Nawaz: ఇండియాతో ఓటమిని జీర్ణించుకోలేకపోతున్నా: పాక్ స్టార్ బ్యాటర్ నవాజ్
ఈ వార్తాకథనం ఏంటి
టీమిండియా చేతిలో ఎదురైన ఓటమిని ఇప్పటికీ జీర్ణించుకోలేకపోతున్నానని పాకిస్థాన్ బ్యాటర్ హసన్ నవాజ్ తెలిపాడు. బలమైన భారత జట్టును ఎదుర్కోవడం అంత సులభం కాదని,అయినప్పటికీ జట్టు విజయం కోసం తన వంతు ప్రయత్నం చేశానని చెప్పాడు. అయితే మ్యాచ్‌లో చేసిన కొన్ని చిన్న తప్పిదాల కారణంగా ఓటమి రూపంలో భారీ మూల్యం చెల్లించుకోవాల్సి వచ్చిందని ఆవేదన వ్యక్తం చేశాడు. మరోసారి భారత్‌కే స్వర్ణం జపాన్ వేదికగా ఇటీవల జరిగిన ఆసియా క్రీడలు-2026 పురుషుల టీ20 క్రికెట్ టోర్నీ ఫైనల్లో భారత్, పాకిస్తాన్ తలపడ్డాయి. ఉత్కంఠభరితంగా సాగిన టైటిల్ పోరులో టీమిండియా 19 పరుగుల తేడాతో పాకిస్తాన్‌పై విజయం సాధించింది. దీంతో భారత్ మరోసారి స్వర్ణ పతకాన్ని సొంతం చేసుకోగా.. పాకిస్తాన్ రజతంతో సరిపెట్టుకుంది.
వివరాలు
హసన్ నవాజ్ పోరాటం వృథా
భారత్ నిర్దేశించిన 212 పరుగుల లక్ష్యాన్ని ఛేదించే క్రమంలో పాకిస్తాన్ బ్యాటర్లు వరుసగా విఫలమయ్యారు.
అయితే నాలుగో స్థానంలో బ్యాటింగ్‌కు వచ్చిన హసన్ నవాజ్ మాత్రం ఒంటరి పోరాటం చేశాడు.
కేవలం 51 బంతుల్లోనే ఐదు ఫోర్లు, ఏడు సిక్సర్లతో 96 పరుగులు సాధించాడు.
అతడు సెంచరీ దిశగా దూసుకెళ్తున్న సమయంలో శివమ్ దూబే అద్భుతమైన బంతితో నవాజ్‌ను పెవిలియన్‌కు పంపించాడు.
దీంతో పాకిస్తాన్‌కు గట్టి దెబ్బ తగలడంతో పాటు భారత్ విజయం మరింత సులువైంది.
నవాజ్ 96 పరుగుల వద్ద ఔటై సెంచరీకి నాలుగు పరుగుల దూరంలో నిలిచిపోయాడు.
వివరాలు
'ఓటమిని ఇప్పటికీ జీర్ణించుకోలేకపోతున్నా'
భారత్ చేతిలో పరాజయంపై హసన్ నవాజ్ తాజాగా స్పందించాడు.
మీడియాతో మాట్లాడుతూ మ్యాచ్ ఫలితంపై తీవ్ర నిరాశ వ్యక్తం చేశాడు. "ఈ ఓటమి నన్ను తీవ్రంగా నిరాశపరిచింది. నా మనసు గాయపడింది. ఇప్పటికీ ఆ పరాజయాన్ని జీర్ణించుకోలేకపోతున్నా. మ్యాచ్‌లో మేము కొన్ని చిన్న తప్పులు చేశాం. వాటి కారణంగానే ఓటమి రూపంలో భారీ మూల్యం చెల్లించుకోవాల్సి వచ్చింది. అయితే నా వ్యక్తిగత ప్రదర్శన పట్ల సంతృప్తిగానే ఉన్నాను. మేము మ్యాచ్ గెలుస్తామని భావించాను. కానీ చివర్లో పరిస్థితులు పూర్తిగా మారిపోయాయి. మ్యాచ్ పరిస్థితులకు అనుగుణంగానే నా బ్యాటింగ్‌ను కొనసాగించాను. బుమ్రాకు ఒక్క ఓవర్ మాత్రమే మిగిలి ఉన్న సమయంలో మా విజయం ఖాయమని అనుకున్నాను. కానీ అలా జరగలేదు" అని నవాజ్ చెప్పాడు.
వివరాలు
'కష్ట సమయంలో జట్టును పోటీలోకి తీసుకురావడం సంతృప్తినిచ్చింది'
మ్యాచ్ కీలక దశలో జట్టు కోసం పరుగులు చేయడం తనకు సంతృప్తినిచ్చిందని నవాజ్ పేర్కొన్నాడు.
భవిష్యత్తులో ఇలాంటి మ్యాచ్‌లు మరిన్ని ఉంటాయని, తప్పులు జరగడం సహజమేనని చెప్పాడు.
"కష్టకాలంలో జట్టు కోసం పరుగులు చేసి మళ్లీ పోటీలోకి తీసుకురావడం నాకు సంతృప్తినిచ్చింది. మళ్లీ మ్యాచ్‌లు జరుగుతాయి. మేము తప్పులు చేస్తూనే ఉంటాం. కానీ టీమిండియాను ఓడించాలంటే ఆ తప్పుల నుంచి పాఠాలు నేర్చుకోవాలి. గతం కంటే మరింత మెరుగ్గా, గొప్పగా ఆడాల్సి ఉంటుంది. భారత్ ప్రపంచంలోనే నంబర్ వన్ జట్టు అని అందరికీ తెలుసు. అలాంటి బలమైన జట్టుపై నేను బాగా ఆడగలిగాను. ఆ ప్రదర్శన నా ఆత్మవిశ్వాసాన్ని మరింత రెట్టింపు చేసింది" అని 24 ఏళ్ల హసన్ నవాజ్ తెలిపాడు.