Parvez Rasool : ఇంటర్నేషనల్ క్రికెట్‌కి రిటైర్మెంట్ ప్రకటించి షాకిచ్చిన టీమిండియా ప్లేయర్
ఈ వార్తాకథనం ఏంటి
టీమిండియా ప్రస్తుతం ఆస్ట్రేలియా పర్యటనలో ఉంది, అక్కడ రెండు జట్ల మధ్య వన్డే సిరీస్ జరుగుతోంది. ఈ సిరీస్ మధ్యలోనే భారత క్రికెట్‌కు చెందిన ఒక ప్రముఖ ఆటగాడు ఆకస్మికంగా రిటైర్మెంట్ ప్రకటించాడు. ఈ ఆటగాడు జూన్ 15, 2014న భారత్ తరపున అంతర్జాతీయ క్రికెట్‌లో డెబ్యూ చేసాడు. జమ్మూ-కశ్మీర్ నుంచి భారత్ కోసం ఆడిన మొదటి క్రికెటర్గా చరిత్ర సృష్టించాడు. ఇప్పుడు, అతను అన్ని ఫార్మాట్ల క్రికెట్ నుండి తప్పుకోవాలని నిర్ణయించాడు. జమ్మూ-కశ్మీర్ నుంచి భారత్ తరపున వన్డే ఆడిన మొదటి క్రికెటర్ పర్వేజ్ రసూల్ తన క్రికెట్ జీవితానికి ముగింపు ప్రకటించాడు. 36 ఏళ్ల ఈ ఆల్-రౌండర్ అక్టోబర్ 18న భారత క్రికెట్ కంట్రోల్ బోర్డుకి తన నిర్ణయాన్ని తెలియజేశాడు.
వివరాలు
ఐపీఎల్‌లో మొత్తం 11 మ్యాచ్‌లను ఆడిన రసూల్
పర్వేజ్ రసూల్ జూన్ 15, 2014న బంగ్లాదేశ్‌తో మీర్‌పూర్‌లో తన వన్డే డెబ్యూ చేసింది,ఆ మ్యాచ్‌లో 10 ఓవర్లలో 60పరుగులు ఇచ్చి 2 వికెట్లు తీసాడు. జనవరి 26, 2017న కాన్పూర్‌లో ఇంగ్లాండ్‌పై ఆడిన తన ఏకైక టీ20 మ్యాచ్‌లో 5 పరుగులు చేసి, 32 పరుగులు ఇచ్చి ఇయాన్ మోర్గాన్ వికెట్ తీశాడు. రసూల్ దేశవాళీ కెరీర్ చాలా అద్భుతంగా ఉంది.95 ఫస్ట్-క్లాస్ మ్యాచ్‌లలో 5648 పరుగులు చేసి,352 వికెట్లు తీశాడు. అదనంగా,164 లిస్ట్-ఎ,71 టీ20 మ్యాచ్‌లలో కూడా ఆడాడు.రంజీ ట్రోఫీలో రెండు సార్లు (2013/14, 2017/18) బెస్ట్ ఆల్-రౌండర్‌గా లాలా అమర్‌నాథ్ ట్రోఫీను గెలిచాడు. ఐపీఎల్‌లో పూణే వారియర్స్,సన్‌రైజర్స్ హైదరాబాద్,రాయల్ ఛాలెంజర్స్ బెంగళూరు తరఫున మొత్తం 11 మ్యాచ్‌లను ఆడాడు.
వివరాలు
బీసీసీఐ అనుబంధ టోర్నమెంట్లలో బాగా రాణించాము: రసూల్
రిటైర్మెంట్ ప్రకటించిన తర్వాత రసూల్ స్పోర్ట్‌స్టార్‌తో మాట్లాడుతూ: "మేము క్రికెట్ ఆడటం ప్రారంభించినప్పుడు,చాలా మంది జమ్మూ కాశ్మీర్ క్రికెట్‌ను సీరియస్‌గా తీసుకోలేదు. కానీ మేము కొన్ని పెద్ద జట్లను ఓడించాము. రంజీ ట్రోఫీ,ఇతర బీసీసీఐ అనుబంధ టోర్నమెంట్లలో కూడా బాగా ప్రదర్శించాము. చాలా కాలం జట్టుకు కెప్టెన్‌గా సేవలందించాను. జట్టు విజయంలో కొంతదైనా సహకారం అందించగలిగినందుకు నాకు చాలా సంతోషంగా ఉంది" అని రసూల్ పేర్కొన్నారు.