Team India: ఎలాంటి మార్పులు లేకుండానే ఫైనల్‌లో ఆడాలి.. మేనేజ్‌మెంట్‌కు సూచించిన సునీల్ గావస్కర్
ఈ వార్తాకథనం ఏంటి
వరుస విజయాలతో ఛాంపియన్స్ ట్రోఫీ (ICC Champions Trophy 2025) ఫైనల్ కి వచ్చిన భారత జట్టు న్యూజిలాండ్‌తో తలపడనుంది.
ఈ పోరు ఆదివారం దుబాయ్‌లో జరగనుంది. తుది జట్టు కూర్పు ఎలా ఉండబోతుందనేది క్రికెట్ ప్రేమికుల కోసం ఆసక్తికర అంశంగా మారింది.
ఈ నేపథ్యంలో భారత క్రికెట్ దిగ్గజం సునీల్ గవాస్కర్ మాత్రం తుది జట్టులో ఎలాంటి మార్పులు అవసరం లేదని స్పష్టం చేశారు.
గత రెండు మ్యాచుల్లో ఎలా ఆడారో అలాగే, నలుగురు స్పిన్నర్లతో బరిలోకి దిగాలని సూచించారు.
అయితే కొన్ని ముఖ్యమైన అంశాల్లో టీమిండియా మెరుగైతే, ఫైనల్‌లో ఘన విజయాన్ని సాధించడం కచ్చితం అని గావస్కర్ అభిప్రాయపడ్డారు.
వివరాలు
ఓపెనర్ల నుంచి మెరుగైన ఆరంభం అవసరం
''ఇప్పటి వరకు భారత ఓపెనర్ల నుంచి భారీ స్కోరు రాలేదు. కానీ ఫైనల్‌లో తప్పకుండా అలా జరగాలని ఆశిస్తున్నా. ఈ విషయంలో టీమ్‌ఇండియా మరింత మెరుగవ్వాలి.
అదేవిధంగా, కొత్త బంతితో తొలి ఓవర్లలో మరిన్ని వికెట్లు తీయడం ముఖ్యం.
కనీసం 2 లేదా 3 వికెట్లు తీయగలిగితే జట్టుకు పెద్ద ప్రయోజనం ఉంటుంది. మిడిల్‌ ఓవర్లలో వికెట్లు తీయడం కాస్త తక్కువగా కనిపిస్తోంది.
పరుగులను కట్టడి చేస్తున్నా, వికెట్లు పడగొడితే ప్రత్యర్థి జట్టుపై మరింత ఒత్తిడి పెరుగుతుంది. ఈ అంశాల్లో భారత జట్టు మెరుగుపడాలి. అలా జరిగితే ఫైనల్ గెలిచే అవకాశం చాలా ఎక్కువ'' అని గావస్కర్ విశ్లేషించారు.
వివరాలు
మార్పులు అవసరం లేదు
''భారత్ తుది జట్టులో (IND vs NZ) ఎలాంటి మార్పులు చేయాల్సిన అవసరం లేదు.
నలుగురు స్పిన్నర్లతోనే ఆడాలి. ఎందుకు మార్పులు చేయాలి? చక్రవర్తి, కుల్దీప్ లు జట్టులో ఉండటంతో బౌలింగ్ బలపడింది.
వారిని తుది జట్టులోకి తీసుకోవడం మేనేజ్‌మెంట్ తీసుకున్న సరికొత్త నిర్ణయం.
వికెట్లు తీయడమే కాకుండా, పరిమిత ఓవర్ల క్రికెట్‌లో డాట్‌ బాల్స్ వేయడం చాలా ముఖ్యమైన అంశం.
వీరిద్దరూ ఆ విషయంలో అద్భుతంగా రాణిస్తున్నారు. గ్రూప్‌ స్టేజ్‌లో ఇప్పటికే భారత స్పిన్నర్లు న్యూజిలాండ్‌పై చక్కని ప్రదర్శన కనబరిచారు.
దుబాయ్ పిచ్ కూడా స్పిన్నర్లకు సహకరిస్తోంది. అలాంటి పరిస్థితుల్లో భారత్ ఎలాంటి మార్పులు లేకుండా ఫైనల్ XIలో బరిలోకి దిగాలి'' అని గావస్కర్ పేర్కొన్నారు.