453 Boeing 737 MAX: బోయింగ్ 737 మ్యాక్స్ విమానాల్లో సీట్ల లోపాలు.. వెంటనే తనిఖీలకు ఎఫ్ఏఏ ఆదేశం
ఈ వార్తాకథనం ఏంటి
ప్రపంచవ్యాప్తంగా విస్తృతంగా వినియోగంలో ఉన్న బోయింగ్ 737 మ్యాక్స్ విమానాల భద్రతపై మరోసారి ఆందోళనలు వ్యక్తమయ్యాయి. మొత్తం 453 బోయింగ్ 737 మ్యాక్స్ విమానాల్లో ప్రయాణికుల సీట్ల ఫిట్టింగ్లో లోపాలు ఉన్నట్లు అమెరికా ఫెడరల్ ఏవియేషన్ అడ్మినిస్ట్రేషన్ (FAA) వెల్లడించింది. ఈ లోపాలను దృష్టిలో ఉంచుకుని సంబంధిత విమానాలను వెంటనే తనిఖీ చేసి, అవసరమైన మరమ్మతులు చేపట్టాలని ప్రతిపాదించింది. ఎఫ్ఏఏ తెలిపిన వివరాల ప్రకారం ఈ ఆదేశాలు బోయింగ్ 737 మ్యాక్స్ 8,మ్యాక్స్ 9,మ్యాక్స్ 8200 మోడళ్లకు వర్తిస్తాయి. 2025 డిసెంబర్ 10న బోయింగ్ విడుదల చేసిన ప్రత్యేక సాంకేతిక నివేదికను సమగ్రంగా పరిశీలించిన అనంతరం ఈ ప్రతిపాదనను తీసుకొచ్చినట్లు వెల్లడించింది.
వివరాలు
ఈ అంశంపై స్పందించిన బోయింగ్ సంస్థ
దీనిపై విమానయాన రంగానికి చెందిన సంస్థలు, నిపుణుల నుంచి సెప్టెంబర్ 10 వరకు అభిప్రాయాలు స్వీకరిస్తామని పేర్కొంది.
ఈ అంశంపై బోయింగ్ సంస్థ కూడా స్పందించింది. సీట్ల అమరికలో ఉన్న లోపాలను గత ఏడాదే గుర్తించి, వాటి సవరణకు అవసరమైన సూచనలు సంబంధిత సంస్థలకు జారీ చేసినట్లు తెలిపింది.
ప్రస్తుతం ఎఫ్ఏఏ ఈ మార్గదర్శకాలను తప్పనిసరి చట్టబద్ధ ఆదేశాలుగా అమలు చేయాలన్న నిర్ణయానికి తాము పూర్తి మద్దతు ఇస్తున్నామని బోయింగ్ ప్రతినిధులు వెల్లడించారు.
వివరాలు
అత్యవసర పరిస్థితుల్లో సీట్లు ట్రాక్ల నుంచి విడిపోయే ప్రమాదం
ఎఫ్ఏఏ వివరణ ప్రకారం, సీటు వెనుక భాగాన్ని ట్రాక్కు సరిగా అమర్చకపోతే తీవ్రమైన గాలివాన కుదుపులు (టర్బ్యులెన్స్) లేదా అత్యవసర పరిస్థితుల్లో సీట్లు ట్రాక్ల నుంచి విడిపోయే ప్రమాదం ఉంది.
అలాంటి సందర్భాల్లో ప్రయాణికులు, విమాన సిబ్బందికి గాయాలు అయ్యే అవకాశం పెరుగుతుంది.
అంతేకాకుండా, అత్యవసర పరిస్థితుల్లో విమానం నుంచి బయటకు వెళ్లే మార్గం సీట్లు అడ్డుగా మారే ప్రమాదం కూడా ఉండటంతో ఈ లోపాలను అత్యంత ప్రాధాన్యంగా పరిగణిస్తున్నట్లు ఎఫ్ఏఏ స్పష్టం చేసింది.