Brazil: తూర్పు బ్రెజిల్‌లో బస్సు ప్రమాదం.. 23 మంది మృతి
బ్రెజిల్‌లోని అలగోస్ రాష్ట్రంలో మారుమూల పర్వత రహదారిపై జరిగిన ఘోర రోడ్డు ప్రమాదంలో బస్సు లోయలో పడటంతో 23 మంది ప్రాణాలు కోల్పోయారు. ఈ దుర్ఘటన సోమవారం చోటుచేసుకోగా, ప్రాంతీయ అధికారులు ఈ విషయాన్ని ధృవీకరించారు. ఘటన స్థలంలోనే 22 మంది మరణించారని, ఆసుపత్రిలో చికిత్స పొందుతూ గర్భిణీ స్త్రీ మరణించినట్లు రెస్క్యూ బృందాలు తెలియజేశాయి. ప్రమాద సమయంలో బస్సులో 40 మంది ప్రయాణికులు ఉన్నారని, పలువురు తీవ్రంగా గాయపడినట్లు బ్రెజిల్ మీడియా నివేదించింది. ఈ ఘటన యునియావో డాస్ పాల్మారెస్ పట్టణం సమీపంలో చోటుచేసుకుంది.
మూడు రోజుల పాటు సంతాప దినాలు
రాష్ట్ర గవర్నర్ పాలో డాంటాస్ ఈ విషాదకర ఘటన పట్ల సంతాపాన్ని వ్యక్తం చేస్తూ, మూడు రోజుల పాటు సంతాప దినాలుగా ప్రకటించారు. సెర్రా డా బారిగా అనే పర్వత ప్రాంతం వద్ద ప్రమాదం జరిగింది. ఈ ప్రాంతం దుర్గమమైనదిగా, రవాణాకు క్లిష్టమైనదిగా భావించబడుతుంది. ఈ ప్రమాదం స్థానికులను తీవ్ర దిగ్భ్రాంతికి గురిచేసింది.
