Trump: ఇరాన్‌తో యుద్ధాన్ని అమెరికా మొదలుపెట్టలేదు: ట్రంప్
ఈ వార్తాకథనం ఏంటి
ఇరాన్‌తో కొనసాగుతున్న యుద్ధంపై అమెరికా అధ్యక్షుడు డొనాల్డ్ ట్రంప్ మరోసారి కీలక వ్యాఖ్యలు చేశారు. ఇరాన్‌తో యుద్ధాన్ని అమెరికా మొదలుపెట్టలేదని స్పష్టం చేశారు. 1979 నుంచే ఇరాన్ అమెరికాపై పోరాటం చేస్తోందని ఆరోపించారు. ఈ యుద్ధంలో అమెరికా ఇప్పటికే విజయం సాధించిందని, అయితే పాక్షిక విజయంతో సరిపెట్టుకోకుండా సంపూర్ణ విజయం సాధించడమే తమ లక్ష్యమని వెల్లడించారు. అమెరికా దాడుల్లో ధ్వంసమైన వాటిని తిరిగి నిర్మించుకోవడానికి ఇరాన్‌కు 25 ఏళ్లు పడుతుందని వ్యాఖ్యానించారు.
వివరాలు
1979 నుంచే ఇరాన్ అమెరికాపై పోరాటం
అమెరికాలోని వర్జీనియా రాష్ట్రం ఆర్లింగ్టన్ జాతీయ స్మశానవాటికలో బుధవారం నిర్వహించిన 2026 జాతీయ సైనికుల దినోత్సవ కార్యక్రమంలో ట్రంప్ పాల్గొన్నారు.
ఈ సందర్భంగా సైనికులను ఉద్దేశించి ప్రసంగిస్తూ ఇరాన్‌తో యుద్ధంపై తన అభిప్రాయాలను వెల్లడించారు.
ఇరాన్‌తో యుద్ధాన్ని అమెరికా ప్రారంభించలేదని, 1979 నుంచే ఆ దేశం అమెరికాపై పోరాటం చేస్తోందని అన్నారు.
ఈ సమస్యను చాలా ఏళ్ల క్రితమే పరిష్కరించాల్సి ఉండేదని అభిప్రాయపడ్డారు.
తమ ప్రభుత్వం అధికారంలోకి వచ్చిన తర్వాత ఇరాన్‌కు గట్టిగా బదులిచ్చామని, అమెరికా సైన్యం తీవ్రంగా పోరాడిందని చెప్పారు.
ఈ పోరాటంలో అమెరికా విజయం సాధించిందని పేర్కొన్నారు.
వివరాలు
అమెరికా ఇప్పటికే 93 శాతం విజయం సాధించింది: ట్రంప్
ఇరాన్ అణు కార్యక్రమానికి సంబంధించిన కీలక లక్ష్యాలపై బీ-2 బాంబర్లతో దాడులు నిర్వహించి వాటిని ధ్వంసం చేసినట్లు ట్రంప్ వెల్లడించారు.
ఇరాన్ అణ్వాయుధాన్ని సంపాదించకుండా అడ్డుకున్నామని తెలిపారు.
ఈ యుద్ధంలో అమెరికా ఇప్పటికే 93 శాతం విజయం సాధించిందని, అయితే తమకు 100 శాతం విజయం కావాలని స్పష్టం చేశారు.
ఇకపై ఇరాన్‌లో మరింత విధ్వంసం సృష్టించాల్సిన పరిస్థితి రాకూడదని ఆశిస్తున్నట్లు చెప్పారు.
ఇరాన్‌తో జరుగుతున్న పోరాటంలో అమెరికా కూడా ప్రాణనష్టాన్ని చవిచూసిందని ట్రంప్ అంగీకరించారు. ఈ యుద్ధంలో 18 మంది అమెరికన్లను కోల్పోయామని వెల్లడించారు.