Virat Kohli Birthday: విరాట్ కోహ్లీ పుట్టినరోజు కోసం ఈడెన్ గార్డెన్స్‌లో ప్రత్యేక సన్నాహాలు
ఎన్నో చారిత్రక మ్యాచ్‌లకు ఆతిథ్యమిచ్చిన కోల్‌కతాలోని ఈడెన్ గార్డెన్స్ మైదానంలో ఆదివారం భారత్-దక్షిణాఫ్రికా మధ్య మ్యాచ్ జరగనుంది. ఇదే రోజు భారత స్టార్ బ్యాట్స్‌మెన్ విరాట్ కోహ్లీ 35వ పుట్టినరోజు కావడంతో ఈ మ్యాచ్ మరింత ప్రాముఖ్యతను సంతరించుకున్నది. అయితే బెంగాల్ క్రికెట్ అసోసియేషన్ (CAB) విరాట్ కోహ్లి పుట్టినరోజును చిరస్మరణీయంగా మార్చడానికి ప్రత్యేక ఏర్పాట్లు చేస్తోంది. ఇందుకోసం చాలా రోజుల నుంచి సన్నాహాలు చేస్తోంది. బర్త్ డే కానుకగా కోహ్లీకి ప్రత్యేక కేక్, బ్యాట్ సిద్ధం చేసినట్లు సీఏబీ ఉన్నతాధికారి ఒకరు తెలిపారు. కోహ్లీ ఛాంపియన్ క్రికెటర్ అని, అతని పుట్టినరోజున నాడు కోల్‌కతా స్టేడియం ఆతిథ్యం ఇవ్వడం తమ అదృష్టమని ఆయన అన్నారు.
మ్యాచ్ ప్రారంభానికి ముందు మైదానంలో కోహ్లీ కేక్ కట్ చేసే అవకాశం
కోహ్లీ కోసం బెంగాల్ క్రికెట్ అసోసియేషన్ ప్రత్యేక కేక్‌ను సిద్ధం చేసింది. అయితే ఇన్నింగ్స్ విరామ సమయంలో లేదా మ్యాచ్ ప్రారంభానికి ముందు, కోహ్లీ మైదానంలో ప్రేక్షకుల ముందు కేక్ కట్ చేస్తాడని తెలుస్తోంది. ఈ మ్యాచ్‌లో కోహ్లి మాస్క్‌లను కూడా ప్రేక్షకులకు పంచేందుకు క్యాబ్ ఏర్పాట్లు చేసినట్లు సమాచారం. అంతే కాకుండా CAB ప్రెసిడెంట్ స్నేహాశిష్ గంగూలీ కోహ్లీకి బ్యాట్ అందిస్తాడని సీఏబీ అధికారి ఒకరు తెలిపారు ఈ ప్రత్యేక మ్యాచ్‌కు కేంద్ర హోంమంత్రి అమిత్ షా, అమితాబ్ బచ్చన్‌లను కూడా ఆహ్వానించినట్లు సమాచారం. విరాట్ పుట్టిన రోజు నేపథ్యంలో భారత మాజీ కెప్టెన్, కోల్‌కతా ఫేవరెట్ సౌరవ్ గంగూలీ, BCCI సెక్రటరీ జయ్ షా మ్యాచ్ సమయంలో మైదానంలో ఉంటారు.
