‌లోని తమ సొంత మైదానంలో జరిగిన మ్యాచ్‌లో SRH 31 పరుగుల తేడాతో ముంబయి ఇండియన్స్‌ను ఓడించింది. హైదరాబాద్ విజయంలో చాలా మంది హీరోలు ఉన్నారు, వారిలో దక్షిణాఫ్రికా విధ్వంసకర బ్యాట్స్‌మెన్ హెన్రిచ్ క్లాసెన్ పెద్ద పాత్ర పోషించాడు. క్లాసెన్ 80 పరుగుల అజేయ ఇన్నింగ్స్ తో సన్‌రైజర్స్ హైదరాబాద్ 277 పరుగులు చేసింది. ఇది ఐపీఎల్ చరిత్రలో అత్యధిక స్కోరుగా కొత్త రికార్డుగా నిలిచింది. అయినప్పటికీ, అతని కంటే తక్కువ పరుగులు చేసిన SRH బ్యాట్స్‌మెన్ అభిషేక్ శర్మ ప్లేయర్ ఆఫ్ ది మ్యాచ్‌గా ఎంపికయ్యాడు.
ఐపీఎల్ చరిత్రలోనే అత్యధిక పరుగులు సాధించిన SRHటీం
హైదరాబాద్‌లోని ఉప్పల్ స్టేడియంలో బుధవారం జరిగిన ఈ మ్యాచ్‌లో ఇరు జట్లు ఆకాశమే హద్దుగా బౌండరీలు, సిక్సర్ల వర్షం కురిపించి హైదరాబాద్ ప్రేక్షకులను మంత్ర ముగ్ధుల్ని చేసారు. గతంలో 2013 లో పుణె వారియర్స్‌ పై ఆర్సీబీ సాధించిన 263/5 పరుగుల రికార్డ్ ను SRH బ్రేక్ చేసింది. ముంబై కూడా ధీటుగా స్పందించి 246 పరుగులు చేసింది. ఇది ఐపిఎల్ చరిత్రలో రెండవ ఇన్నింగ్స్‌లో అత్యధిక స్కోరు. ఇరు జట్లు మొత్తం 523 పరుగులు చేశాయి, ఇది టీ20 క్రికెట్ మ్యాచ్‌లో అత్యధిక స్కోరు.
రాణించిన హెన్రిచ్ క్లాసెన్
రెండు జట్ల బ్యాట్స్‌మెన్ అద్భుతమైన పవర్-హిటింగ్‌తో వీలు చిక్కినప్పుడల్లా బంతిని చాలాసార్లు బౌండరీకి తరలించారు. హైదరాబాద్‌కు చెందిన అనుభవజ్ఞుడైన వికెట్ కీపర్-బ్యాట్స్‌మెన్ హెన్రిచ్ క్లాసెన్ కేవలం 34 బంతుల్లో అజేయంగా 80 పరుగులు చేశాడు. ఇది రెండు జట్లలో అత్యధికం.అతని ఇన్నింగ్స్‌లో 7 సిక్సర్లు,4 ఫోర్లు కొట్టాడు. ఇదిలావుండగా, జట్టు విజయం తర్వాత, అతని సహచరుడు అభిషేక్ శర్మకు ప్లేయర్ ఆఫ్ ద మ్యాచ్ అవార్డు రావడం కొంతమందిని ఆశ్చర్యపరిచింది.
అత్యంత వేగవంతమైన అర్ధ సెంచరీ చేసిన అభిషేక్ శర్మ
యువ ఎడమచేతి వాటం బ్యాట్స్‌మెన్ అభిషేక్ శర్మ మూడవ స్థానంలో బ్యాటింగ్‌కు వచ్చి 63 పరుగులు చేశాడు. అతని ఇన్నింగ్స్‌లో 3 ఫోర్లు,7 సిక్సర్లు మాత్రమే కొట్టాడు. అయినప్పటికీ, అతను కేవలం 16 బంతుల్లోనే అర్ధ సెంచరీని సాధించడం వలన ఈ అవార్డును అందుకున్నాడు. ఇది IPL 2024 సీజన్‌లో అత్యంత వేగవంతమైన అర్ధ సెంచరీ రికార్డు. ఇది మాత్రమే కాదు, అతని 63 పరుగులు క్లాసెన్ 80 పరుగుల కంటే వేగంగా వచ్చాయి. అభిషేక్ ఈ పరుగులను కేవలం 23 బంతుల్లో 273.91 స్ట్రైక్ రేట్‌తో సాధించగా, క్లాసన్ స్ట్రైక్ రేట్ 235.29. అంటే ఈ ఇన్నింగ్స్‌లో అభిషేక్ ప్రభావం ఎక్కువగా ఉండడంతో అతనే హీరో ఆఫ్ ద మ్యాచ్‌గా ఎంపికయ్యాడు.
