FIFA World Cup: రికార్డు స్థాయిలో ఫిఫా ఫైనల్ టికెట్ ధర.. ఒక సీటు కోసం రూ.21 కోట్లు
ఈ వార్తాకథనం ఏంటి
అమెరికా, కెనడా, మెక్సికో సంయుక్తంగా ఆతిథ్యం ఇవ్వనున్న ఫీఫా ప్రపంచ కప్ 2026 కోసం అభిమానుల్లో ఉత్సాహం తారాస్థాయికి చేరింది. టికెట్ల కోసం ఇప్పటికే 50 కోట్లకు పైగా అభ్యర్థనలు వచ్చినట్లు ఫిఫా వెల్లడించింది. తాజాగా ప్రపంచకప్ ఫైనల్ మ్యాచ్కు సంబంధించిన నాలుగు ప్రత్యేక సీట్ల టికెట్లను ఫిఫా రీసేల్ సైట్లో విక్రయానికి పెట్టింది. అయితే ఒక్కో టికెట్ ధర 2.3 మిలియన్ డాలర్లు(దాదాపు రూ.21 కోట్లు)గా ఉండటంతో నెటిజన్లు ఆశ్చర్యానికి గురవుతున్నారు. జూలై 19న న్యూ జెర్సీలో జరిగే ఫైనల్కు ఈ ప్రీమియం సీట్లు అందుబాటులో ఉంటాయని ఫిఫా తెలిపింది. గోల్ వెనుక భాగంలో ఉన్న లోయర్ డెక్లోని బ్లాక్-124, లైన్-45లో సీట్లు 33 నుంచి 36 వరకూ ఇవి ఉంటాయి.
వివరాలు
జూన్ 11న ప్రారంభం
ఇతర సీట్ల ధరలను కూడా ఫిఫా వెల్లడించింది. ఈ టోర్నమెంట్ ద్వారా వచ్చే ఆదాయాన్ని తనకు చెందిన 211 సభ్య దేశాల్లో క్రీడాభివృద్ధికి తిరిగి పెట్టుబడిగా పెట్టనున్నట్లు సంస్థ స్పష్టం చేసింది. ఈ ప్రపంచకప్ మ్యాచ్లు జూన్ 11న ప్రారంభమై జూలై 19 వరకు 39 రోజుల పాటు జరుగుతాయి. యూఎస్, కెనడా, మెక్సికోలోని 16 వేదికల్లో మొత్తం 104 మ్యాచ్లు నిర్వహించనున్నారు. ఇప్పటివరకు 32 జట్లు మాత్రమే పాల్గొనగా, ఈసారి 48 జట్లు బరిలోకి దిగనున్నాయి. ఫైనల్ మ్యాచ్ టికెట్లకు భారీ డిమాండ్ నెలకొన్న నేపథ్యంలో టాప్ కేటగిరీ టికెట్ ధరలను కూడా పెంచారు. ప్రస్తుతం ఒక్కో టికెట్ ధరను 10,990 డాలర్లు (సుమారు రూ.10.19 లక్షలు)గా నిర్ణయించారు.