ఇండియా-ఆస్ట్రేలియా నాలుగో టెస్ట్ మ్యాచ్ కు అతిధులుగా ఇరుదేశాల ప్రధానమంత్రులు
బోర్డర్ గవాస్కర్ ట్రోఫీలో ఇండియా, ఆస్ట్రేలియా మధ్య మార్చి 9 నుంచి చివరి నాలుగో టెస్ట్ ప్రారంభం కానుంది. అహ్మదాబాద్ లోని నరేంద్ర మోదీ స్టేడియంలో జరగనున్న ఈ మ్యాచ్ ను చూడటానికి తొలి రోజు నరేంద్ర మోదీతోపాటు ఆస్ట్రేలియా ప్రధాని ఆంథోనీ ఆల్బనీస్ రానున్నారు. ఆస్ట్రేలియా ప్రధాని ఆల్బనీస్ తన 4 రోజుల భారతదేశ పర్యటన కోసం మార్చి 8న ఇక్కడకు రానున్నారు. ఈ సందర్భంగా భారత ప్రధానితో కలిసి మ్యాచ్ చూడాలని నిర్ణయించుకున్నారు. బోర్డర్ గవాస్కర్ ట్రోఫీలో ఈ మ్యాచ్ ఇప్పుడు కీలకంగా మారింది.
ఈ స్టేడియంలో పిచ్ గురించి చర్చ ఆసక్తికరంగా మారింది
తొలి రెండు టెస్టులు గెలిచి ఇండియా 2-0 ఆధిక్యం సంపాదించగా.. మూడో టెస్టులో ఆస్ట్రేలియా గెలిచింది ఇక చివరిదైన నాలుగో టెస్టులో గెలిస్తే ఈ ట్రోఫీని వరుసగా నాలుగోసారి గెలిచిన రికార్డు భారతజట్టుకు సొంతమవుతుంది. ఇప్పుడు ఆడుతున్న స్టేడియం 2021లో నరేంద్ర మోదీ స్టేడియంగా మారిన తర్వాత ఇక్కడ ఆడిన రెండు టెస్టుల్లోనూ భారతజట్టు గెలిచింది. ఈ స్టేడియంలో పిచ్ గురించి చర్చ ఆసక్తికరంగా మారింది. మూడు టెస్టుల్లోనూ బ్యాటర్లకు ప్రతికూలంగా ఉండే పిచ్ లు ఉన్నాయి అయితే తొలి రెండు టెస్టులు భారతజట్టుకు అనుకూలించినా మూడో టెస్టులో మాత్రం దారుణ వైఫల్యంతో ఓటమికి కారణమయింది పిచ్. జట్టు కెప్టెన్ రోహిత్ ఇటువంటి స్పిన్ పిచ్ లు అనుకూలంగా ఉంటాయనుకుంటున్నట్లు స్పష్టం చేశాడు.
