Paris Paralympics 2024: పారాలింపిక్స్‌ 400 మీటర్ల రేసులో తెలుగు అమ్మాయికి కాంస్యం
తెలుగు అమ్మాయి దీప్తి జివాంజీ పారాలింపిక్స్‌లో కాంస్య పతకం సాధించింది. మహిళల 400మీటర్ల పరుగు పందెంలో(టీ20)55.82 సెకన్లలో ముగించి, మూడో స్థానాన్ని పొందింది. దీప్తి కాంస్యం సాధించగా, ఉక్రెయిన్ అథ్లెట్ షులియర్ యులియ 55.16సెకన్లలో రేసును పూర్తిచేసి స్వర్ణం గెలుచుకుంది. టర్కీ అథ్లెట్ ఒండర్ ఐసెల్ 55.23 సెకన్లలో రజతం గెలిచింది. సోమవారం జరిగిన హీట్స్‌లో మొదటి స్థానంలో నిలిచిన దీప్తి,తుది పోరులో కేవలం మిల్లీ సెకన్ల తేడాతో బంగారు పతకాన్ని చేజార్చుకుంది. రేసు మధ్యలో రెండో స్థానంలో ఉన్నప్పటికీ,లక్ష్యానికి చేరువలో ఉన్నప్పుడు దీప్తి కొద్దిగా నెమ్మదించడంతో టర్కీ అథ్లెట్ ఈ అవకాశాన్ని సద్వినియోగం చేసుకుంది. మరోవైపు,బ్యాడ్మింటన్‌లో సుమతి శివన్ నిత్య శ్రీ(ఎస్‌హెచ్‌6)కూడా కాంస్య పతకాన్ని గెలిచి భారత్‌కు మరొక పతకాన్ని అందించింది.
జివాంజీ ప్రపంచ రికార్డు సృష్టించింది
జివాంజీ 2019లో హాంకాంగ్‌లో జరిగిన ఆసియా యూత్ ఛాంపియన్‌షిప్‌లో అంతర్జాతీయ అరంగేట్రం చేసి కాంస్య పతకాన్ని గెలుచుకుంది. గతేడాది మేలో జపాన్‌లో జరిగిన ప్రపంచ పారా ఛాంపియన్‌షిప్‌లో 55.07 సెకన్లతో కొత్త ప్రపంచ రికార్డుతో స్వర్ణ పతకాన్ని కైవసం చేసుకోగా, గత ఏడాది హాంగ్‌జౌ పారా ఆసియా గేమ్స్‌లో జీవన్‌జీ 56.69 సెకన్ల కొత్త రికార్డుతో టైటిల్‌ను గెలుచుకుంది. అయితే, ఈ ప్రపంచ రికార్డును తుర్కియేకు చెందిన ఒండర్ 54.96 సెకన్లతో బద్దలు కొట్టాడు.
