All will be forgiven: ఇమ్రాన్ ఖాన్ తొలగింపులో అమెరికా పాత్ర?..
ఈ వార్తాకథనం ఏంటి
పాకిస్థాన్ మాజీ ప్రధాని ఇమ్రాన్ ఖాన్ను అధికారంలో నుంచి తప్పించేందుకు అమెరికా కీలక పాత్ర పోషించిందన్న ఆరోపణలకు తాజాగా లీకైన రహస్య దౌత్య పత్రాలు మరింత బలం చేకూర్చాయి. ఈ పత్రాలను పరిశోధనాత్మక వార్తా సంస్థ 'డ్రాప్ సైట్' బయటపెట్టింది. అందులో వెల్లడైన వివరాల ప్రకారం.. 2022 ఏప్రిల్లో ఇమ్రాన్ ఖాన్కు వ్యతిరేకంగా పాకిస్థాన్ జాతీయ అసెంబ్లీలో అవిశ్వాస తీర్మానం ప్రవేశపెట్టే ముందు కీలక పరిణామాలు చోటుచేసుకున్నాయి. అమెరికాలోని పాకిస్థాన్ రాయబారి అసద్ మజీద్ ఖాన్తో అమెరికా విదేశాంగ శాఖకు చెందిన దక్షిణ, మధ్య ఆసియా వ్యవహారాల సహాయ కార్యదర్శి డొనాల్డ్ లూ సమావేశమైనట్లు పత్రాల్లో పేర్కొన్నారు.
వివరాలు
పాకిస్థాన్ ప్రధానిగా షెహబాజ్ షరీఫ్
ఆ సమావేశంలో ఇమ్రాన్ ఖాన్ను పదవి నుంచి తప్పించి జైలుకు పంపితేనే అమెరికా-పాకిస్థాన్ సంబంధాలు మరింత మెరుగుపడతాయని చర్చ జరిగినట్లు సమాచారం వెలుగులోకి వచ్చింది. ఇమ్రాన్ ఖాన్ పదవి నుంచి తప్పుకున్న అనంతరం షెహబాజ్ షరీఫ్ పాకిస్థాన్ ప్రధానిగా బాధ్యతలు స్వీకరించారు. రష్యా-ఉక్రెయిన్ యుద్ధంపై ఇమ్రాన్ ఖాన్ తటస్థ వైఖరి అవలంబించడమే అమెరికా అసంతృప్తికి కారణమైందని లీకైన దౌత్య సమాచారం వెల్లడించింది. ఇదిలా ఉండగా, పాక్ రాయబారి-అమెరికా అధికారుల సమావేశానికి ముందే ఇమ్రాన్ ఖాన్ దేశవ్యాప్తంగా భారీ సభ నిర్వహించారు.
వివరాలు
తోషాఖానా వ్యవహారంలో ఇమ్రాన్ ఖాన్కు జైలు శిక్ష
తన ప్రభుత్వాన్ని కూల్చివేయడానికి అమెరికా, స్థానిక రాజకీయ పక్షాలు, కొందరు అధికారులతో కలిసి కుట్ర పన్నుతున్నాయని ఆరోపించారు. అయితే ఆ ఆరోపణలను అప్పటి పాకిస్థాన్ ప్రభుత్వం, అమెరికా ఖండించాయి. తర్వాత తోషాఖానా వ్యవహారంలో ఇమ్రాన్ ఖాన్కు జైలు శిక్ష విధించారు. అప్పటి నుంచి ఆయన కారాగారంలోనే ఉన్నారు.