రాయల్ ఛాలెంజర్స్ బెంగళూర్‌కు గట్టి షాక్.. స్టార్ ప్లేయర్ ఔట్
ఈడెన్ గార్డెన్స్‌లో ఆర్సీబీపై కోల్‌కతా నైట్ రైడర్స్ 81 పరుగుల తేడాతో గెలుపొందిన విషయం తెలిసిందే. ఈ షాక్ నుంచి కోలుకోక ముందే ఆర్సీబీకి మరో గట్టి ఎదురుదెబ్బ తగిలింది. ఆ జట్టు స్టార్ పేసర్ రీస్ టాప్లీ గాయం కారణంగా ఐపీఎల్ సీజన్ మొత్తానికి దూరమయ్యాడు. ముంబై ఇండియన్స్‌తో జరిగిన తొలి మ్యాచ్ లో ఆర్సీబీ ప్లేయర్ టాప్లీ ఫీల్డింగ్ చేస్తుండగా భుజానికి గాయమైంది. గాయం తీవ్రత ఎక్కువ కావడంతో మొత్తం ఈ సీజన్ నుంచి వైదొలిగాడు. దీంతో రీస్ టాప్లీ తన స్వదేశమైన ఇంగ్లండ్‌కు తిరిగి పోయాడు. ఈ విషయాన్ని ఆర్సీబీ కోచ్ సంజయ్ బంగర్ తెలిపారు.
రీస్ టాప్లీ స్థానంలో ఎవరు?
రీస్ టాప్లీ స్థానాన్ని ఎవరితో భర్తీ చేస్తామో త్వరలో ఆ వివరాలను వెల్లడిస్తామని ఆర్సీబీ కోచ్ సంజయ్ బంగర్ వెల్లడించారు. అయితే శ్రీలంక స్పిన్నర్ హసరంగ ఏప్రిల్ 10న, ఆస్ట్రేలియా పేసర్ హేజిల్ వుడ్ ఏప్రిల్ 14న జట్టుతో చేరనున్నారని ఆర్సీబీ ప్రకటించింది. టాప్లీ గాయపడడం ఇదే తొలిసారి కాదు. గత ఐదేళ్లలో నాలుగుసార్లు అతడి వెన్నుకి గాయాలయ్యాయి. 2015లో అరంగేట్రం చేసిన టాప్లీ 22 వన్డేల్లో 33 వికెట్లను పడగొట్టాడు.
