Honduras: హోండూరస్లో కాల్పులు.. 25 మంది మృతి
ఈ వార్తాకథనం ఏంటి
మధ్య అమెరికా దేశం హోండూరస్లో జరిగిన రెండు వేర్వేరు కాల్పుల ఘటనలు కలకలం రేపాయి. ఈ ఘటనల్లో మొత్తం 25 మంది ప్రాణాలు కోల్పోయారు. మృతుల్లో ఆరుగురు పోలీసు అధికారులు కూడా ఉండటం ఆందోళన కలిగిస్తోంది. ఉత్తర హోండూరస్లోని ట్రుజిల్లో మున్సిపాలిటీ పరిధిలో ఓ వ్యవసాయ తోటలో పనిచేస్తున్న కార్మికులపై సాయుధ దుండగులు అకస్మాత్తుగా కాల్పులకు తెగబడ్డారు. ఈ దాడిలో 19 మంది కార్మికులు అక్కడికక్కడే మృతి చెందారు. ఆ ప్రాంతంలో వ్యవసాయ భూములపై దశాబ్దాలుగా వివాదాలు కొనసాగుతున్న నేపథ్యంలోనే ఈ దాడి జరిగి ఉండొచ్చని స్థానిక అధికారులు అనుమానం వ్యక్తం చేస్తున్నారు.
వివరాలు
పోలీసులే లక్ష్యంగా దాడి
ఇక మరో ఘటనలో గ్వాటెమాలా సరిహద్దు ప్రాంతంలో వెళ్తున్న పోలీసు వాహనాల బృందాన్ని లక్ష్యంగా చేసుకుని దుండగులు కాల్పులు జరిపారు. ఈ దాడిలో ఆరుగురు పోలీసు అధికారులు ప్రాణాలు కోల్పోయారు. స్థానిక ముఠాలపై ప్రత్యేక చర్యల్లో పాల్గొంటున్న పోలీసులనే లక్ష్యంగా చేసుకుని ఈ దాడి జరిగినట్లు ఉన్నతాధికారులు వెల్లడించారు. ఈ రెండు ఘటనలను హోండూరస్ ప్రభుత్వం అత్యంత తీవ్రంగా పరిగణించింది. కాల్పులకు కారణాలు, దుండగుల వివరాలపై దర్యాప్తు కొనసాగుతోంది.