Turkey: టర్కీ ఆయుధ కర్మాగారంలో భారీ పేలుడు: 12 మంది మృతి
టర్కీలోని ఆయుధ తయారీ కేంద్రంలో మంగళవారం జరిగిన భారీ పేలుడులో 12 మంది ప్రాణాలు కోల్పోగా, 3 మంది గాయపడ్డట్లు ప్రభుత్వ వర్గాలు వెల్లడించాయి. ఈ సంఘటన బల్కిసెర్ ప్రావిన్స్‌లోని కవక్లి పట్టణ శివార్లలో ఉన్న ఫ్యాక్టరీలో జరిగింది. ఈ ఫ్యాక్టరీలో మందుగుండు,ఫ్లేయర్స్‌,ఇతర ఆయుధాలను తయారు చేసి విదేశాలకు ఎగుమతి చేస్తారు. టర్కీ కాలమానం ప్రకారం ఉదయం 8.25 నిమిషాలకు జరిగిన పేలుడుతో భారీ అగ్నిగోళం గాల్లోకి ఎగసింది.
ప్రమాదం పై దర్యాప్తు
జెఎస్‌ఆర్‌ ఎక్స్‌ప్లోజీవ్స్‌ ఫ్యాక్టరీలోని ప్రధాన భవనం పూర్తిగా కుప్పకూలిపోయింది. ఇంకా చుట్టుపక్కల భవనాలు కూడా దెబ్బతిన్నాయి. దీనిని క్యాప్సుల్ ప్రొడక్షన్ విభాగంగా పేర్కొంటున్నారు. ఈ ప్రమాదం పై దర్యాప్తు ప్రారంభించినట్లు టర్కీ ఇంటీరియర్‌ మంత్రి తెలిపారు. కానీ ప్రమాదానికి గల కారణాలపై ఫలితాలు ఇప్పుడే చెప్పలేమన్నారు. పేలుడు జరిగిన వెంటనే అగ్నిమాపక సిబ్బంది, అంబులెన్స్‌లు అక్కడికి చేరుకొని సహాయక చర్యలు చేపట్టాయి.
