యూఎస్ పౌరసత్వ పరీక్షలో కీలక మార్పులు.. అమెరికాపై అవగాహన, ఆంగ్ల నైపుణ్యాలకు పెద్దపీట
ఈ వార్తాకథనం ఏంటి
అగ్రరాజ్యం అమెరికా దేశ పౌరసత్వం పొందడం అంత ఈజీ కాదు. ఇకపై నిబంధనలు మరింత కఠినతరం చేయనున్నారు. ఈ మేరకు నేచురలైజేషన్ పరీక్షలో యూఎస్ఏ కీలక మార్పులు చేయనుంది.
విదేశీయులకు అగ్రదేశ పౌరసత్వం ఇచ్చేందుకు నేచురలైజేషన్ టెస్ట్ నిర్వహిస్తారు.
చివరిసారిగా 2008లో ఈ పరీక్షలో మార్పులు చేర్పులు చేశారు. అమెరికా చట్టాల ప్రకారం ప్రతి 15 ఏళ్లకు ఓసారి కాలానికి అనుగుణంగా మార్పులు జరగాల్సిందే.
ఈ క్రమంలోనే మరోసారి పరీక్ష నిర్వహణ తీరులో కొత్త నిబంధనలు చేర్చేందుకు యూఎస్ సర్కార్ సన్నద్ధమవుతోంది.
అభ్యర్థుల ఆంగ్ల భాష నైపుణ్యాలను అంచనా వేసేలా ఈ పరీక్ష కఠినతరంగా మారబోతోందని అక్కడి నిపుణులు అంచనా వేస్తున్నారు.
DETAILS
అమెరికాలో జీవితానికి సంబంధించి పలు ప్రశ్నలు అడిగే అవకాశం
అమెరికా పౌరసత్వ ప్రక్రియలో నేచురలైజేషన్ పరీక్ష తొలి అంకం. ఈ టెస్టు దాదాపు నెల రోజుల పాటు సాగుతుంది.
ఇందులో ఉత్తీర్ణులైన వారికే పౌరసత్వం కోసం దరఖాస్తు చేసుకునే అర్హత ఉంటుంది. అమెరికా జీవితానికి, అక్కడి జీవన విధానానికి సంబంధించి పలు ప్రశ్నలపై అభ్యర్థులు సమాధానాలు ఇవ్వాల్సి ఉంటుంది.
కొత్త విధానంలో నిర్వహించనున్న పరీక్షలో ఫొటోలు ఇస్తారు. వాటిని గుర్తిస్తూ ఇంగ్లీష్ లో వివరణ ( డిస్క్రిప్షన్ ) రాయాల్సి ఉంటుంది. అయితే ఆంగ్ల భాషపై పట్టులేని వారికి ఈ విధానం ఇబ్బంది కలిగిస్తుందని తెలుస్తోంది.
గతంలో అభ్యర్థులు మౌఖిక పద్ధతి (ఇంటర్వూ) ద్వారా సమాధానాలు ఇచ్చేవారు.
DETAILS
యూఎస్ ప్రజలు, నిపుణులు సలహాల సూచనల అనంతరం నూతన విధానంపై ప్రకటన
తాజాగా చేపడుతున్న నూతన మార్పులు ఆఫ్రికన్ దేశాల వారికి ఆందోళన కలిగిస్తోంది. పరీక్షలో రోజువారీ కార్యకలాపాలు, వాతావరణం, ఆహారం లాంటి వాటి ఫోటోలు ఇస్తారు. వాటిని వివరిస్తూ ఇంగ్లీష్ లోనే సమాధానాలు ఇవ్వాల్సి ఉంటుంది.
కొత్త విధానంలో మల్టిపుల్ ఛాయిస్ ప్రశ్నలూ ఉండటంతో అమెరికా చరిత్ర, ఇతర సామాజిక అంశాలపై చక్కటి అవగాహన ఉండాలి.
తాజాగా చేపట్టబోయే సవరణలతో వర్ధమాన దేశాలు, సంక్షుభిత ప్రాంతాల నుంచి అగ్రరాజ్యం అమెరికా ఆశ్రయం కోసం వస్తున్న వారిపై ప్రతికూల ప్రభావం చూపనుంది.
కొత్త పరీక్ష విధానంపై అమెరికా పౌరులు, నిపుణుల నుంచి సలహాలు, సూచనలను యూఎస్ సర్కార్ స్వీకరిస్తోంది. అనంతరం నూతన పరీక్ష విధానాన్ని ప్రకటించనుంది.