Gautam Gambhir: హెడ్ కోచ్‌గా మార్చే ప్రసక్తే లేదు.. బీసీసీఐ పూర్తి మద్దతు!
ఈ వార్తాకథనం ఏంటి
టీమిండియా హెడ్ కోచ్ గౌతమ్ గంభీర్‌ను పదవి నుంచి తొలగించబోతున్నారన్న ఊహాగానాలకు బీసీసీఐ వర్గాలు పూర్తిగా తెరదించారు. స్వదేశంలో జరిగిన దక్షిణాఫ్రికా టెస్టు సిరీస్‌ను 0-2 తేడాతో కోల్పోవడంతో, గంభీర్ భవిష్యత్తుపై అనేక రకాల ప్రచారం మొదలైంది. ముఖ్యంగా అతన్ని తప్పించి, వీవీఎస్ లక్ష్మణ్‌ను రెడ్-బాల్ కోచ్‌గా నియమించవచ్చని వచ్చిన కథనాలు పెద్ద హడావిడిని రేపాయి. అయితే, వీటన్నింటినీ బోర్డు వర్గాలు ఖండించాయి. గంభీర్‌ను మార్చే యోచన బీసీసీఐ వద్ద లేదని స్పష్టమైంది. అతనిపై ఎలాంటి చర్యల గురించి ఆలోచన లేదు. గంభీర్ ప్రస్తుతం జట్టును మార్చే, పునర్నిర్మించే కీలక దశలో ఉన్నాడు.
Details
భవిష్యత్ ప్రణాళికపై ప్రత్యేక చర్చ
2027 ప్రపంచకప్ వరకు అతని కాంట్రాక్ట్ కొనసాగుతుందని బోర్డు వర్గాలు పేర్కొన్నాయి. గత సంవత్సరం కాలంలో స్వదేశంలో ఇదే రెండోసారి టెస్టు సిరీస్‌ను కోల్పోవడంతో గంభీర్ కోచ్ పదవిపై చర్చ చెలరేగింది. ఈ నేపథ్యంలో టీమ్ మేనేజ్‌మెంట్, సెలెక్టర్లు కలిసి త్వరలో సమావేశం కానున్నట్టు కూడా బీసీసీఐ వర్గాలు వెల్లడించాయి. పరిమిత ఓవర్ల సిరీస్ అనంతరం జరిగే ఆ సమావేశంలో, టెస్టు జట్టులో జరుగుతున్న మార్పులు, రాణించే వ్యూహాలు, భవిష్యత్ ప్రణాళికలపై గంభీర్‌తో ప్రత్యేక చర్చ జరుగుతుందని వివరించారు. ఈ నేపథ్యంలో గంభీర్ పదవిపై ఎలాంటి ముప్పు లేదనే విషయం స్పష్టమైంది. బోర్డు మద్దతుతో ఆయన కొనసాగనున్నారు.