WPL 2023: ఉత్కంఠ పోరులో యూపీ వారియర్స్ విజయం
మహిళల ప్రీమియర్ లీగ్‌లో మొదటి మ్యాచ్‌లోనే ముంబై చేతిలో ఖంగుతున్న గుజరాత్ జెయింట్స్ తన అపజయాల పరంపరను కొనసాగిస్తోంది. ఆదివారం గుజరాత్ జెయింట్స్ పై యూపీ వారియర్స్ 3 వికెట్ల తేడాతో ఘన విజయం సాధించింది. గుజరాత్ జెయింట్స్ తరుపున కిమ్ గార్త్ ఐదు వికెట్లతో చెలరేగినా ఫలితం లేకుండా పోయింది. గార్త్ ఈ మ్యాచ్‌లో అత్యుత్తమ బౌలర్‌గా నిలిచింది. శ్వేతా సెహ్రావత్, తహ్లియా మెక్‌గ్రాత్, అలిస్సా హీలీ, సిమ్రాన్ షేక్, నవ్‌గీర్‌లను అవుట్ చేసి ఉమెన్స్ ప్రీమియర్ లీగ్‌లో తొలి ఐదు వికెట్ల తీసిన ప్లేయర్ గా నిలిచింది. గార్త్ నాలుగు ఓవర్లలో 36 పరుగులిచ్చి ఐదు వికెట్లు తీసింది
హాఫ్ సెంచరీతో చెలరేగిన గ్రేస్ హ్యారిస్
తొలుత టాస్ గెలిచి బ్యాటింగ్ చేసిన గుజరాత్ జట్టు 20 ఓవర్లలో 6 వికెట్ల నష్టానికి 169 పరుగులు చేసింది. అనంతరం బ్యాటింగ్ కు వచ్చిన యూపీ వారియర్స్ జట్టు 170 పరుగుల లక్ష్యాన్ని 19.5 ఓవర్లలో 7 వికెట్లు కోల్పోయి చేధించింది. యూపీ తరుపున గ్రేస్ హ్యారీస్ 26 బంతుల్లో 59 పరుగులు, కిరణ్ నవ్ గిర్ 43 బంతుల్లో 53 పరుగులు చేసి జట్టుకు విజయాన్ని అందించారు. ఆఖరి ఓవర్లో 19 పరుగులు అవసరం అయిన తరుణంలో.. గ్రేస్ రెండు ఫోర్లు, రెండు సిక్స్‌లు బాది ఒక బంతి మిగిలుండగానే తన జట్టును విజయాన్ని అందించింది.
