INDvs NZ: కివీస్‌తో టీ20 సిరీస్‌కు భారత్‌ రెడీ.. శ్రేయస్‌ సేనకు అసలైన పరీక్ష!
ఈ వార్తాకథనం ఏంటి
కొంత విరామం తర్వాత టీమిండియా విదేశీ పర్యటనకు సిద్ధమైంది. సుదీర్ఘంగా సాగనున్న న్యూజిలాండ్‌ పర్యటనలో భాగంగా తొలుత టీ20 సిరీస్‌లో తలపడనుంది. ఈ సిరీస్‌లో తొలి మ్యాచ్‌ గురువారమే జరగనుంది. శ్రేయస్‌ సారథ్యంలో బరిలోకి దిగనున్న భారత జట్టుకు ఈ సిరీస్‌ సవాల్‌గా మారనుంది. కెప్టెన్‌గా బాధ్యతలు చేపట్టిన తర్వాత శ్రేయస్‌ ఆడిన తొలి రెండు సిరీస్‌ల్లోనూ భారత్‌కు పరాజయాలు ఎదురయ్యాయి. ఐర్లాండ్‌, ఇంగ్లాండ్‌ జట్ల చేతుల్లో ఓటములు చవిచూడాల్సి వచ్చింది. ఆ తర్వాత బలహీన జట్లపై విజయాలు సాధించినప్పటికీ.. ఇటీవల స్వదేశంలో వెస్టిండీస్‌తో జరిగిన సిరీస్‌లో భారత జట్టుకు గట్టి పోటీ ఎదురైంది. విండీస్‌తో సిరీస్‌ను 2-2తో ముగించిన శ్రేయస్‌ సేనకు.. న్యూజిలాండ్‌ను దాని సొంతగడ్డపై ఓడించడం అంత సులభం కాదు.
వివరాలు
అద్భుతంగా కివీస్ బౌలింగ్
మిచెల్‌ శాంట్నర్‌ నాయకత్వంలోని కివీస్ జట్టులో ఫిన్‌ అలెన్‌, టిమ్‌ సీఫర్ట్‌, గ్లెన్‌ ఫిలిప్స్‌ వంటి విధ్వంసక బ్యాటర్లు ఉన్నారు.
వీరితో పాటు డెవాన్‌ కాన్వే, డారిల్‌ మిచెల్‌ లాంటి క్లాస్‌ ఆటగాళ్లు కూడా జట్టుకు బలం. కెప్టెన్‌ శాంట్నర్‌తో పాటు బ్రాస్‌వెల్‌ స్పిన్‌ బౌలింగ్‌లోనే కాకుండా బ్యాటింగ్‌లోనూ రాణించగలరు.
పేస్‌ విభాగంలో హెన్రీ, ఫెర్గూసన్‌, జేమీసన్‌, నాథన్‌ స్మిత్‌ ఉండటంతో న్యూజిలాండ్‌ బౌలింగ్ కూడా పటిష్ఠంగా కనిపిస్తోంది.
నాలుగేళ్ల విరామం తర్వాత భారత జట్టులో చోటు దక్కించుకున్న సీనియర్‌ పేసర్‌ భువనేశ్వర్‌ కుమార్‌ ఈ మ్యాచ్‌లో ప్రధాన ఆకర్షణగా నిలవనున్నాడు.
వివరాలు
బరిలోకి భువనేశ్వర్‌.. నాలుగేళ్ల తర్వాత పునరాగమనం
ఇకపై భువనేశ్వర్‌ను భారత జట్టులో చూడలేమని భావించిన అభిమానులకు అతడి పునరాగమనం సంతోషాన్నిస్తోంది. ఐపీఎల్‌, దేశవాళీ క్రికెట్‌లో నిలకడగా రాణించడంతో అతడికి మరోసారి జాతీయ జట్టులో ఆడే అవకాశం లభించింది.
న్యూజిలాండ్‌తో తొలి టీ20లో భువనేశ్వర్‌ తుది జట్టులో ఆడే అవకాశాలు కనిపిస్తున్నాయి. తనకు అనుకూలించే స్వింగ్‌ బౌలింగ్‌తో న్యూజిలాండ్‌ పిచ్‌లపై భువనేశ్వర్‌ చెలరేగుతాడని భారత జట్టు ఆశిస్తోంది.
అతడితో కలిసి అర్ష్‌దీప్‌ సింగ్‌ కొత్త బంతిని పంచుకోనున్నాడు. మూడో పేసర్‌గా ప్రిన్స్‌ యాదవ్‌కు తుది జట్టులో చోటు దక్కవచ్చు.
అయితే పేస్‌ ఆల్‌రౌండర్లు శివమ్‌ దూబె, నితీశ్‌కుమార్‌ అందుబాటులో ఉండటంతో ప్రిన్స్‌ యాదవ్‌ స్థానంలో స్పిన్నర్‌ వరుణ్‌ చక్రవర్తిని ఆడించే అవకాశాన్ని కూడా కొట్టిపారేయలేం.
వివరాలు
పటిష్టంగా భారత బ్యాటింగ్
భారత జట్టులో ప్రధాన స్పిన్నర్‌గా ఉన్న అక్షర్‌ పటేల్‌.. న్యూజిలాండ్‌ విధ్వంసక బ్యాటర్లను ఎలా కట్టడి చేస్తాడన్నది ఆసక్తికరంగా మారింది.
బ్యాటింగ్ విషయానికి వస్తే యువ ఓపెనర్‌ వైభవ్‌ సూర్యవంశీకి తొలి టీ20లో అవకాశం దక్కకపోవచ్చు. అభిషేక్‌ శర్మతో కలిసి సంజు శాంసన్‌ ఇన్నింగ్స్‌ను ఆరంభించే అవకాశాలున్నాయి.
వీరితో పాటు ఇషాన్‌ కిషన్‌, శ్రేయస్‌ అయ్యర్‌, తిలక్‌ వర్మ, శివమ్‌ దూబె, నితీశ్‌కుమార్‌ ఉండటంతో భారత బ్యాటింగ్ విభాగం పటిష్ఠంగానే కనిపిస్తోంది.
వివరాలు
ఇద్దరి మధ్య ఆసక్తికర పోరు
అయితే ఇటీవలే స్వదేశంలో సిరీస్‌ ఆడిన భారత జట్టు.. ప్రయాణం ముగిసిన వెంటనే ఎక్కువ విరామం లేకుండా తొలి టీ20 బరిలోకి దిగాల్సి వస్తోంది.
ఈ నేపథ్యంలో ఆటగాళ్లు తమ స్థాయికి తగ్గ ప్రదర్శన చేస్తారా? అన్నది ప్రశ్నార్థకంగా మారింది. మరోవైపు, మ్యాచ్‌కు వర్షం ముప్పు లేదని అంచనా.
పిచ్‌ బ్యాటింగ్‌తో పాటు పేస్‌ బౌలింగ్‌కు కూడా అనుకూలించే అవకాశముంది. దీంతో తొలి టీ20లో ఇరు జట్ల మధ్య ఆసక్తికర పోరు జరిగే అవకాశం ఉంది.