FIFA: ఫిఫాకు యూఈఎఫ్ఏ షాక్.. వరల్డ్కప్ సహా అన్ని టోర్నీలను బాయ్కాట్ చేస్తామంటూ హెచ్చరిక!
ఈ వార్తాకథనం ఏంటి
ప్రపంచ ఫుట్ బాల్లో తీవ్ర ఉద్రిక్త పరిస్థితులు నెలకొన్నాయి. అంతర్జాతీయ ఫుట్బాల్ సమాఖ్య (ఫిఫా) తీసుకున్న ఒక వివాదాస్పద ప్రతిపాదనపై యూరప్ ఫుట్బాల్ సమాఖ్య (యూఈఎఫ్ఏ) తీవ్ర అభ్యంతరం వ్యక్తం చేసింది. ఫిఫా తన నిర్ణయాన్ని వెనక్కి తీసుకోకపోతే, వరల్డ్కప్తో పాటు ఫిఫా నిర్వహించే అన్ని టోర్నీలను బహిష్కరిస్తామని యూఈఎఫ్ఏకు చెందిన 55 సభ్య దేశాలు ఏకగ్రీవంగా హెచ్చరించాయి.
వివరాలు
20 బిలియన్ డాలర్ల సంస్థ ప్రతిపాదన
ఫిఫా వరల్డ్కప్ వంటి ప్రపంచస్థాయి టోర్నీల వాణిజ్య హక్కుల నిర్వహణ కోసం 20 బిలియన్ డాలర్ల విలువైన కొత్త అనుబంధ సంస్థను ఏర్పాటు చేయాలని యోచిస్తోంది.
ఈ సంస్థలో 20 శాతం వాటాను ప్రైవేట్ పెట్టుబడిదారులకు విక్రయించాలని ఫిఫా అధ్యక్షుడు గియాని ఇన్ఫాంటినో ప్రతిపాదించారు.
ఈ అంశంపై గురువారం జరిగిన వర్చువల్ సమావేశంలో యూఈఎఫ్ఏ సభ్య దేశాలు విస్తృతంగా చర్చించి, ఫిఫా ప్రతిపాదనను పూర్తిగా తిరస్కరించాయి.
వివరాలు
వరల్డ్కప్ అమ్మకానికి కాదు
ఈ సందర్భంగా యూఈఎఫ్ఏ ఘాటుగా స్పందించింది. వరల్డ్కప్ అనేది పెట్టుబడి ఉత్పత్తి కాదు.
అది తరతరాలుగా ఆటగాళ్లు, అభిమానులు నిర్మించుకున్న గొప్ప క్రీడా వారసత్వం. దాన్ని ప్రైవేట్ పెట్టుబడిదారులకు అప్పగించకూడదు.
వరల్డ్కప్ అమ్మకానికి కాదని తన అధికారిక ప్రకటనలో స్పష్టం చేసింది.
ఫిఫా ఈ ప్రతిపాదనను పూర్తిగా ఉపసంహరించుకునే వరకు తమ సభ్య దేశాలు ఫిఫా టోర్నీల్లో పాల్గొనబోవని యూఈఎఫ్ఏ తేల్చిచెప్పింది.
ఇంగ్లండ్ మద్దతు
యూఈఎఫ్ఏ నిర్ణయానికి ఇంగ్లండ్ ఫుట్బాల్ అసోసియేషన్ కూడా పూర్తి మద్దతు ప్రకటించింది. ఫిఫా ప్రతిపాదనపై యూరప్ దేశాలు ఒకే అభిప్రాయంతో నిలవడం గమనార్హం.
వివరాలు
ఇతర ఖండాల సమాఖ్యల ఆందోళన
యూరప్ మాత్రమే కాకుండా ఆసియా ఫుట్బాల్ సమాఖ్య (ఏఎఫ్సీ), ఉత్తర మరియు మధ్య అమెరికా ఫుట్బాల్ సమాఖ్య (కాన్కాకాఫ్) కూడా ఫిఫా తీరును తప్పుబట్టాయి.
ఎలాంటి సంప్రదింపులు లేకుండా ఏకపక్షంగా ఇలాంటి కీలక నిర్ణయాలు తీసుకోవడంపై అవి అభ్యంతరం వ్యక్తం చేశాయి.
రానున్న టోర్నీలపై ప్రభావం?
ఈ పరిణామాల నేపథ్యంలో 2027 మహిళల ఫిఫా వరల్డ్కప్తో పాటు రాబోయే ఇతర అంతర్జాతీయ టోర్నీల నిర్వహణపై అనిశ్చితి నెలకొంది.
ఫిఫా-యూఈఎఫ్ఏ మధ్య నెలకొన్న ఈ విభేదాలు ప్రపంచ ఫుట్బాల్ భవిష్యత్తుపై ఎలాంటి ప్రభావం చూపుతాయన్నది ఇప్పుడు ఆసక్తికరంగా మారింది.