BBL: బీబీఎల్ 2026-27 షెడ్యూల్ విడుదల.. చెన్నైలో ప్రారంభ మ్యాచ్, కొత్త రూల్స్ అమలు

వ్రాసిన వారు Sirish Praharaju

Jul 14, 2026

12:42 pm

ఈ వార్తాకథనం ఏంటి

క్రికెట్ చరిత్రలోనే తొలిసారి ఓ విదేశీ ఫ్రాంచైజీ టోర్నీ ప్రారంభ మ్యాచ్‌కు భారత్ ఆతిథ్యం ఇవ్వబోతోంది. బిగ్‌బాష్ లీగ్(బీబీఎల్)2026-27 సీజన్‌కు సంబంధించిన పూర్తి షెడ్యూల్‌ను క్రికెట్ ఆస్ట్రేలియా మంగళవారం అధికారికంగా ప్రకటించింది. ఈ టోర్నీ 16వ సీజన్ తొలి మ్యాచ్ డిసెంబర్ 12న చెన్నైలోని ఎంఏ చిదంబరం స్టేడియంలో జరగనుండగా,మెల్‌బోర్న్ రెనిగేడ్స్,పెర్త్ స్కార్చర్స్ జట్లు తలపడనున్నాయి. భారత్‌లో బిగ్‌బాష్ లీగ్ ప్రారంభ మ్యాచ్ నిర్వహించడం రెండు దేశాల మధ్య క్రీడా సంబంధాలను మరింత బలోపేతం చేస్తుందని క్రికెట్ ఆస్ట్రేలియా భావిస్తోంది. ఈ చారిత్రక నిర్ణయాన్ని గత వారం భారత ప్రధాని నరేంద్ర మోదీ,ఆస్ట్రేలియా ప్రధాని ఆంథనీ అల్బనీస్ సంయుక్తంగా ప్రకటించారు. దీంతో భారత్-ఆస్ట్రేలియా క్రీడా భాగస్వామ్యంలో మరో కీలక ఘట్టం నమోదు కానుంది.

వివరాలు

డిసెంబర్ 12 నుండి జనవరి 17 వరకు..

చెన్నైలో ప్రారంభ మ్యాచ్ ముగిసిన అనంతరం టోర్నీ మిగతా లీగ్ మ్యాచ్‌లు డిసెంబర్ 15 నుంచి ఆస్ట్రేలియాలో కొనసాగనున్నాయి.

ఈ సీజన్‌లో గ్రూప్ దశలో మొత్తం 44 లీగ్ మ్యాచ్‌లు నిర్వహించనుండగా, అనంతరం నాలుగు ప్లేఆఫ్ మ్యాచ్‌లు జరగనున్నాయి.

డిసెంబర్ 12న ప్రారంభమయ్యే లీగ్ దశ జనవరి 17 వరకు కొనసాగుతుంది.

అనంతరం జనవరి 19న తొలి క్వాలిఫయర్, జనవరి 20న నాకౌట్ మ్యాచ్, జనవరి 23న చాలెంజర్ పోరు, జనవరి 26న ఫైనల్ మ్యాచ్ నిర్వహించనున్నారు.

దీంతో టైటిల్ పోరు వరకు అభిమానులకు వరుసగా ఉత్కంఠభరితమైన మ్యాచ్‌లు చూడే అవకాశం లభించనుంది.

నాలుగేళ్ల విరామం తర్వాత క్రిస్మస్ ఈవ్ సందర్భంగా కూడా ప్రత్యేక మ్యాచ్‌ను షెడ్యూల్‌లో చేర్చారు.

వివరాలు

'డిజిగ్నేటెడ్ బ్యాటర్ అండ్ ఫీల్డర్' పేరుతో కొత్త నిబంధన

డిసెంబర్ 24న మెల్‌బోర్న్‌లోని జంక్షన్ ఓవల్ వేదికగా మెల్‌బోర్న్ రెనిగేడ్స్, హోబార్ట్ హరికేన్స్ జట్లు తలపడనున్నాయి. ఈ ప్రత్యేక మ్యాచ్ అభిమానులకు మరో ఆకర్షణగా నిలవనుంది.

ఇక ఈ సీజన్‌లో 'డిజిగ్నేటెడ్ బ్యాటర్ అండ్ ఫీల్డర్' పేరుతో కొత్త నిబంధనను కూడా అమల్లోకి తీసుకురానున్నారు.

ఈ విధానం ప్రకారం ఒక ఆటగాడు కేవలం బ్యాటింగ్ మాత్రమే చేయగలడు. మరో ఆటగాడు కేవలం ఫీల్డింగ్ లేదా వికెట్ కీపింగ్ బాధ్యతలను మాత్రమే నిర్వర్తించవచ్చు.

ఈ కొత్త రూల్‌తో జట్లు తమ వ్యూహాలను మరింత భిన్నంగా రూపొందించే అవకాశం ఉండగా, మ్యాచ్‌ల్లో కొత్త తరహా వ్యూహాత్మక మార్పులు కనిపించే అవకాశముంది.

ట్విట్టర్ పోస్ట్ చేయండి

చెన్నై వేదికగా బిగ్‌బాష్

Summer plans sorted! Your #BBL16 schedule has landed 🗓️ pic.twitter.com/AGSVp8OgVL
— KFC Big Bash League (@BBL) July 14, 2026