Black Sea to Hormuz: 48 గంటల్లో 3 దాడులు.. భారతీయ నావికుల భద్రతపై పెరుగుతున్న ఆందోళన

వ్రాసిన వారు Sirish Praharaju

Oct 08, 2026

04:09 pm

ఈ వార్తాకథనం ఏంటి

అంతర్జాతీయ సముద్ర మార్గాల్లో కొనసాగుతున్న ఉద్రిక్తతలు భారతీయ నావికుల భద్రతపై తీవ్ర ప్రభావం చూపుతున్నాయి. గత 48గంటల్లో బ్లాక్ సీ,హార్ముజ్ జలసంధిలో వాణిజ్య నౌకలపై మూడు దాడులు జరిగాయి. ఈ ఘటనల్లో పలువురు భారతీయ నావికులు గాయపడగా,ఒక నౌకలోని మొత్తం సిబ్బందిని సురక్షితంగా తరలించాల్సి వచ్చింది. వాణిజ్య నౌకలపై దాడులను భారత్ తీవ్రంగా ఖండించింది.బ్లాక్ సీలో మంగళవారం లైబీరియా జెండాతో ప్రయాణిస్తున్న Aframax Rio అనే చమురు ట్యాంకర్‌పై నౌకాదళ డ్రోన్లతో దాడి జరిగినట్లు రష్యా అధికారులు తెలిపారు. నౌకలో మొత్తం 23మంది సిబ్బంది ఉండగా,అందరూ భారతీయులే. దాడి తర్వాత నౌకలో భారీగా మంటలు చెలరేగాయి. అయితే సహాయక బృందాలు మొత్తం 23 మందినీ సురక్షితంగా రక్షించాయి. ఈ ఘటనలో ఎవరూ గాయపడలేదు.

వివరాలు

పనామా జెండా నౌకపై ప్రాజెక్టైల్ దాడి

ఇదే సమయంలో MV Royad Mammadov అనే కార్గో నౌకపైనా బ్లాక్ సీలో దాడి జరిగింది.

ఉక్రెయిన్‌లోని ఇజ్మాయిల్ నుంచి ఇటలీకి మొక్కజొన్నను తరలిస్తున్న ఈ నౌకలో ఇద్దరు విదేశీ నావికులు మృతి చెందగా,పలువురు గాయపడ్డారు.

ఇందులో ముగ్గురు భారతీయ నావికులు ఉన్నారు. వారంతా సురక్షితంగా బయటపడ్డారు.

రొమేనియా అధికారులు గాయపడిన సిబ్బందిని రక్షించి చికిత్స అందించారు.

అనంతరం నౌక మునిగిపోయినట్లు సమాచారం.మరోవైపు,స్ట్రెయిట్ ఆఫ్ హార్ముజ్‌లో MT On Peace అనే పనామా జెండా నౌకపై ప్రాజెక్టైల్ దాడి జరిగింది.

నౌకలో 19మంది సిబ్బంది ఉండగా,17మంది భారతీయులు.

మొత్తం 12 మంది గాయపడగా.. వారిలో 11 మంది భారతీయ నావికులే. ఒమన్ అధికారుల సహకారంతో గాయపడిన వారిని ఖసబ్‌కు తరలించి చికిత్స అందించారు.

వివరాలు

హార్ముజ్ సంక్షోభంలో మరణించిన 7గురు భారతీయులు

ఈ ఏడాది హార్ముజ్ సంక్షోభంలో ఇప్పటికే 16 మంది నావికులు మరణించగా, వారిలో ఏడుగురు భారతీయులేనని నివేదికలు వెల్లడించాయి.

వందలాది భారతీయ నావికులను కూడా వివిధ దాడుల నుంచి రక్షించారు.

ప్రపంచ సముద్ర రవాణాలో భారత్‌కు చెందిన నావికుల వాటా భారీగా ఉంది.

అందుకే యుద్ధ ప్రభావిత సముద్ర మార్గాల్లో జరుగుతున్న దాడులు భారతీయులకు మరింత ప్రమాదకరంగా మారుతున్నాయి.

వాణిజ్య నౌకలు, నావికులపై దాడులు నిలిపివేసి అంతర్జాతీయ జలాల్లో సురక్షిత రాకపోకలను పునరుద్ధరించాలని భారత్ పిలుపునిచ్చింది.

ట్విట్టర్ పోస్ట్ చేయండి

భారత విదేశాంగ శాఖ చేసిన ట్వీట్

Statement on the attack on a commercial vessel MT On Peace, off the coast of Oman

🔗 https://t.co/nuE2vv3x8k pic.twitter.com/9KE13wy5UY
— Randhir Jaiswal (@MEAIndia) October 6, 2026