కెనడాలో కూలిన విమానం.. ఇద్దరు భారత ట్రైనీ పైలట్లు మృతి
కెనడాలోని బ్రిటిష్ కొలంబియా ప్రావిన్స్‌లో శనివారం జరిగిన విమాన ప్రమాదంలో ఇద్దరు భారతీయ ట్రైనీ పైలట్లు మరణించినట్లు అధికారులు తెలిపారు. మృతులను ముంబైకి చెందిన అభయ్ గాడ్రూ, యశ్ విజయ్ రాముగాడేగా గుర్తించారు. పైపర్ పీఏ-34 సెనెకా అనే ట్విన్ ఇంజన్‌తో కూడిన విమానం చిల్లివాక్ నగరంలోని ఓ మోటెల్ వెనుక ఉన్న చెట్లు, పొదలపై కూలిపోయిందని కెనడా పోలీసు అధికారులు తెలిపారు. ఈ ఘటనలో భారతీయులే కాకుండా మరో పైలట్ కూడా చనిపోయాడు. అయితే ఈ ప్రమాదం వల్ల ఆ ప్రాంతంలో ప్రజలకు ఎటువంటి గాయాలు, ప్రమాదం జరగలేదని అధికారులు వెల్లడించారు. విమాన ప్రమాదానికి గల కారణం ఇంకా తెలియరాలేదు. కెనడా రవాణా భద్రతా బోర్డు ఈ సంఘటనపై దర్యాప్తు ప్రారంభించింది.
