Winter Olympics 2026: వింటర్ ఒలింపిక్స్కు ఇటలీ ఆతిథ్యం.. ఫుల్ షెడ్యూల్ ఇదే..
ఈ వార్తాకథనం ఏంటి
ఇటలీ దేశం 2026 వింటర్ ఒలింపిక్స్కు ఆతిథ్యం వహించనుంది. ఫిబ్రవరి 6 నుంచి 22 వరకు "మిలానో-కోర్టినా వింటర్ ఒలింపిక్స్ 2026"గా ఈ ప్రతిష్టాత్మక క్రీడా వేడుకలు ఉత్తర ఇటలీలో జరిగేలా నిర్ణయించబడింది. కొన్ని ప్రాథమిక పోటీలు ఫిబ్రవరి ప్రారంభానికి ముందే మొదలవుతాయని అధికారులు వెల్లడించారు. ఈసారి వింటర్ ఒలింపిక్స్ ప్రత్యేకత ఏమిటంటే...అన్ని పోటీలు ఒకే నగరంలో కాకుండా, అనేక నగరాలు,పర్వత ప్రాంతాలలో విస్తృతంగా జరగనున్నాయి. మిలాన్,కోర్టినా డీ అంపెజ్జో ప్రధాన కేంద్రాలుగా ఉండగా,చుట్టుపక్కల ప్రాంతాలు కూడా వేదికలుగా మారనున్నాయి. ఫిబ్రవరి 6న మిలాన్లోని ప్రసిద్ధ సాన్ సిరో స్టేడియంలో ప్రారంభ వేడుకలు ఘనంగా జరుగుతాయి. తర్వాత 16 విభిన్న వింటర్ క్రీడలలో మొత్తం 116 మెడల్ ఈవెంట్లు జరగనున్నాయి.
వివరాలు
టోఫానే ప్రాంతంలో మహిళల ఆల్పైన్ స్కీయింగ్ ప్రోగ్రాం
ఫిబ్రవరి 22న, ఇటలీ చారిత్రక అరేనా డి వెరోనాలో ముగింపు వేడుకలు జరుగుతాయి. మిలాన్లో ప్రధానంగా ఐస్ స్పోర్ట్స్కి వేదికలు ఏర్పాటు చేశారు. ఫిగర్ స్కేటింగ్, ఐస్ హాకీ, స్పీడ్ స్కేటింగ్ వంటి పోటీలు ఇక్కడ నిర్వహిస్తారు. పర్వత ప్రాంతాల్లో సంప్రదాయ మంచు క్రీడలు జరగనున్నాయి. డోలొమైట్స్ పర్వత ప్రాంతంలోని కోర్టినా డీ అంపెజ్జోలో కర్లింగ్, బాబ్స్లే, స్కెలిటన్, లూజ్ పోటీలు జరుగుతాయి. టోఫానే ప్రాంతంలో మహిళల ఆల్పైన్ స్కీయింగ్ ప్రోగ్రాం ఉంటుంది. బోర్మియో, లివిగ్నో ప్రాంతాల్లో పురుషుల ఆల్పైన్ స్కీయింగ్, ఫ్రీస్టైల్ స్నోబోర్డింగ్, స్కీ మౌంటెనీరింగ్ పోటీలు నిర్వహించనున్నారు. ముఖ్యంగా, స్కీ మౌంటెనీరింగ్ ఈసారి తొలిసారిగా ఒలింపిక్స్లో చోటు చేసుకుంటుంది.
వివరాలు
ఆంటర్సెల్వా ప్రాంతంలో బయాథ్లాన్ పోటీలు
వాల్ డీ ఫియెమ్మే ప్రాంతంలో స్కీ జంపింగ్, క్రాస్ కంట్రీ స్కీయింగ్, నార్డిక్ కాంబైన్డ్ ఈవెంట్లు ఉంటాయి. అదనంగా, ఆంటర్సెల్వా ప్రాంతంలో బయాథ్లాన్ పోటీలు జరగనున్నాయి. పర్యావరణ పరిరక్షణపై దృష్టి పెట్టి, ఇప్పటికే ఉన్న స్టేడియాలు, తాత్కాలిక నిర్మాణాల సహాయంతో ఎక్కువ వేదికలు సిద్ధం చేస్తున్నారు. కొత్త నిర్మాణాలను తగ్గించడం ద్వారా పర్యావరణ హితంగా ఈ ఒలింపిక్స్ నిర్వహించడానికి చర్యలు తీసుకుంటున్నారు.
వివరాలు
110 ప్రావిన్స్లలో ప్రయాణించిన ఒలింపిక్ జ్వాల
ఒలింపిక్ జ్వాల రీలే 2025 చివరిలో గ్రీస్లోని ఒలింపియా నుండి ప్రారంభమై, ఇటలీ దేశవ్యాప్తంగా 110 ప్రావిన్స్ల ద్వారా ప్రయాణించి, మిలాన్లోని ప్రారంభ వేడుకలతో ముగుస్తుంది. క్రీడలతో పాటు సాంస్కృతిక కార్యక్రమాలు, మాస్కట్లు, ప్రత్యేక కార్యక్రమాలు ఈ ఒలింపిక్స్లో ప్రేక్షకులకు ఆకర్షణగా ఉంటాయి. అంతేకాక, ప్రపంచవ్యాప్తంగా ప్రేక్షకులు ప్రత్యక్షంగా చూడగలిగేలా ఆధునిక ప్రసార సాంకేతికతను వినియోగించనున్నారు.