Rubik's Cube World Record: రూబిక్స్ క్యూబ్లో సంచలనం.. 4.27 సెకన్లలో క్యూబ్ సాల్వ్ చేసిన ఆరేళ్ల బాలిక
ఈ వార్తాకథనం ఏంటి
రూబిక్స్ క్యూబ్ను పరిష్కరించాలంటే సాధారణంగా చాలా ఏకాగ్రత, సాధన అవసరం. ముఖ్యంగా 3×3 క్యూబ్ను కొన్ని సెకన్లలో పూర్తి చేయడం స్పీడ్క్యూబర్లకే సవాలుగా ఉంటుంది. అలాంటిది చైనాకు చెందిన ఆరేళ్ల చిన్నారి లియాన్ యున్జీ కేవలం 4.27 సెకన్ల సగటు సమయంలో 3×3 రూబిక్స్ క్యూబ్ను పరిష్కరించి అందరినీ ఆశ్చర్యపరిచింది. కుటుంబ సభ్యులు ముద్దుగా 'జిజి' అని పిలిచే లియాన్.. మహిళల 3×3 విభాగంలో తన అసాధారణ వేగంతో ప్రపంచ రికార్డు సృష్టించింది.
వివరాలు
4.27 సెకన్లలోనే క్యూబ్ పూర్తి
చైనా ప్రభుత్వ ప్రసార సంస్థ CCTV వెల్లడించిన వివరాల ప్రకారం.. లియాన్ యున్జీ ఈ నెలలో వుహాన్, గ్వాంగ్జౌ నగరాల్లో జరిగిన వరల్డ్ క్యూబ్ అసోసియేషన్ గుర్తింపు పొందిన రెండు పోటీల్లో పాల్గొంది.
ఈ రెండు ఈవెంట్లలోనూ ఆమె మహిళల 3×3 విభాగంలో సగటు సమయ రికార్డులను అధిగమించింది.
వుహాన్లో జరిగిన పోటీలో లియాన్ 4.52 సెకన్ల సగటు సమయాన్ని నమోదు చేసింది.
ఆ తర్వాత మరో పోటీలో తన వేగాన్ని మరింత మెరుగుపరుచుకుని కేవలం 4.27 సెకన్ల సగటుతో రూబిక్స్ క్యూబ్ను పూర్తి చేసింది.
దీంతో 3×3 రూబిక్స్ క్యూబ్ను 4.5 సెకన్లలోపు సగటు సమయంలో పరిష్కరించిన తొలి మహిళా స్పీడ్క్యూబర్గా నిలిచినట్లు CCTV తెలిపింది.
వివరాలు
సోషల్ మీడియాలో వైరల్గా వీడియోలు
లియాన్ క్యూబ్ను సాల్వ్ చేస్తున్న వీడియోలు సోషల్ మీడియాలో వైరల్గా మారాయి.
ఎరుపు రంగు హెయిర్బో ధరించి కనిపించే చిన్నారి.. చేతి వేళ్లను అత్యంత వేగంగా కదుపుతూ క్యూబ్ను క్షణాల్లోనే పరిష్కరిస్తుంది.
అనంతరం క్యూబ్ను టేబుల్పై ఉంచి చప్పట్లు కొడుతూ, విజయోత్సాహంతో చేతిని పైకి ఎత్తుతుంది. ఆమె వేగాన్ని చూసిన నెటిజన్లు ఆశ్చర్యం వ్యక్తం చేస్తున్నారు.
వివరాలు
రోజూ 2 నుంచి 3 గంటల సాధన
లియాన్ తల్లి లిన్ యాంగ్షీ తెలిపిన వివరాల ప్రకారం.. చిన్నతనంలో ఓ తరగతిలో భాగంగా ఆమె కుమార్తెకు తొలిసారి రూబిక్స్ క్యూబ్ పరిచయమైంది.
అప్పట్లో లియాన్ డ్యాన్స్, మ్యూజిక్ వంటి ఇతర కార్యకలాపాలను కూడా నేర్చుకునేది.
అయితే రూబిక్స్ క్యూబ్ పిల్లల్లో పలు మానసిక, ఆలోచనా సామర్థ్యాలను పెంపొందించేందుకు ఉపయోగపడుతుందని ఆమె తల్లి గుర్తించారు.
దీంతో లియాన్కు క్రమంగా క్యూబ్పై ఆసక్తి పెరిగింది. సాధనను కొనసాగిస్తూ ప్రస్తుతం 1,300కు పైగా రూబిక్స్ క్యూబ్ అల్గారిథమ్లను నేర్చుకున్నట్లు సమాచారం.
ప్రతిరోజూ దాదాపు 2 నుంచి 3 గంటల పాటు క్రమం తప్పకుండా ప్రాక్టీస్ చేస్తోంది. ఈ నిరంతర సాధనే ఆమె వేగాన్ని గణనీయంగా పెంచినట్లు తెలుస్తోంది.
వివరాలు
వేగంతో పాటు లాజికల్ థింకింగ్
రూబిక్స్ క్యూబ్ అంటే కేవలం వేగంగా తిప్పి పూర్తి చేసే పజిల్ మాత్రమే కాదని లియాన్ తల్లి చెబుతున్నారు.
క్యూబ్ను పరిష్కరించే క్రమంలో పిల్లల్లో ఏకాగ్రత, జ్ఞాపకశక్తి, తార్కిక ఆలోచన, సమస్యను వివిధ కోణాల్లో విశ్లేషించే సామర్థ్యం అభివృద్ధి చెందవచ్చని ఆమె పేర్కొన్నారు.
కేవలం అల్గారిథమ్లను కంఠస్థం చేసుకోవడం సరిపోదని.. ప్రతి పరిస్థితికి అనుగుణంగా సరైన పరిష్కారాన్ని గుర్తించేందుకు లాజికల్గా ఆలోచించాల్సి ఉంటుందని వివరించారు.
అందుకే లియాన్ సాధనలో వేగంతో పాటు సమస్య పరిష్కార నైపుణ్యాలపైనా దృష్టి పెడుతున్నట్లు తెలుస్తోంది.
వివరాలు
ఆరేళ్లకే ఎన్నో ట్రోఫీలు
లియాన్ ఇంట్లో ఇప్పటికే ఆమె సాధించిన విజయాలకు సంబంధించిన ఎన్నో ట్రోఫీలు ఉన్నాయి.
ఆరేళ్ల వయసులోనే స్పీడ్క్యూబింగ్లో ఇంతటి ప్రతిభ కనబరచడం ఇప్పుడు చైనా మీడియాతో పాటు సోషల్ మీడియాలోనూ చర్చనీయాంశంగా మారింది.
క్రమమైన సాధన, ఆసక్తి, ఏకాగ్రత ఉంటే చిన్న వయసులోనూ అసాధారణ ప్రతిభను ప్రదర్శించవచ్చని లియాన్ ప్రయాణం చూపిస్తోంది.
ట్విట్టర్ పోస్ట్ చేయండి
రూబిక్స్ క్యూబ్లో ఆరేళ్ల చిన్నారి ప్రపంచ రికార్డు
Six-year-old Lian Yunzhi broke the women's 3x3 Rubik's Cube world record twice in three days at WCA-certified events in China — averaging 4.52s, then 4.27s. First woman ever to average under 4.5 seconds. She's mastered 1,300+ algorithms, training 2-3 hours daily.#RubiksCube pic.twitter.com/0x45cfr7ph
— Xavier Mareca (@xavierdatatech) September 22, 2026