Esha Singh: భారత్కు మరో పతకం.. తృటిలో స్వర్ణం మిస్ చేసిన ఈషా సింగ్!
ఈ వార్తాకథనం ఏంటి
2026 ఆసియా క్రీడల్లో భారత షూటర్ ఈషా సింగ్ అద్భుత ప్రదర్శనతో మెరిసింది. మహిళల 25 మీటర్ల పిస్టల్ ఈవెంట్లో అత్యంత ఉత్కంఠభరితంగా సాగిన ఫైనల్ పోరులో అసాధారణ రీతిలో పుంజుకున్న ఈషా సింగ్.. భారత్కు రజత పతకాన్ని అందించింది. చివరి వరకు అద్భుతమైన పోరాట పటిమను ప్రదర్శించి ప్రశంసలు అందుకుంటోంది.
వివరాలు
ఒంటరి పోరాటంతో పతకాల రేసులోకి..
క్వాలిఫైయింగ్ రౌండ్లో భారత షూటర్లు మను భాకర్, రాహి నిష్క్రమించడంతో.. ఈ ఈవెంట్లో భారత్ ఆశలన్నీ ఈషా సింగ్పైనే నిలిచాయి.
మొత్తం 44 మంది షూటర్లు పాల్గొన్న క్వాలిఫైయింగ్ రౌండ్లో ఈషా తీవ్ర పోటీని ఎదుర్కొంది. ఎనిమిదో స్థానంలో నిలిచి ఫైనల్కు అర్హత సాధించింది.
చైనీస్ తైపీకి చెందిన యెన్-చింగ్ చెంగ్తో ఈషా సింగ్ స్కోరు సమంగా ఉన్నప్పటికీ.. 22 బుల్సైలను కొట్టడంతో ఫైనల్ బెర్తును ఖరారు చేసుకుంది.
వివరాలు
నాలుగో స్థానం నుంచి పుంజుకుని థ్రిల్లింగ్ ఫైట్
ఫైనల్ రౌండ్ ఆరంభంలో కాస్త తడబడిన ఈషా సింగ్ నాలుగో స్థానానికి పడిపోయింది.
అయితే ఒత్తిడిని అధిగమించి.. అద్భుతమైన ఏకాగ్రతతో వరుస షాట్లలో రాణించింది.
తొమ్మిది సిరీస్లు పూర్తయ్యేసరికి కొరియన్ షూటర్తో కలిసి 34 పాయింట్లతో సమంగా నిలిచింది.
దీంతో కాంస్య పతకాన్ని నిర్ణయించేందుకు నిర్వహించిన షూట్-ఆప్లో ఈషా సింగ్ విజయం సాధించింది. ఈ విజయంతో ఆమె స్వర్ణం, రజతం రేసులోకి దూసుకెళ్లింది.
వివరాలు
స్వర్ణ పతకం కోసం హోరాహోరీ షూట్-ఆప్
చివరి సిరీస్లో స్వర్ణం కోసం ఈషా సింగ్, చైనా షూటర్ మధ్య హోరాహోరీ పోరు సాగింది. ఈషా సింగ్ ఐదు లక్ష్యాల్లో నాలుగింటిని ఛేదించగా.. చైనా షూటర్ మూడు లక్ష్యాలను మాత్రమే కొట్టింది. దీంతో ఇద్దరి స్కోర్లు 38-38తో సమమయ్యాయి.
విజేతను నిర్ణయించేందుకు ఆ తర్వాత చివరి షూట్-ఆప్ నిర్వహించారు. ఇందులో చైనా క్రీడాకారిణి స్వల్ప తేడాతో విజయం సాధించి స్వర్ణ పతకాన్ని గెలుచుకుంది.
ఈషా సింగ్ రజత పతకంతో సరిపెట్టుకుంది. అయితే చివరి వరకు ఈషా సింగ్ చూపించిన అసాధారణ పోరాట పటిమతో.. ఆమె సాధించిన రజత పతకం కూడా స్వర్ణానికి ఏమాత్రం తీసిపోని విజయంగా నిలిచింది.